Indlela Yokuhlangabezana Nesizukulwana Senkcazelo

SIMELE sijamelane nesibakala sokuba zininzi iinkalo zesizukulwana senkcazelo seminyaka yee-1990 eziya kuqhubeka zisinxunguphalisa. Incinane kakhulu into esinokuyenza ngezinye zazo, ukuba phofu kukho kwanto esinokuyenza ngazo. Kwelinye icala, kukho amanyathelo esinokuwathabatha ukuze siphelise oluninzi kolo nxunguphalo, ukuba asilulo lonke. Ngoko sisenokuthi ukuphila kwisizukulwana senkcazelo kuzisa ucelomngeni kodwa kunomvuzo.

Samkela Size Sinikezele Ngenkcazelo

Enoba sizigqala ngolu hlobo okanye akunjalo, ukutyhubela ubomi bethu sonke samkela size sinikezele ngenkcazelo ngokomlinganiselo othile. Noko ke, ubuchopho bethu bamkela buze busebenzise inkcazelo ngeendlela ezahlukeneyo. Enye indlela iquka amandla amangalisayo obuchopho okusebenzisa inkcazelo ngokuzenzekelayo.

Enye indlela iquka ukwenza umgudu wokusebenzisa inkcazelo njengaxa kuncokolwa. Silulawula kakhulu olu hlobo lokuveliswa kwenkcazelo—enoba sinikezela ngayo okanye siyayamkela. Xa kufikelelwa kwincoko eyimfitshimfitshi, iBhayibhile ilumkisa ngabo ‘bangenzi nto kuphela, kodwa bekwangabahlebi yaye begxuphuleka kwimicimbi yabanye abantu, bethetha izinto abangafanele bazithethe.’ (1 Timoti 5:13) Ngamanye amazwi, kulumkele ukuchitha ixesha elininzi uthetha imfitshimfitshi okanye inkcazelo enokuba yingozi. Musa ukuba ngumntu ophilela ukuqokelela yonke intlebendwane le. Kusenokuchithwa ixesha namandla abalulekileyo, ibe oku kusenokusinxunguphalisa thina nabanye. Usenokuphoswa ngamathuba okufunxa nokudlulisela inkcazelo enokukwakha ngokwenene nebalulekileyo ukuze uqhubeke uphila kweli hlabathi lineenkathazo.

Ukufumana inkcazelo ekufundeni kufuna umgudu ibe kuthabatha ithuba elide. Kuyinto eqhelekileyo ukuva ixhoba lonxunguphalo likhalaza ngelithi, “Ndisemva kufundo lwam!” Ngaba uvakalelwa kukuba kuninzi ofanele ukufunde kodwa unexesha elincinane lokwenjenjalo? Ngenxa yokuba ukufunda kuthabatha ixesha elininzi, esi sizukulwana senkcazelo ekhawulezileyo sisoloko siphulukana nobuchule noyolo olubangelwa kuko. Abaninzi bavumela umabonwakude athabathe ixesha labo elininzi. Sekunjalo, inkcazelo ebhaliweyo iseyeyona ndlela inamandla yokukwenza ube nombono ibe idlulisela inkcazelo, iimbono neengcamango.

Sinokwenza ntoni xa kufuneka sinikele ingqalelo ekufundeni umbandela omninzi gqitha kube kukho umabonwakude, imidlalo yekhompyutha nezinye iindlela zokuzonwabisa? Kufuneka uzahlulahlule. Ukwahlulahlula, ukulungelelanisa okanye ukubeka kuqala, izinto esifuna ukuziva, ukuzibona, ukuzithetha, okanye esifuna ukuzifunda kunokuba luncedo kakhulu ekupheliseni ukunxunguphaliswa yinkcazelo. Ukwahlulahlula kakuhle kunokwenziwa ngeendlela ezimbini.

Ngaba Sifuna Imfungumfungu Eninzi?

Ukuqonda iimfuno zethu kusoloko kuphazanyiswa koko abanye bacinga ukuba siyakufuna okanye koko ubuchule bokubhengeza bamajelo eendaba busikhokelela ekucingeni ukuba siyakufuna. Ukuze woyise le ngxubakaxaka ibangelwa yinkcazelo, sebenzisa lo mgaqo usisiseko: Zenzele lula! URichard S. Wurman ukubeka ngale ndlela oku: “Imfihlelo yokusebenzisa inkcazelo kukuthoba umlinganiselo wenkcazelo oyingenisayo ivisisane nendlela ophila ngayo . . . Ndikholelwa kwelokuba iyintsomi into yokuba okukhona ziba ninzi izinto onokukhetha kuzo, kokukhona usenza izinto ngendlela efanelekileyo ibe kokukhona uya kunandipha inkululeko. Kunoko, ukhetho olungakumbi lubonakala lusizisa unxunguphalo olungakumbi.”

Ngoko xa kufikelelwa ekufundeni okanye ekubukeleni umabonwakude, kulungile ukuhlolisisa imikhwa yakho. Zibuze: ‘Ngaba oku kuyimfuneko kumsebenzi wam okanye kubomi bam? Ngaba ngokwenene kuyimfuneko ukwazi yonke imfungumfungu le nentlebendwane ephathelele abantu abadumileyo nekuthiwa bahle abasehlabathini? Buya kutshintsha njani ubomi bam xa ndingayibukeli le nkqubo kamabonwakude, ndingayifundi le ncwadi okanye ela phephancwadi, okanye ndingachithi ixesha elininzi ndifunda iphephandaba?’ Abanye baye bakwazi ukuzihlolisisa ngenyameko izinto abazifundayo nezinto abazibukela kumabonwakude ibe baye baphungula izinto ezixinanisa iingqondo zabo kwanamakhaya abo. Ngokomzekelo, baye bagqiba kwelokuba barhumele iphephandaba lemihla ngemihla libe linye. Amaphephandaba amaninzi aneendaba ezifanayo. Abanye abantu baye bacela ngokukhethekileyo ukuba bangawathunyelelwa amaphepha abangawacelanga okubhengeza kwiibhokisi zabo zeposi.

Ukugcina ubomi bulula yaye bungazaliswanga zizinto ezininzi kwakhuthazwa ngoyena mntu ubalaseleyo wakha waphila, uYesu Kristu. (Mateyu 6:25-34) Ukuphila ngendlela elula kuyanconyelwa ibe kuqhwatyelwa izandla kumazwe amaninzi aseAsia ibe abaninzi kumazwe aseNtshona basakugqala njengendlela ekumgangatho ophezulu yokuphila. Umbhali uDuane Elgin wathi: “Ukuphila ngeyona ndlela ilula ngakumbi kukuphila obona bomi bunenjongo nangaphandle kweziphazamiso ezingeyomfuneko.”

Ngoku, ekubeni uye wayibeka kuqala eyona nkcazelo ufuna ukuyifumana ngokweemfuno zakho, yenza okufanayo ngezinto onomdla kuzo, kuba umdla yeyona nto ikuqhubela ekubeni ufunde. Noko ke, ingxaki isekukhetheni phakathi kwezinto ezikubangela umdla ngokwenene nezinto ocinga ukuba zisenokukubangela umdla ukuze nje ukholise abanye—mhlawumbi abantu osebenza nabo. Kodwa ukuba unokuzicwangcisa izinto ozifundayo nezinto ozibukela kumabonwakude okanye ozibona kwikhompyutha kanye njengokuba ubuya kucwangcisa nawuphi na omnye umsebenzi, uya kufumanisa ukuba, ukuba oko ukwenza unomdla wokwenene kuya kukwenza wonwabe ngaphandle kokunxunguphala ngokungeyomfuneko.

Ngoko, unokuhlangabezana njani nokunxunguphaliswa yinkcazelo? Akunakuze ukutshayele ngokupheleleyo, kodwa ukulandela imigaqo embalwa nelula esiyandlalileyo kuya kukunceda kakhulu. Yenze lula, uze uyahlulahlule inkcazelo ngokweemfuno nezinto onomdla kuzo. Liseza ixesha laxa yonke indlela yokuphila enobucukubhede, kuquka ukunxunguphaliswa yinkcazelo, ziya kuba yinto yexesha elidluleyo, kodwa okwangoku, gcina izinto ezimangalisayo zobugcisa banamhlanje zikwindawo yazo. Zisebenzise njengendlela yokufikelela usukelo oluthile. Musa ukuba likhoboka lazo okanye uzoyike. Ngaloo ndlela, inkcazelo oyisebenzisayo iya kuba yeyakhayo, ikhuthaze ize ibe yingenelo, ngaphandle kokuba ikunxunguphalise.

[Ibhokisi ekwiphepha 21]

Zama Ukuncama Okuthile “Buncame obunye nje ubugocigoci bukamabonwakude, . . . ibe sebenzisa kwaloo [mali] nyanga nganye uthenge incwadi enye okanye ezingakumbi ezinik’ umdla. Iincwadi azifani nomabonwakude: Zithabatha ixesha, zinomtsalane, ziyakhuthaza, zivul’ ingqondo ibe zenza umntu abe lichule.”

“Kwakhona unokucinga ngokuzisikela iiyure ezithile zokubukela inkqubo yekhompyutha eyi-Internet veki nganye, okanye ubuncinane ulungelelanise ixesha olichitha utsala umnxeba nexesha elilingana nelo olichitha ufunda iincwadi.”—Data Smog—Surviving the Information Glut.

[Ibhokisi ekwiphepha 22]

Yiba Yinkosi, Kungekhona Ikhoboka

“Cima umabonwakude. Ayikho indlela ekhawulezayo yokuphinda ukwazi ukulawula isantya sobomi bakho, uxolo lwekhaya lakho nokuzinza kwendlela ocinga ngayo kunokucima isixhobo esiphazamisana nobomi bethu. Izigidi zabantu baseMerika ziye zafumanisa ukuba ukusebenzisa iqhosha lokucima kubangela inzolo ibe kufuna ukomelela, kungasathethwa ke ngeeyure ezininzi ezingenzi nto ngazo eziye zazifumana ukuze zenze izinto ezingazange zifumane thuba lokuzenza ngaphambili.”—Data Smog—Surviving the Information Glut.

[Ibhokisi ekwiphepha 22]

Yilumkele I-Internet

Abantu abaziphethe kakubi basebenzisa i-Internet ukuze baqhubele phambili isini esigqwethekileyo baze bazame ukuqhagamshelana namaqabane anomdla kuso okanye amaxhoba amsulwa. Abanye basebenzisa i-Internet ukuze bakhuthaze imicimbi yabo yobuqu. Nabawexuki benza iiWeb site ukuze babambise abo bangalumkanga kangako.

Kufanele kulunyukwe gqitha xa kusetyenziswa i-Internet, ibe ngokuqinisekileyo abazali babeke iliso kubo nabaphi na kubantwana babo abasenokuba bayayisebenzisa. Liyinyaniso elokuba zininzi gqitha izinto eziluncedo ezinokufunyanwa kuyo, njengeendawo zokuphanda, iindawo zokugcina iincwadi namajelo eendaba. Ngokomzekelo, kutshanje iWatchtower Society iye yavakalisa ukuba ineyayo iWeb site (http://www.watchtower.org), enenkcazelo echanileyo ngamaNgqina kaYehova. Sekunjalo, ubani umele aqonde ukuba kukho iimpembelelo eziyingozi kuyo, kuquka izinto ezingamanyala nowexuko.

AmaKristu afanele aphaphele esi siluleko sikaPawulos: “Oku, ke ngoko, ndikutsho kwaye ndinikela ubungqina kuko ndiseNkosini, ukuthi ningabi saqhubeka nihamba kanye njengokuhamba kweentlanga ngamampunge eengqondo zazo . . . Zingasaziva konke konke ngokokuziphatha, zizinikele kwihambo evakalala ukuze zisebenze ukungahlambuluki kwalo lonke uhlobo zibawa. Kodwa nina animfundanga enjalo uKristu.” (Efese 4:17-20) Kwakhona, “Uhenyuzo nokungahlambuluki kwalo lonke uhlobo okanye ukubawa makungakhe kukhankanywe kwaukukhankanywa phakathi kwenu, kanye njengoko kubafaneleyo abantu abangcwele; kwanehambo elihlazo nentetho yobudenge nokuqhula okungamanyala, zinto ezo ezingafanelekanga, kodwa kunoko mayibe kukubulela.” (Efese 5:3, 4) Simele sazi ukuba ezinye iiWeb site zenziwe ngabantu abaneenjongo zokuziphatha okubi okanye abanganyanisekanga. Ibe ezinye iisite ezisenokungabonisi ukuziphatha okubi okanye ukunganyaniseki, njengamaqela ancokolayo, ngeliphandle nje ziyinkcitha-xesha. Zinxweme kuzo zonke izinto ezinjalo!