Ukusisebenzisa Kakuhle Isixhobo Esidibanisa Ihlabathi I-Internet

UKUVELISWA, kobugcisa bokushicilela kwiinkulungwane ezadlulayo, kwayitshintsha indlela abantu abanxibelelana ngayo. Ukuveliswa kweInternet kutshanje kuye kwathelekiswa nobo bugcisa. Siyavakala isizathu sokuba kuthiwe isisixhobo sonxibelelwano esidibanisa ihlabathi lonke. Njengoko ugubhulula kulo vimba wenkcazelo, uyakwazi ukufumana izibakala, ubalo neengcamango ezingemiba eyahlukahlukeneyo.

Ukukwazi ukunxibelelana kusisipho esimangalisayo esisiphiwe nguMdali wethu. Kusinceda sabelane nabanye ngeengcamango nangenkcazelo ethile. UYehova wayengumntu wokuqala ukuthetha nabantu, enikela inkcazelo ecacileyo nengadidiyo yendlela umntu anokuba nenjongo ngayo ebomini. (Gen. 1:28-30) Noko ke, ngenxa yoko kwenzeka embalini yoluntu, abantu banokusisebenzisa kakubi isipho sokunxibelelana. USathana wanikela inkcazelo yobuxoki kuEva. UEva wakwamkela oko wakuthethayo waza wadlulisela loo nkcazelo kuAdam, naye owakhokelela uluntu kwintlekele.—Gen. 3:1-6; Roma 5:12.

Kuthekani ngeInternet? Nangona inokunikela inkcazelo exabisekileyo, yonge ixesha ize isincede, isenokusinika nenkcazelo ephosakeleyo, isityele ixesha ize yonakalise indlela esiziphatha ngayo. Makhe sihlolisise indlela esinokusisebenzisa kakuhle ngayo esi sixhobo.

Inkcazelo—Ngaba Inokuthenjwa Okanye Ibubuxoki?

Ungaze ucinge ukuba yonke inkcazelo efumaneka kwi-Internet ilungile okanye iluncedo. Iiweb site zeInternet zinokufaniswa neqela labantu abakha amakhowa badibanise neenkowane—ezinye ziyatyiwa kanti ezinye zinetyhefu—bafake yonke loo nto kwisitya esinye baze basinike ukuba sitye. Ngaba ubuya kusuka nje utye ungakhange uhlolisise? Ubungayi kukwenza oko! Iiweb site zeInternet zisebenzisa iikhompyutha eziliqela ukuze ziqokelele yonke nje inkcazelo enoba ilungile okanye iphosakele. Kufuneka sisebenzise ingqiqo ukuze sahlule ingqolowa kumququ, ukuze singazityhefi ngenkcazelo engafanelekanga.

Ngowe-1993, elinye iphephancwadi elidumileyo lalinomfanekiso wezinja ezimbini zihleli phambi kwekhompyutha. Enye inja ithi kwenye: “Kwi-Internet, akakho umntu owaziyo ukuba uyinja.” Kwakude kudala, uSathana wazifihla oko akuko, esebenzisa inyoka ukuze ancokole noEva waza wamxelela ukuba unokufana noThixo. Namhlanje, nabani na one-Internet unokuzenza ngathi uyazi, engadanga walichaza igama lakhe. Yaye akukho mithetho imiselweyo yokuba ngubani onokufaka iingcinga ezithile, inkcazelo, imifanekiso okanye amacebiso.

Musa ukufana noEva xa usebenzisa i-Internet. Ufanele uyilumkele uze uyiphicothe inkcazelo oyifumanayo. Ngaphambi kokuba uyithembe, zibuze: (1) Ibhalwe ngubani le nkcazelo? Unolwazi olungakanani lo mbhali? (2) Ibhalelwe ntoni le nkcazelo? Yintoni eshukumise umbhali wayo? Ngaba ubonakala ethatha icala elithile? (3) Umbhali uyithathe phi le nkcazelo? Ngaba uyachaza apho ayithathe khona? (4) Ngaba le nkcazelo isexesheni? Kwinkulungwane yokuqala, umpostile uPawulos wacebisa uTimoti ngezinto ezinokusetyenziswa nangabantu banamhlanje. UPawulos wabhala: “Kulondoloze oko ukuphathisiweyo, ukhwebuke kwiintetho ezililize ezihlambela oko kungcwele nakwiimpikiswano zoko kubizwa ngokuba ‘lulwazi’ kuxokwa.”—1 Tim. 6:20.

Ngaba Iyalonga Ixesha Okanye Iyalitya?

Ukuba isetyenziswa kakuhle, alithandabuzeki elokuba i-Internet inokulonga ixesha, amandla nemali. Sinokukhawuleza sithenge into singakhange siphume ekhaya. Ukuthelekisa amaxabiso kunokusinceda songe imali. Kuye kwaba lula ngabantu abaninzi ukusebenzisa ibhanki ngeInternet; imibandela yemali inokusingathwa ngoxa uhleli ekhaya. I-Internet yenza kube lula yaye kungabi ziindleko ezinkulu ukuceba uhambo lwakho yaye uyakwazi nokwenza amanye amalungiselelo olo hambo. Ngokulula singakwazi ukukhangela iinombolo zefowuni, iiadresi nendlela ezahlukahlukeneyo zokuya kuloo ndawo. Ehlabathini lonke, iiofisi zesebe lamaNgqina kaYehova zisebenzisa inkcazelo ekwi-Internet ukuze zonge ixesha, zibe nabasebenzi abambalwa zize zonge imali.

Noko ke, zikho nezinye iingozi zokusebenzisa i-Internet. Enye yazo lixesha esilichitha siyisebenzisa. Kwabanye, iye yaba yinto yokudlala kunokuba ibe luncedo. Bachitha ixesha elininzi bedlala, bethenga, bencokola, bethumela iie-mail, bekhangela inkcazelo ethile okanye bejonga nezinye izinto. Ekugqibeleni, basenokuqalisa ukungazinyamekeli izinto ezibalulekileyo eziquka intsapho, abahlobo nebandla. I-Internet inokude imenze ikhoboka umntu. Ngokomzekelo, enye ingxelo eyapapashwa ngowama-2010 iqikelela ukuba, i-18,4 ekhulwini yabantu abakwishumi elivisayo eKorea iye yaba ngamakhoboka eInternet. Abaphengululi baseJamani bathi “liye lisanda inani lamabhinqa akhalaza ngelokuba amadoda awo angamakhoboka ayo.” Elinye ibhinqa liye lakhalaza ngendlela umyeni walo aye watshintsha ngayo ngenxa yeInternet, kangangokuba oko kude kwaphelisa nomtshato wabo.

Iofisi yesebe yamaNgqina kaYehova ifumene ileta evela kumntu othi ulikhoboka leInternet. Ebekhe achithe iiyure ezilishumi ngosuku kuyo. Emva kokuchaza ukuba “ekuqaleni, wayengenazinjongo zimbi,” waleke umsundulo esithi: “Ekuhambeni kwexesha, ndandingasayi rhoqo ezintlanganisweni ndaza ndayeka nokuthandaza.” Wayengasazilungiseleli iintlanganiso kangangokuba wayesithi xa efika kuzo ibe ingqondo yakhe ibhadula icinga ekhaya, “kwi-Internet.” Okuvuyisayo kukuba, waqonda indlela enkulu ngayo le ngxaki, waza wazama ukuyilungisa. Ngamana singangaze sifikelele kwinqanaba lokuba ngamakhoboka eInternet.

Inkcazelo—Ngaba Ixabisekile Okanye Akunjalo?

Kweyoku-1 yabaseTesalonika 5:21, 22 sifunda oku: “Qinisekani ngezinto zonke; nibambelele nkqi koko kuhle. Khwebukani kulo lonke uhlobo lobungendawo.” Sifanele siqiniseke enoba inkcazelo esiyifumana kwi-Internet iyamkholisa uThixo, yaye iyavisisana kusini na nemilinganiselo yakhe ephakamileyo. Ifanele ingathandabuzeki ize iwafanele amaKristu. Imifanekiso engamanyala kwi-Internet yesamele, yaye ukuba asilumkanga, nathi sinokubambiseka kuloo mgibe.

Siya kuba senza ngobulumko xa sinokuzibuza, ‘Ngaba oko ndikubonayo ndinokukufihla kwiqabane, abazali okanye abazalwana bam xa benokungena kwigumbi endikulo?’ Ukuba kunjalo, kuya kuba kuhle ukuba siyisebenzise i-Internet kuphela xa nabanye bekho. Eneneni i-Internet iye yatshintsha indlela esinxibelelana ngayo nesithenga ngayo. Ngaphezu koko, iye yaveza indlela entsha ngokupheleleyo ‘yokukrexeza ezintliziyweni zethu.’—Mat. 5:27, 28.

Ngaba Ndifanele Ndiyidlulisele Okanye Ndingayidluliseli?

Ukusebenzisa i-Internet kuquka ukufumana inkcazelo ethile kwakunye nokuyidlulisela kwabanye. Nangona sinenkululeko yokufumana nokudlulisela inkcazelo, sikwanembopheleleko yokugqiba enoba iyinyaniso okanye icoceke kangakanani na. Ngaba singaqiniseka ukuba oko sikubhalela okanye esikuthumelela abanye kuchanile? Ngaba sinayo imvume yokudlulisela inkcazelo kwabanye?a Ngaba inokuba luncedo yaye iyakha? Ziyintoni iinjongo zokuyidlulisela? Ngaba senzela ukuba abanye basincome?

Xa isetyenziswa kakuhle, ie-mail inokuba luncedo. Kwakhona inokusinika inkcazelo eninzi. Ngaba sithwalisa abantu umthwalo omninzi ngokubaxelela iindaba zakutshanje, de sichithe ixesha labo? Ngaba asimele sihlolisise iinjongo zethu ngaphambi kokuba sithumele nantoni na? Yintoni ngokwenene esifuna ukuyifeza? Abantu babedla ngokubhala iileta ukuze babalisele iintsapho nabahlobo babo izinto, ukuze abanye bahlale bezazi izinto ezenzeka ebomini babo. Ngaba nathi asimele siyisebenzisele le njongo ie-mail? Kutheni sifanele sidlulisele inkcazelo ethile kwabanye xa singaqinisekanga ngobunyani bayo?

Ngoko ke, simele senze ntoni ngeInternet? Ngaba sifanele singayisebenzisi kwaphela? Kusenokuba yimfuneko oko kwezinye iimeko. Elaa khoboka leInternet likhankanywe ngaphambilana lenza kanye oko ukuze lilwe nalo mkhwa weminyaka emininzi. Kwelinye icala, i-Internet isenokusinceda, logama nje sivumela ‘amandla okucinga ukuba asilinde, nokuqonda kusilondoloze.’—IMize. 2:10, 11.

[Umbhalo osemazantsi]

[Umfanekiso okwiphepha 4]

Unokuyiphepha njani inkcazelo ebubuxoki?

[Umfanekiso okwiphepha 5]

Umele ucinge ngantoni ngaphambi kokuthumela i-“e-mail”?