Imbono YeBhayibhile
Ngaba Abalungiseleli AbangamaKristu Bafanele Babe Kwisifungo Sokungatshati?
XA SILICHAZA kakuhle, igama (lesiNgesi) elithi celibacy (isifungo sokungatshati) lithetha ukuhlala ungatshatanga. Noko ke, ngokutsho kweThe New Encyclopædia Britannica, eli binzana “lidla ngokusetyenziswa xa kuthethwa ngomsebenzi womntu ongatshatanga njengegosa lecawa, usomaqhuzu okanye umntu ozinikele nofele elunqulweni.” Ibinzana elithi “ukungatshati” lichaza “abo bahlala bengatshatanga ngenxa yesifungo sobungcwele okanye ngenxa yenkolelo yokuba loo mntu ufanele angatshati ngenxa yesikhundla anaso kunqulo okanye ngenxa yendlela azimisele ngayo kolo nqulo.”
Kaloku iinkonzo ezithile ezingootshotsh’ entla zakha zavela nento yokuba abalungiseleli bazo bafanele babe kwisifungo sokungatshati. Kodwa, ubuKatolika bazihlalisa phantsi ezinye iinkonzo zeNgqobhoko ngendlela obabusenza ngayo esi sifungo sokungatshati. Namhlanje, ziwa ngokuwa iintetho eziphathelele isifungo sokungatshati samaKatolika. IThe Wilson Quarterly yathi “hlolisiso ngalunye oluye lwenziwa kumashumi eminyaka akutshanje luye lwafumanisa ukuba ukunyanzeliswa kwesifungo sokungatshati, nto leyo engummiselo kubefundisi abangamaKatolika ukususela kwinkulungwane ye-12, yeyona nto iza kuyiboph’ izandla neenyawo icawa xa kufuneka iqeshe ize igcine abefundisi.” Ngokutsho kwesazi ngezentlalo uRichard A. Schoenherr, “izibakala ezivakalayo zembali neenguqulelo kwezentlalo azivumelani nento yokuba umntu ukuze abe ngumfundisi womKatolika ufanele ahlale engatshatanga.” Phofu ithini imbono yeBhayibhile ngesifungo sokungatshati?
Atshate Okanye Angatshati?
Ukutyhubela imbali inkungu nelanga yamadoda namabhinqa, akwiinkonzo ezininzi ezahlukeneyo nazinikele nofele kuzo, aye akhetha ukuhlala engatshatanga. Ngoba? Ubukhulu becala kwakungenxa yokuba ayekholelwa kwelokuba izinto zokwenyama neziphathekayo “zisisihlalo sobubi.” Oku kuye kwakhwezela intanda-bulumko yokuba ekuphela kwendlela umntu anokucoceka ngayo ngokomoya kukungabi nazintlobano zesini. Noko ke, ayikho loo nto eBhayibhileni. IBhayibhile, iwugqala umtshato njengesipho esicocekileyo nesingcwele esivela kuThixo. Ingxelo engendalo ekwiGenesis iwuchaza kakuhle umtshato ‘njengolungileyo’ emehlweni kaThixo ibe nangayiphi na indlela awungomqobo phambi kolwalamano noThixo olucocekileyo ngokomoya.—Genesis 1:26-28, 31; 2:18, 22-24; kwakhona bona IMizekeliso 5:15-19.
Umpostile uPetros nabanye abakhonzi bakaThixo abakholekileyo ababenegunya kwibandla lokuqala lamaKristu babengamadoda atshatileyo. (Mateyu 8:14; IZenzo 18:2; 21:8, 9; 1 Korinte 9:5) Umyalelo kampostile uPawulos kuTimoti ngokuphathelele ukumiselwa kwabaveleli bebandla, okanye “oobhishopu” ukwenza kucace nakuthathatha oku. Uthi xa ebhala: “Ubhishopu ufanele angabi nasiphako, eyindoda yomfazi omnye.” (Akekeliswe sithi; 1 Timoti 3:2, Revised Standard Version, Uhlelo LwamaKatolika) Phawula ukuba akukho ndawo ithi ukutshata ‘kukabhishopu’ kwakulinyala. UPawulos wathi “ubhishopu” akafanele abe nesithembu; ukuba utshatile, ufanele abe nomfazi omnye kuphela. Phofu, iCyclopedia of Biblical, Theological, and Ecclesiastical Literature, ebhalwe nguMcClintock noStrong, ifikelela kwesi sigqibo: “Akukho ndinyana kwi[Testamente Entsha] ekunokuthiwa yalela ukutshata kwabefundisi njengoko bekwinkqubo yokubhedesha iVangeli.”
Ngoxa iwugqala uxabisekile umtshato, ngokuqinisekileyo iBhayibhile ayikugatyi ukungatshati ukuba kukhethwa ngokuzithandela. IBhayibhile iyakuncomela njengento enokukhethwa ngabanye. (1 Korinte 7:7, 8) UYesu Kristu wayithi thsuphe into yokuba amanye amadoda namabhinqa ayeya kukhetha ukungatshati. (Mateyu 19:12) Ngoba? Ayengayi kwenza oko ngenxa yokuba kwakukho ukungacoceki okuthile emtshatweni okwakuza kuphazamisana nenkqubela yawo yokomoya. Akhetha ukwenjenjalo ngenxa yokuba efuna ukunikela ingqalelo ekwenzeni ukuthanda kukaThixo njengoko evakalelwa kukuba ixesha lixhatshwe yinja.
Isizekabani Sokunyanzeliswa Kwesifungo Sokungatshati
Noko ke, izinto zatshintsha kwiinkulungwane ezalandela ubukho bukaKristu. Kwiinkulungwane ezintathu zokuqala zeXesha lethu Eliqhelekileyo, “kwakukho abalungiseleli abatshatileyo nabangatshatanga,” utsho njalo uDavid Rice, umlandeli kaDominic, owashiya ubufundisi waya kutshata. Emva koko, abo babesithi bangamaKristu baqalisa ukuthofiyelwa koko omnye umbhali awathi “kukuxutywa kobuGrike neengcamango ezingokwebhayibhile” nto leyo eyakhupha imbono egqwethekileyo ngesini nomtshato.
Kakade ke, abanye babehlala bengatshatanga “ukuze babe nenkululeko epheleleyo [yokuzinikela] ekwenzeni umsebenzi wobukumkani bukaThixo.” Noko ke, abanye babethiwe nkxi ziintanda-bulumko zobuhedeni ababezifundile. IThe New Encyclopædia Britannica ithi: “Inkolelo yokuba iintlobano zesini ziyangcolisa yaye ziyangqubana nokuba ngcwele yavela [kwicawa ekuthiwa yeyamaKristu] njengentsika yesifungo sokungatshati.”
URice uthi kwinkulungwane yesine, icawa “yayimalela umfundisi otshatileyo ukuba abe neentlobano zesini ngobusuku obungaphambi kokubhiyozelwa kweDini leMisa.” Xa icawa yaqalisa ukulenza mihla le iDini leMisa, loo nto yathetha ukuba abefundisi kwakuza kufuneka balibale ngeentlobano zesini. Ekuhambeni kwexesha, kwathiwa mayiphele into yokutshata kwabefundisi. Loo nto yabangela ukuba nabani na owayeza kuba ngumlungiseleli ecaweni abe phantsi kwesifungo sokungatshati ethand’ engathandi.
Umpostile uPawulos walumkisa ngaloo nto. Wabhala wathi: “UMoya wenze kwacaca ukuba ebudeni bamaxesha okugqibela abanye baya kululahla ukholo baze bakhethe ukuphulaphula imimoya elahlekisayo neemfundiso ezivela kwiidemon . . . Baya kuthi akuvumelekanga ukutshata.”—1 Timoti 4:1, 3, Jerusalem Bible.
UYesu Kristu wathi: “Ubulumko bungqineka bububulungisa ngemisebenzi yabo.” (Mateyu 11:19) Ubudenge bokuphambuka kwimilinganiselo kaThixo buye badula ngemisebenzi okanye imiphumo yabo. Umbhali uDavid Rice ukhe wadlan’ indlebe nabefundisi abaninzi ehlabathini lonke ngombandela wokunyanzeliswa kwesifungo sokungatshati. Abanye athethe nabo bathe: “Uba ngumfundisi, ube luncedo kangangoko unako, uze kwangaxeshanye uzivumele ukuba ube sesilingweni sokuhendwa ngabafazi abazinikeleyo nabafuna ukuba neentlobano zesini.”
Ecaphula uMateyu 7:20, uRice uthi: “‘Niya kubabona ngeziqhamo zabo,’ watsho uYesu.” Emva koko uhlomla ngentlekele eye yabangelwa kukunyanzeliswa kwesifungo sokungatshati: “Ukunyanzeliswa kwesifungo sokungatshati kuphumele ekubeni kubekho amawaka amadoda aphila ubomi obumbaxa, ukuphalala kwamawaka amabhinqa, amawaka abantwana alahliweyo ngootata babo abangabefundisi, singasathethi ke ngabefundisi abasala beneentliziyo ezilihlwili.”
Umtshato obekekileyo usisipho esivela kuThixo. Ukunyanzeliswa kwesifungo sokungatshati kuye kwaba yingozi ngokomoya. Kwelinye icala, ukukhetha ngokuzithandela ukuhlala ungatshatanga, nangona kungeyiyo eyona nto enokumenza umntu abe ngcwele okanye asindiswe, kuye kwangqineka kunomvuzo yaye kubanika ulwaneliseko lokomoya abanye abantu.—Mateyu 19:12.
[Inkcazelo Ngomfanekiso okwiphepha 28]
Life