IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g98 8/8 iphe. 19
  • Ukungcungcuthekiswa Luloyiko Olugqithiseleyo

No video available for this selection.

Sorry, there was an error loading the video.

  • Ukungcungcuthekiswa Luloyiko Olugqithiseleyo
  • Vukani!—1998
  • Amanqaku Afanayo
  • Ukulawula Ukoyika Abantu Ngokugqithiseleyo
    Vukani!—1998
  • Indlela Yokunceda Abanengxaki Yokuxhalaba
    Vukani!—2012
  • Xa Kubonakala Ngathi Wonk’ Umntu Ujonge Wena
    Vukani!—1998
  • Liphoseni KuYehova Lonke Ixhala Lenu
    IMboniselo Evakalisa UBukumkani BukaYehova (Efundwayo)—2016
Khangela Okunye
Vukani!—1998
g98 8/8 iphe. 19

Ukungcungcuthekiswa Luloyiko Olugqithiseleyo

“Ngokufuthi uloyiko olugqithiseleyo luye lwaba yinto yokuhlekisa. Kodwa ngokuqinisekileyo asiyonto ‘yokuhlekisa.’”—UJerilyn Ross, umalathisi weziko lokunyanga izigulo ezibangelwa lixhala

IGAMA elithi “uloyiko olugqithiseleyo” libhekisela kuloyiko olukhulu, ukoyika into ethile, isiganeko okanye iimvakalelo ezithile ngokungekho ngqiqweni. Kodwa ingcaciso iyodwa ayinakulucacisa uloyiko nobulolo obubangelwe yile meko. URaeann Dumont, oye wanyanga abantu abanoloyiko olugqithiseleyo ngaphezu kwamashumi amabini eminyaka, uthi: “Abantu abanoloyiko olugqithiseleyo basenokuphepha iimeko ezininzi bade bazibophelele ngokuhlala endlwini, okanye basenokuphila benexhala elingapheliyo ngalo lonke ixesha, okanye basenokuphelisa ixhala labo ngotywala, nto leyo enokubangela iingxaki ezongezelelekileyo.”

Uloyiko olugqithiseleyo lubalwa phakathi kweqela lezigulo ezibangelwa lixhala.a Kuqikelelwa ukuba i-12 ekhulwini labantu abadala eUnited States baya kuhlangabezana noloyiko olugqithiseleyo ebudeni bobomi babo. Uninzi lwaba baya kukugcina ngaphakathi oku kangangeminyaka. IAnxiety Disorders Association of America ithi: “Ngelishwa, abantu abamalunga nabathathu kwabane abanoloyiko olugqhithiseleyo abaze bafumane uncedo. Uninzi lwabantu abanoloyiko olugqithiseleyo bayonqena ukufuna uncedo ngenxa yokuphoxeka. Abanye abayiqondi into abanayo okanye abazi apho bangafumana khona uncedo, yaye abanye boyika nonyango ngokwalo.”

Zininzi gqitha izinto ezibangela uloyiko olugqithiseleyo, kodwa iingcali ngokuqhelekileyo zizidwelisa zibe ziindidi ezintathu. Uloyiko olugqithiseleyo lwezinto eziqhelekileyo olubangelwa yinto okanye yimeko ethile, enjengezinambuzane, izilwanyana, ukukhwela inqwelo-moya kwanokuba kwiindawo ezivalekileyo. Ngokuqhelekileyo ukoyika indawo ethile ngokugqithiseleyo kwenzeka xa ubani ehlaselwe lixhala. Lowo unale ngxaki woyika ukuba ahlaselwe lixhala kangangokuba uyaziphepha zonke iindawo kwaneemeko aye woyika kuzo. Ukoyika abantu ngokugqithiseleyo kubangelwa kukoyika ukuphoxeka kwindawo enabantu abaninzi, njengokuthetha phambi kwabantu.

Khawucinge nje ngenye yezi ntlobo zintathu—ukoyika abantu ngokugqithiseleyo. IThe Washingtonian ithi: “Kwanokuba uzidibanisa zonke iindidi eziqhelekileyo zoloyiko olugqithiseleyo, njengokoyika iinyoka okanye ukukhwela inqwelo-moya, azifiki nokufika kwiindlela ukoyika abantu ngokugqithiseleyo okubangela inkxwaleko ngayo.” Ngaba oku kuyinyaniso ngokwenene? Ukuba kunjalo, ngoba? Makhe sibone.

[Umbhalo osemazantsi]

a Ezinye izigulo ezibangelwa lixhala ziquka isigulo sokuphakuzela, isigulo sokukhotyokiswa yinto ethile, isigulo sasemva kwentlekele kwanesigulo esiqhelekileyo esibangelwa lixhala. Ukuze ufumane inkcazelo engakumbi, bona uVukani! (wesiNgesi) kaFebruwari 8, 1996, “Ukukhotyokiswa Yinto Ethile—Ngaba Kulawula Ubomi Bakho?” nelikaJuni 8, 1996, “Ukuhlangabezana Nokuhlaselwa Lixhala.”

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share