Xa Ubani Ephinda Esiba Nethemba Nothando
ABAZALI, abafundisi-ntsapho nabanye abanento yokwenza nabakwishumi elivisayo bayaqonda ukuba bona, ulutsha okanye omnye umntu akanako ukuguqula ihlabathi. Kukho iimpembelelo emsebenzini ezinjengamaza olwandle, ekungekho namnye onokuzithintela. Sekunjalo, kuninzi esinokukwenza xa sisonke ukuze sifak’ isandla ekubeni ulutsha lonwabe, lube sempilweni ngakumbi luze lulungelelane.
Ekubeni kulunge ngakumbi ukuyithintela into kunokuyinyanga, abazali bafanele bacingisise nzulu ngendlela ubomi babo nezinto eziza kuqala ebomini ezisenokusibumba ngayo isimo sengqondo nendlela yokuziphatha kwabantwana babo. Ukubonakalisa uthando nenyameko ekhaya kunokubenza bazive benqabisekile nto leyo enokuthintela ukuzibulala. Eyona nto oluyifuna ngamandla ulutsha kukufumana umntu onokuluphulaphula. Ukuba abazali abaphulaphuli, mhlawumbi abantu abangafanelekanga baya kuphulaphula.
Oko kuthetha ntoni kubazali namhlanje? Chitha ixesha nabantwana bakho ngoxa belifuna—xa beselula. Kwiintsapho ezininzi oku akulula. Zitsala nzima zifuna indlela yokuphila, kangangokuba bobabini kufuneka basebenze enoba abathandi. Abo bakulungeleyo nabakwaziyo ukuzincama ukuze babe nexesha elingakumbi nabantwana babo ngokufuthi baye bavuna umvuzo wokubona oonyana neentombi zabo ziphumelela ngakumbi ebomini. Noko ke, njengokuba kukhankanywe ngaphambilana, maxa wambi phezu kwawo nje wonke umgudu abazali abawenzileyo, kusenokuvela iingxaki ezinzulu kubantwana babo.
Abahlobo Nabanye Abantu Abakhulu Basenokunceda
Ngenxa yeemfazwe, ukudlwengulwa nokuxhatshazwa kolutsha kufuneka umgudu ongakumbi kubantu abadala ababakhathalele ngokwenene ukuthintela oku kungenzeki. Ulutsha oluye lwajamelana neemeko ezinzima ngolu hlobo lusenokungasabeli kakuhle kwimigudu yokulunceda. Kusenokuthetha ukuchitha ixesha labo elininzi kwenziwe nomgudu ongamandla. Ngokuqinisekileyo akuyi kuba kukubonakalisa ubulumko okanye uthando ukubajongela phantsi okanye ubatyeshele. Ngaba sinokubonakalisa imfesane engakumbi size senze umgudu wokubonisa ububele nothando ukuze sifikelele abo basengozini?
Asingobazali kuphela kodwa abahlobo nabantakwabo bafanele bahlale bekuphaphele ukubabona xa abaselula bengonwabanga yaye bengazinzanga ngokweemvakalelo. (Bona ibhokisi ethi “Kufuneka Uncedo Olufanelekileyo,” kwiphepha 8.) Ukuba ubona iimpawu ezithile, khawuleza uphulaphule. Ukuba kunokwenzeka, zama ukulenza luthethe ulutsha olunengxaki ngokulubuza ngobubele ukuze luqiniseke ngobuhlobo bakho bokwenene. Abahlobo nezalamane ezithenjwayo zisenokukwazi ukuxhasa abazali ekuhlangabezaneni neemeko ezinzima; kodwa, bafanele kananjalo balumkele ukuthabathela kubo indima yabazali. Ngokufuthi utyekelo lokuzibulala kolutsha luyindlela eqatha yokufuna ingqalelo—ingqalelo yabazali.
Esinye sesipho silungileyo nabani na anokusinika ulutsha lithemba eliqinileyo ngekamva elonwabisayo, injongo yokuphila. Ulutsha oluninzi luye lwabuqonda ubunyaniso bamadinga eBhayibhile enkqubo yehlabathi elibhetele elizayo kungekudala.
Abo Bahlangulwa Beza Kuzibulala
EJapan, ibhinqa eliselula ngokufuthi elalizama ukuzibulala lithi: “Kukangaphi ndizama ukukufeza oku. Xa ndandisemncinane, ndaxhatshazwa ngokwesini ngumntu endandimthembile. . . . Kwixesha elidlulileyo, ndiye ndabhala iileta ezininzi endingenakuzibala ndisithi ‘Ndiyazibulala.’ Ndiye ndaba ngomnye wamaNgqina kaYehova, yaye ngoku ndikhonza njengomvangeli wexesha elizeleyo, kodwa ngamanye amaxesha loo nto isandifikela. . . . Kodwa uYehova uye wandivumela ukuba ndiphile, yaye ibangathi uyandisebezela esithi, ‘Qhubeka uphila.’”
Intombazana eneminyaka eli-15 ubudala eRashiya icacisa isithi: “Xa ndandineminyaka esibhozo ubudala, ndaqalisa ukuvakalelwa ngokungathi akukho mntu undifunayo. Abazali bam babengenalo ixesha lokuncokola nam, yaye ndazama ukucombulula iingxaki zam ngokwam. Ndaba yinkom’ edla yodwa. Ndandixabana rhoqo nezalamane zam. Ngoko ndacinga ngokuzibulala. Hayi indlela endavuya ngayo xa ndadibana namaNgqina kaYehova!”
Yaye eOstreliya sifumana la mazwi akhuthazayo avela kuCathy, ngoku okwiminyaka yakhe yama-30 ubudala, abonisa ukuba ukuphelelwa lithemba ngokwenene kusenokuguqukela kwithemba: “Rhoqo ndandiphupha ngeendlela ezahlukeneyo zokuphelisa ubomi bam yaye ekugqibeleni ndazama ukuzibulala. Ndandifuna ukuhamba kweli hlabathi, elizaliswe yintlungu, ingqumbo nelingenanjongo. Udandatheko lwenza kwaba nzima ukuphuma ‘kwingxingo’ endandiziva ndivaleleke kuyo. Ngoko, ukuzibulala kwakubonakala kusisicombululo ngelo xesha.
“Xa ndeva okokuqala ukuba kunokwenzeka ukuba umhlaba ube yiparadesi, apho bonke baya kuphila ubomi obuseluxolweni novuyo, eneneni ndanqwena ukunga ndingalapho. Kodwa kwakukhangeleka kuyinto engenakwenzeka. Noko ke, ngokuthe ngcembe ndaqalisa ukuqonda imbono kaYehova ngobomi nendlela esixabiseke ngayo thina ngabanye emehlweni akhe. Ndaqalisa ukuqiniseka kwelokuba kukho ithemba ngekamva. Ekugqibeleni, ndafumana indlela yokuphuma kuloo ‘ngxingo’ endandikuyo. Noko ke, akuzange kube lula ukuphuma kuyo. Ngamanye amaxesha ndandisonganyelwa ludandatheko ndize ndizive ndidideke kakhulu. Sekunjalo, ukwenza uYehova uThixo igwiba lam kwandenza ndasondelelana naye kakhulu yaye ndaziva ndinqabisekile. Ndimbulela uYehova ngako konke andenzele kona.”
Akusayi Kubakho Lutsha Lufayo
Ngokufundisisa iBhayibhile, oselula usenokuqonda ukuba kukho into ebhetele anokukhangela phambili kuyo—oko umKristu ongumpostile uPawulos akubiza ngokuthi “ubomi benene.” Waluleka umfana oselula uTimoti esithi: “Nika imiyalelo kwabo bazizityebi . . . babeke ithemba labo, kungekhona kubutyebi obungaqinisekanga, kodwa kuThixo, osinika zonke izinto ngokobutyebi ukuze siyoliswe; basebenze okulungileyo, batyebe emisebenzini emihle, . . . beziqwebela ngokukhuselekileyo isiseko esihle sekamva, ukuze babubambe ngokuqinileyo ubomi benene.”—1 Timoti 6:17-19.
Ngenxa yoko, isiluleko sikaPawulos sithetha ukuba sifanele sizibandakanye nabanye abantu, sibancede babe nethemba eliqinileyo ngekamva. “Ubomi benene” bobo uYehova abuthembise kwihlabathi lakhe elitsha ‘lamazulu amatsha nomhlaba omtsha.’—2 Petros 3:13.
Ulutsha oluninzi ngaphambili olwalusengozini luye lwaqonda ukuba ukusebenzisa kakubi iziyobisi kwanobomi bokuziphatha okubi kuphela nje yindlela ende esa ekufeni, apho ukuzibulala kuyindlela emfutshane. Luye lwaqonda ukuba eli hlabathi, neemfazwe zalo, intiyo, ukuxhatshazwa nokungabi naluthando, kungekudala ziya kuphela. Luye lwafunda ukuba le nkqubo yehlabathi ayinakuhlangulwa. Luye lwakholelwa ngokwenene ukuba uBukumkani bukaThixo kuphela kwelona themba lokwenene, kuba buya kukhokelela kwihlabathi elitsha apho kungekuphela nje ulutsha kodwa lonke uluntu oluthobelayoaluyi kufa—ewe, aluyi kufuna ukufa kwakhona.—ISityhilelo 21:1-4.