Ukunganqabiseki—Ingxaki Egqibe Lonke Ihlabathi
NGABA akukhe maxa wambi kube ngathi ubomi bakho nendlela ophila ngayo iphakathi kwenyama nozipho okanye ingamacimi-cimi? Asinguwe wedwa ocinga ngolo hlobo. Izigidi zabantu zicinga ngendlela efanayo. Kungakhathaliseki ilizwe, unqulo, okanye uhlobo lwabantu, ukunganqabiseki kubhula nje phambi konyawo kanye oku kwesifo, kubetha kosele abantu kuqale eMoscow kuye kuqhina ngeManhattan.
Kaloku esinye isichazi-magama sakha sathi xa ubomi bethu bunganqabisekanga, “siyagubha luloyiko kuze kungcangcazel’ iingwatyu lixhala.” Kaloku ixhala eli ngumgomagomane aph’ othe zinzi phezu kwethu uze usishiye sixinezelekile, nto leyo eyaphula impilo yethu. Kodwa ixhala eli nokunganqabiseki zibangelwa yintoni kanye kanye?
Amaxhala EYurophu
KwiEuropean Union (EU), umntu om-1 kwaba-6 uleliya libas’ amalongwe ihlwempu, abantu abali-18 lezigidi abaphangeli ibe enye inkungu nelanga ibamb’ amazinyo isoyikela ukuphulukana nemisebenzi yayo. Kumazwe amaninzi e-EU, abazali behleli nje basexhaleni ngenxa yokuba abantwana babo basesichengeni sokuxhatshazwa ngokwesini. Kwilizwe nje elinye le-EU, kubantu aba-2 kwaba-3 izibilini ziphezulu ngenxa yokuba sesichengeni solwaphulo-mthetho. Abanye abantu abakwi-EU bayagungqa ngenxa yokonakaliswa kwezinto zabo, ubugrogrisi nongcoliso.
Asingala magingxi-gingxi kwezentlalo nje kuphela abangela ubomi nempilo bube sengozini kodwa neentlekele ezingokwemvelo zinegalelo. Ngokomzekelo, ngowe-1997 nowe-1998, izandyondyo zemvula, iimpuphuma zodaka neenkanyamba zazibetha zazidlakazelisa iindawo ezithile zaseUnited States. Ngowe-1997, izichotho zavukuza uMbindi Yurophu xa zayibetha yamumatha yada yatyekeza imilambo iOder neNeisse. Iphephancwadi lasePoland eliphuma veki zonke iPolityka, lithi eso sichotho sagubungela udwadwane lwemihlaba yokulima kwakunye nezixeko ezingama-86, iidolophu needolophana ezingama-900. Iintsapho ezimalunga nama-50 000 zalahlekelwa zizityalo zazo kwaza kwasala kuqham’ itshoba kubantu abamalunga nama-50. Kanti ebutsheni balo we-1998 iimpuphuma zodaka zibulale inyambalala yabantu kumazantsi eItali.
Umbandela Wokunqabiseka Komntu Ngamnye
Ngaba akukho siqinisekiso sokuba ubomi bukhuseleke ngakumbi kunokuba babunjalo kwiminyaka elishumi eyadlulayo? Ngaba ukuphela kweMfazwe Yomlomo akuzange kuphungule imikhosi exhobe yaf’ amacala? Ewe, kusenokwenzeka ukuba unqabiseko lwamazwe luphucukile. Noko ke, unqabiseko lomntu ngamnye luxhomekeke kwinto ekuyiyo ekhaya nasesitratweni. Ukuba siphulukana nemisebenzi yethu okanye sirhanela ukuba ukho lo mphangi okanye umntu oxhaphaza abantwana ngokwesini ukhangela ikroba lokungena, ngoko enoba zingaphi izixhobo ezitshitshiswayo sihlala sisexhaleni size sizive singakhuselekanga.
Noko ke, abanye abantu bahlangabezana njani ke nala majingi-qhiwu obomi? Eny’ into ede yabaluleka nangakumbi, ngaba ikho indlela yokwenza wonke umntu—kuquka nawe—akhuseleke ngokusisigxina? Ezi ngongoma ziza kukhe zishukuxwe kumanqaku amabini alandelayo.
[Inkcazelo Ngomfanekiso okwiphepha 3]
UN PHOTO 186705/J. Isaac
[Inkcazelo Ngomfanekiso okwiphepha 3]
FAO photo/B. Imevbore