Imbono YeBhayibhile

Ukubaluleka Kokuba Wedwa

NGESINYE isihlandlo uYesu “wenyuka waya entabeni yedwa ukuze athandaze. Nakuba kwakungokuhlwa, wayelapho yedwa.” (Mateyu 14:23) Ngesinye isihlandlo “xa kwathi kwaba semini, waphuma waza waqhubeka esiya kwindawo engasese.” (Luka 4:42) Ezi zibhalo zisibonisa ukuba uYesu Kristu wayewafuna yaye ewaxabisa amathuba okuba yedwa.

IBhayibhile isinika eminye imizekelo yamadoda, njengoYesu, awayekuxabisa ukuba odwa. Wayeyedwa kumlindo wasebusuku xa umdumisi wayecamngca ngobungangamsha boMdali wakhe Ozukileyo. Yaye kwimeko kaYesu Kristu, kanye emva kokuba eve udaba lokufa kukaYohane uMbhaptizi, wemka “waya kwindawo engasese ukuze abe yedwa.”—Mateyu 14:13; INdumiso 63:6.

Namhlanje, ngenxa yengxolo nentswahla kubomi bezi mini, ukuba wedwa, nokuba kungenxa yokunyanzelwa ziimeko okanye ngokuzithandela, akubalulekanga kangako. Ngaba usakhumbula ukuba wagqibela nini ukuchitha ixesha uwedwa? Elinye ibhinqa eliselula nelitshatileyo lathi: “Andizange ndibe ndedwa ebomini bam.”

Kodwa ngaba ukuba wedwa kuyimfuneko ngokwenene? Ukuba kunjalo, anokusetyenziswa njani amaxesha azolileyo abe yingenelo aze avuze? Yaye ukulungelelana kunokuba luncedo njani xa ufuna ithuba lokuba wedwa?

Ukuba Wedwa—Kubaluleke Ngantoni?

IBhayibhile isixelela ukuba indoda yakudala yakwaThixo, uIsake, yazama ithuba lokuba yodwa “entsimini, xa kuhlwayo.” Kwakutheni? “Yaya kucamngca,” itsho njalo. (Genesis 24:63) Ngokwesichazi-magama, ukucamngca “kukucinga ngento unikele ingqalelo epheleleyo kuyo okanye uzikise kuyo uzolile.” “Kuthetha ukunikela ingqalelo ngokunzulu ixesha elithile.” KuIsake, owayesele eza kusingatha iimbopheleleko ezinzima, ukucamngca okunjalo engaphazanyiswa kwakuya kumenza akwazi ukucinga kakuhle, alungelelanise iingcinga zakhe, yaye aphonononge izinto eziza kuqala.

Ingcali ngokusebenza kwengqondo icacisa ukuba logama nje ‘ukuba wedwa kusalawuleka, ukungabikho kwabanye kusenza sikwazi ukulungelelanisa iingcinga zethu, sinikele ingqalelo kakuhle.’ Abaninzi baya kukungqina ukuba oku kunokuhlaziya, komeleze yaye kukwenze ube sempilweni.

Phakathi kweenzuzo ezinqwenelekayo zokucamngca kukucinga nzulu uzolile, iimpawu ezikunceda uthethe uze wenze izinto ngobulumko, nto leyo ephumela kunxulumano oluhle nabantu. Ngokomzekelo, umntu ofunda ukucamngca unokufunda nexesha amele athi cwaka ngalo. Kunokuthetha ngokungxama, uqala acinge ngemiphumo yamazwi akhe. “Uyayibona indoda engxamileyo ngamazwi ayo?” ubuza atsho umbhali weBhayibhile ophefumlelweyo. Uhlabela mgama aze athi: “Kukho ithemba ngesinyabi kunayo.” (IMizekeliso 29:20) Kungathintelwa njani ukusetyenziswa kolwimi ngokungenangqiqo ngolo hlobo? IBhayibhile ithi: “Intliziyo yelungisa iya kucamanga ukuphendula.”—IMizekeliso 15:28; thelekisa INdumiso 49:3.

KumaKristu, ukucamngca ngokuzolileyo uwedwa yinto ebalulekileyo ukuze ukhule ngokomoya. Afanelekile amazwi ompostile uPawulos athi: “Ziphonononge ezi zinto; wendele kuzo, ukuze uhambelo-phambili lwakho lubonakaliswe kubantu bonke.”—1 Timoti 4:15.

Sebenzisa Ithuba Lokuba Wedwa Ukuze Usondele Ngakumbi KuThixo

Omnye umbhali oliNgesi wathi: “Ukuba wedwa lithuba lokunxibelelana noThixo.” Maxa wambi, uYesu wayekubona kuyimfuneko ukushiya abahlobo bakhe aze anxibelelane noThixo eyedwa. Omnye umzekelo woku uchazwa eBhayibhileni ngokuthi: “Kwathi ngonyezi, ngoxa kwakusemnyama, wavuka waphuma phandle waza wemka waya kwindawo engasese, ibe apho waqalisa ukuthandaza.”—Marko 1:35.

KwiiNdumiso, kuthethwa ngokuphindaphindiweyo ngokucamngca ngoThixo. Ethetha noYehova, uKumkani uDavide wathi: “Ndicamngca ngawe.” Kwimeko efanayo amazwi ka-Asafu athi: “[Ndicamngca, NW] ngako konke ukusebenza kwakho, ndithelekelele ngezenzo zakho zonke ezincamisayo.” (INdumiso 63:6, NW; 77:12, akekeliswe sithi.) Ngaloo ndlela, ukucingisisa ngeempawu neenkqubano zikaThixo kunomvuzo omkhulu. Oku kukhulisa uxabiso ngoThixo, kwenze ubani asondele ngakumbi kuye.—Yakobi 4:8.

Kufuneka Ulungelelwano

Kakade ke, ubani akafanele asoloko eyedwa ngaphezu komlinganiselo. Ukuba wedwa kunokuchazwa njengendawo ekuyinzuzo ukuyityelela kodwa ekuyingozi ukuhlala kuyo. Ukuzinxwema ngokugqithiseleyo kukabani kuchasene neemfuno ezisisiseko zomntu ukunxulumana, ukunxibelelana nokubonakalisa uthando. Ukongezelela, ukuzinxwema kunokufaniswa nomhlaba apho kukhula khona ukhula olonakalisayo lobuyatha nokuzingca. Umzekeliso weBhayibhile uyalumkisa: “Ozahlulayo ufuna umnqweno wakhe; into yonke ezimasayo uyayivungamela.” (IMizekeliso 18:1) Ukuze sibe ngabalungeleleneyo xa sifuna ukuba sedwa, kufuneka siziqonde iingozi zokuzinxwema.

NjengoYesu namanye amadoda okomoya amaxesha okubhalwa kweBhayibhile, namhlanje amaKristu ayawaxabisa amathuba okuba wodwa. Yinyaniso ukuba, xa uneembopheleleko ezininzi nezinto ezikuxhalabisayo, kunokuba lucelomngeni ukufumana ixesha nethuba lokucamngca uwedwa. Sekunjalo, njengokuba kunjalo kuzo zonke izinto ezixabiseke ngokwenene, sifanele ‘sizithengele ixesha elifanelekileyo.’ (Efese 5:15, 16) Siya kwandula ke, njengomdumisi, sikwazi ukuthi: “Makakholeke amazwi omlomo wam, nezicamango zentliziyo yam, phambi kwakho, Yehova, liwa lam, mkhululi wam.”—INdumiso 19:14.