Ubulolo Ukwazi Unobangela
UKUBA lilolo akufani nokuba ukhe ube wedwa. Kunoko, ngokutsho kwesinye isichazi-magama ubulolo “kukusoloko uwedwa kodwa kwangaxeshanye ukulangazelela ukuba phakathi kwabantu.” Kwaesi sichazi-magama sibonisa ukuba, ukuba wedwa kunokubhekisela “kumntu okhetha . . .ukungabi kunye nabantu.”
Ngoko ngamanye amaxesha umntu usenokufuna ukukhe abe yedwa. Abantu abaninzi bakwenza oko kuba befuna ukuthandaza okanye ukucamngca, njengokuba uYesu Kristu wenjenjalo. (Mateyu 14:13; Luka 4:42; 5:16; 6:12) Kwelinye icala, kuba buhlungu xa ulilolo. Yintoni enokukwenza uzive ulilolo?
● Ukunganxibelelani Nabantu Kwizixeko Eziphithizelayo
Kwizixeko ezikhulu amawakawaka—kanti nezigidi zabantu—ahlala kwiindawo ezisondeleleneyo. Sekunjalo iyamangalisa into yokuba ezi ndawo zixinene ngolo hlobo zizaliswe ngabantu abangamalolo. Ukuxakeka kobomi basedolophini kunokuthintela abantu abaninzi ekubeni bazi abamelwane babo. Ngenxa yoko, abantu abahlala esixekweni bahlala nabantu abangabaziyo. Ukungathembi abantu ongabaziyo nokufuna ukuziphilela ubomi bakho kunokudlala indima enkulu ekubeni lilolo kwizixeko ezikhulu.
● Ukuphathwa Kakubi Kwabantu Emsebenzini
Indlela ekusetyenzwa ngayo kumashishini nakwimizi-mveliso emikhulu iye yakhokelela ekubeni bonke abasebenzi bazive bengamalolo baze bazive bengafaneleki. Abasebenzi basoloko beziva becinezelekile yaye benxunguphele.
Ukongezelela, ukusoloko kutshintshwa abantu abaninzi kwiinkampani ezinkulu kunokubenza bazive bengaqinisekanga ngekamva labo yaye bengamalolo. Ithetha ngenani elikhulu labantu abasebenza eFransi abazibulalayo, i-International Herald Tribune yathi uninzi lwabasebenzi balapho luvakalelwa kukuba “lwenza okungaphaya kwamandla abo ngenxa yokutshintsha kwemeko yezoqoqosho.”
● Ukunxibelelana Ngendlela Engenazimvakalelo
EJapan uNjingalwazi uTetsuro Saito wathi: “Siza kuye siphelelwa bubuchule bokukwazi ukuncokola ngenxa yokuba sineeselfowuni nezinye izinto zokunxibelelana.” EOstreliya iThe Sunday Telegraph inale ngxelo: “Ezobugcisa . . . zibangela ukuba abantu bazikhethe. Kunokuba bancokole abantu . . . bathumela iie-mail okanye imiyalezo.”
Echaza isizathu sokuba azive elilolo, uRachel oneminyaka engama-21 ubudala waseFransi ekhalaza uthi: “Ndifumanise ukuba abantu abazenzi iinzame zokuba bakubone kuba becinga ukuba ukuthumela umyalezo ngefowuni, nge-e-mail okanye bancokole kwi-Internet kwanele. Kodwa oko kundenza ndibe lilolo ngakumbi.”
● Ukuya Kuhlala Kwenye Indawo
Ngenxa yokuwohloka kwezoqoqosho, abantu baye banyanzeleka ukuba bafudukele kwezinye iindawo ukuze bagcine imisebenzi yabo okanye bafune imisebenzi. Ukufudukela kwenye indawo kwenza abantu bemke kubamelwane babo, kubahlobo babo, ezikolweni zabo yaye maxa wambi nakwiintsapho zabo. Abo bantu bafana nesityalo esikhutshiweyo saza saya kulinywa kwenye indawo kodwa kwashiywa iingcambu zaso ngasemva.
UFrancis ukhumbula usuku awafika ngalo eFransi esuka eGhana. Uthi: “Ukungakwazi ukuthetha ulwimi lwalapho, ukungabi nabahlobo nemozulu eqhaqhazelis’ amazinyo yalapho kwaba negalelo ekubeni lilolo kwam.”
Ekhumbula ukufika kwakhe eNgilani, uBehjat uthi: “Kwakunzima ukutshintshela kumasiko alapho. Babekhona abantu endandibaqhelile kodwa ndandingenabo abahlobo abasenyongweni okanye amalungu entsapho endandinokuxubusha nawo izinto ndize ndizityand’ igila kuwo.”
● Ukuswelekelwa Ngumntu Omthandayo
Ukuswelekelwa liqabane lomtshato kubangela ukuba iqabane elisaphilayo livakalelwe kukuba liphila ubomi obungenantsingiselo. Oku kubuhlungu nangakumbi kumntu oye walinyamekela iqabane lakhe kangangexesha elide. Udla ngokuvakalelwa kukuba akusekho nto ayiphilelayo.
UFernande ongumhlolokazi ohlala eParis, uthi, “Eyona nto inzima kukuba akasekho umhlobo wam osenyongweni endinokuzityand’ igila kuye—umyeni wam.” UAnny uthi umkhumbula kakhulu umyeni wakhe “ingakumbi xa kufuneke ndenze izigqibo ezibalulekileyo ngempilo yam okanye ngezinye izinto.”
● Uqhawulo-mtshato, Ukwahlukana Nokungafumani Qabane Lomtshato
Uqhawulo-mtshato okanye ukwahlukana kunokumshiya umntu elilolo okanye ezigweba. Ngabantwana abachaphazeleka kakhulu koku yaye bachaphazeleka kakhulu kunokuba iingcali bezicinga. Ezinye iingcali zithi abantwana babantu abaqhawule umtshato banokuba ngamalolo xa sele bebadala.
Abo bangatshatanga kuba bengafumani iqabane elifanelekileyo maxa wambi badla ngokuba ngamalolo. Baba ngamalolo ngakumbi xa abanye bethetha bengacinganga njengokuthi, “Ngaba ubungazukonwaba ukuba ubutshatile?”
Nabazali abangenamaqabane banokuba ngamalolo. Ukuba ngumzali kuyavuyisa kodwa kukwanazo neengxaki, yaye abazali abangenaqabane kufuneka bazicombulule bodwa.
● Ukwaluphala Nokungabi Namava Kolutsha
Abantu abalupheleyo banokuba ngamalolo, kwanaxa benyanyekelwa zizalamane zabo. Izalamane okanye abahlobo banokubatyelela ngamanye amaxesha, kodwa kuthekani xa bengezanga?
Kwelinye icala, nolutsha lukhe lube ngamalolo. Ulutsha oluninzi ludla ngokuzonwabisa lulodwa—lubukela umabonwakude, ludlala imidlalo yevidiyo luze luchithe ixesha elininzi phambi kwekhompyutha.
Ngaba sikhona isicombululo sale ngxaki? Unokumelana njani nokuba lilolo?
[Amagama acatshulweyo akwiphepha 5]
“Ukungakwazi ukuthetha ulwimi lwalapho, ukungabi nabahlobo nemozulu eqhaqhazelis’ amazinyo kwaba negalelo ekubeni lilolo kwam.”