Abantu Abaselula Bayabuza . . .

Ngaba Ukwenza Amadinga Okuthandana NgeInternet Kunokuba Yingozi Ngokwenene?

“Usenokuba akumazi umntu othetha naye ngeInternet.”—UDan, oneminyaka eli-17 ubudala.a

“Abantu bayaxoka kwi-Internet. Kulula ukuzenza into abangeyiyo.”—UGeorge, oneminyaka engama-26 ubudala.

UKWENZA AMADINGA ngeInternet kuya kuthandwa ehlabathini lonke. Njengoko inqaku elidluleyo kolu ngcelele liye labonisa, uthando lweInternet lungavutha ngokukhawuleza, kodwa ludla ngokuphela xa kuvela eyona nyaniso.b Kanti ngaphezu kokuba ludimaza nje, zininzi izinto ezibangela inkxalabo. Ukwenza amadinga ngolu hlobo kungakubeka kwembi ingozi—enoba ingokwasemzimbeni, ngokweemvakalelo okanye ngokomoya.

Inokwenzeka njani into yokuba into ebonakala ikhuselekile—ikhompyutha esekhayeni lakho—ibe yingozi kuwe? Ezinye iingozi zikhankanyiwe kumgaqo weBhayibhile obalulekileyo. Umpostile uPawulos wabhala wathi: “Sinqwenela ukuziphatha ngokunyaniseka kwizinto zonke.” (Hebhere 13:18) Oku akuthethi kuthi, kukunganyaniseki ukusebenzisa i-Internet okanye ukuyisebenzisa kuya kukwenza unganyaniseki. Kodwa ke, simele siyiqonde into yokuba abanye abantu badla ngokunganyaniseki yaye njengoko amazwi acatshulwe ngasentla ebonisa, kubonakala ngathi i-Internet izenza zibe lula ezinye iindlela zokunganyaniseki nokuze kube nzima ukuzibona. Yaye xa kufikelelwa ekuthandaneni, ukunganyaniseki kungabangela embi ingozi.

Ngokomzekelo, phawula uhlobo lokunganyaniseki olukhankanywe kule ndinyana yeBhayibhile: “Andihlalanga namadoda angenanyaniso; yaye andingeni kwabo bazifihlayo oko bakuko.” (INdumiso 26:4) Lithetha ukuthini ibinzana elithi “abo bazifihlayo oko bakuko”? Ezinye iinguqulelo zeBhayibhile zithetha “ngabahanahanisi.” Enye imbekiselo ithi, eli binzana linokubhekisela “kwabo bazifihlayo iinjongo zabo kwabanye okanye abo babufihlayo obona buntu neenjongo zabo.” Oko kunganyaniseki kwenziwa njani kwi-Internet? Yaye oko kunokuba yingozi ngayiphi indlela kwabo bafuna abantu abanokuthandana nabo?

Iingcuka Ezinezambatho Zeegusha

Enye indoda enabantwana ekuthiwa nguMichael yothuka yakuva kwenye intlanganiso ukuba abantwana abaninzi abayithobeli imiyalelo yabazali yokungawavuli amajelo eInternet ayingozi. Uthi: “Eyona nto yandikhathaza nangakumbi kukufumanisa ukuba abantu abaxhaphaza abantwana ngokwesini basebenzisa i-Internet ukuze bahendele abantwana kwizenzo ezingcolileyo zesini.” Xa ulutsha lusebenzisa i-Internet ukuze luzenzele izihlobo ezitsha, oko kunokuba yingozi embi ngaphezu kokuba lona lucinga.

Eneneni, iindaba ziye zanikela iingxelo ngabantu abakhulileyo nabanamanyala abazenza abantwana njengoko bezingela abantwana abanokubaxhaphaza ngokwesini kwi-Internet. Olunye uhlolisiso lubonisa ukuba, “umntwana omnye kwabahlanu kwabasebenzisa i-Internet ukhe wacelwa ukuba abandakanyeke kwizenzo zesini.” Kanti elinye iphephandaba lathi umntwana omnye kwabangama-33 oneminyaka ephakathi kweli-10 neli-17 ubudala “uye wafumana ingqalelo angayifuniyo” kusetyenziswa ikhompyutha.

Olunye ulutsha luye lothuka xa lufumanisa ukuba lo “somntwana” beluthandana naye ngeInternet ngumntu omdala olibanjwa. Bengaqondi abanye abantwana baye baba nento yokwenza naba bantu banqula isini. Aba bantu banamanyala baqala “bawenze athambe” amaxhoba abo, bewenza abathembe ngokuncokola nawo kwi-Internet. Noko ke, ekuhambeni kwexesha, benza indlela yokuba badibane naloo mntu ukuze banelise iminqweno yabo egqwethekileyo. Okubuhlungu kukuba, abanye abantwana baye babethwa, badlwengulwa baza babulawa kuloo nto.

Ngokwenene abantu abangendawo, ‘bayazifihla oko bakuko’ ukuze bafumane amaxhoba kwi-Internet. Aba bantu banokukukhumbuza umzekelo kaYesu ophathelele abaprofeti bobuxoki “abeza ngezambatho zeegusha” kodwa enyanisweni befana ‘neengcuka eziqwengayo.’ (Mateyu 7:15) Ukuthetha nomntu ongamboniyo kwi-Internet kwenza kude kube nzima nokubona ukuba uyakukhohlisa. UGeorge ocatshulwe ngaphambilana uthi: “Xa uthetha nomntu umjongile, uyakwazi ukufunda nto ebusweni bakhe nasekubetheni kolwimi lwakhe. Kodwa kwi-Internet akuboni nanye kwezo zinto. Uqhathwa lula nje.”

Ngokwenene, iBhayibhile inikela icebiso lobulumko xa isithi: “Onobuqili ubona intlekele azifihle, kodwa abangenamava bayadlula baze bafumane isohlwayo.” (IMizekeliso 22:3) Kuyavunywa ukuba, asinguye wonke umntu oncokola naye kwi-Internet okhohlakeleyo. Noko ke, kukho nezinye iindlela, abantu ‘abazifihla ngazo oko bakuko.’

Iingozi Zenkohliso Nokuzifihla

Akumangalisi ukuba, kuqhelekile ngabo bafuna ukuthandana ngeInternet ukuzibaxa iimpawu ezintle abanazo okanye bazenze ngathi balungile baze baziyayaze okanye bazifihle iziphako ezinzulu abanazo. Ukongezelela, iThe Washington Post yacaphula omnye umbhali esithi: “Ukwenza amadinga ngeInternet akulunganga kuba abantu bayakhohliswa.” Yongezelela ngelithi: “Abantu badla ngokuthi bangamadoda okanye amabhinqa ngoxa kungenjalo. . . . Imali eyamkelwa nguloo mntu, . . . uhlanga alulo, ingxelo engezenzo zolwaphulo-mthetho, isibakala sokuba wakha wagula ngengqondo nesibakala sokuba utshatile okanye akatshatanga, zidla ngokuba yimfihlelo ngalo lonke ixesha lokwenza amadinga.” Njengesilumkiso kwabanye, abantu abaninzi baye banikela ingxelo yokuqhathwa ngabo benza nabo amadinga kwi-Internet.

Ngaba abantu banokuxoka ngento enzulu njengemeko yabo yokomoya? Okulusizi kukuba oko kuyenzeka—abanye bathi bangamaKristu okwenyaniso ngoxa bengengawo. Yenzelwa ntoni yonke le nkohliso? Kwakhona, kungenxa yokuba i-Internet ikwenza kube lula oko. Omnye umfana waseIreland ogama linguSean uthi: “Kulula ukuzenza into ongeyiyo xa ubhala ekhompyutheni.”

Abantu abaninzi bayijonga njengento engenamsebenzi le nkohliso, besithi kuyinto eqhelekileyo ukuxoka nje kancinane xa uthandana. Kodwa ke, khumbula ukuba uThixo ukuthiyile ukuxoka. (IMizekeliso 6:16-19) Yaye ufanele ukukuthiya. Iinkathazo ezininzi kweli hlabathi zibangelwa kukuxoka. (Yohane 8:44) Ukunganyaniseki kusisiqalo esibi kulo naluphi na ulwalamano, ingakumbi olo lumele luhlale ixesha elide. Eyona nto imbi, ukunganyaniseki kuyingozi ngokomoya; konakalisa ulwalamano lwalowo uxokayo noYehova uThixo.

Okulusizi kukuba, olunye ulutsha luye lwangena kolunye uhlobo lokunganyaniseki. Luye lwaqalisa ukuba nabahlobo kwi-Internet lwaza lwabafihlela abazali balo. Ngokomzekelo, abazali bomnye umfana okwishumi elivisayo bothuka xa ngenye imini bathi bengalindelanga kwangena ekhayeni labo ibhinqa elingengomKristu emva kokuhamba iikhilomitha ezingaphezu kwe-1 500. Unyana wabo wayethandana nalo kwi-Internet kangangeenyanga ezintandathu, kodwa babengayazi loo nto de lafika!

Abazali babuza: “Inokwenzeka njani into enje?” Babezixelela ukuba, ‘Unyana wethu akanakuthandana nomntu angazange ambone ubuso ngobuso.’ Enyanisweni, unyana wabo wayebakhohlisa—ezifihla oko akuko ngokwenene. Ngaba akuvumi ukuba inkohliso enjalo isisiseko esingomelelanga sokuthandana ngaphambi komtshato?

Ukwakha Ubuhlobo Nomntu Ombonayo Kunakwi-Internet

Ukuthandana ngeInternet kunokuba yingozi nangezinye iindlela. Kwezinye iimeko, umntu othetha naye kwi-Internet unokubonakala engoyena ubalulekileyo kunabantu obabona imihla ngemihla. Intsapho, abahlobo, neembopheleleko onazo ziba kwindawo yesibini. Elinye ibhinqa eliselula ekuthiwa nguMonika laseOstriya lithi: “Ndaqalisa ukutyeshela abo bantu baxabisekileyo kum kuba ndandichitha ixesha elininzi nabantu endandincokola nabo ngekhompyutha.” Ngenxa yokukhathazwa yile nto, lagqiba kwelokuba liyeke ukwenza amadinga nge-Internet.

Kodwa, abantu abaninzi bayakwazi ukusebenzisa i-Internet ngolungelelwano. Ukusebenzisa iE-mail kunokuba luncedo gqitha ekunxibelelaneni nabahlobo kunye nabantu obathandayo. Noko ke, ngokuqinisekileyo uya kuvumelana nelokuba ayikho into ebhetele njengokuthetha nomntu nijongene. Ukuba ‘sele udlule entlahleni yobutsha’—ixesha apho inkanuko yesini ivutha ngamandla—yaye ufuna ukutshata, ufanele wenze esona sigqibo sibalulekileyo ebomini bakho. (1 Korinte 7:36) Zama ngamandla ukusenza ngobulumko.

IBhayibhile icebisa ngelithi: “Nabani na ongenamava ukholwa ngamazwi onke, kodwa onobuqili uyawaqwalasela amanyathelo akhe.” (IMizekeliso 14:15) Kunokuba ukholelwe yonke into oyibhalelwa ngumntu ongazange umbone, waqwalasele kakuhle amanyathelo akho. Kububulumko ngakumbi ukuqalisa incoko uze wakhe ubuhlobo nabantu obabonayo. Qiniseka ukuba niphelelisana ngokwenene, ingakumbi ngokuphathelele usukelo nemilinganiselo yenu yokomoya. Ukuthandana okulolo hlobo kunokukhokelela kumtshato ozele lulonwabo.

[Imibhalo esemazantsi]

[Imifanekiso ekwiphepha 28]

Ngaba umazi ngokwenene umntu obhalelana naye kwi-Internet?

[Umfanekiso okwiphepha 30]

Xa kufikelelwa ekuthandaneni ngaphambi komtshato ayikho into engaphezu kokudibana ubuso ngobuso