Ukujamelana Neemvavanyo Ngamandla KaThixo
NGOKUBALISWA NGUSTEPAN KOZHEMBA
Ngobunye ubusuku ekuqaleni kuka-Aprili 1951, iilori ezizele amajoni aseSoviet zangena kwidolophana yethu ekuthiwa yiStenyatyn eUkraine. Amajoni axhobileyo angqinga izindlu awayezikhethe kwangaphambili aza athabatha zonke iintsapho ezingamaNgqina kaYehova azithuthela eSiberia. Njengomntwana oneminyaka eli-12, yaba ngumnqa indlela ababephethwe ngayo ibe ndandifuna ukubona ukuba babeza kujamelana njani noko kubandezeleka.
NDAZALELWA kwidolophana yaseStenyatyn ngo-Oktobha 1938. UMama wafa emva kweeveki ezimbini ndizelwe, waza uTata yena wafa ngowe-1944 ngoxa wayesilwa kumkhosi waseSoviet nxamnye neJamani. Oodabawo bam uOlena noAnna bandithabatha baza bandikhulisa.
Ayemaninzi amaNgqina kaYehova endandiwazi kwidolophu yakowethu ndiseyinkwenkwe. Ayedla ngokuxelela mna nabanye ngoBukumkani obungoMesiya nanini na kuvela ithuba. Ekuhambeni kwexesha, ndaba nezihlobo ezingamaNgqina aselula. Xa athunyelwa ngenkani eSiberia ngamajoni aseSoviet, ndathi khamnqa ngokwenene.
Kodwa akazange agxothwe onke amaNgqina. UStepan, iNgqina elalihlala ngasekhaya, wavunyelwa ukuba ahlale, ekubeni intsapho yakowabo yayingengomaNgqina. Wayendishiya ngeminyaka emithandathu ubudala, yaye ukuphuma kwam esikolweni ndasebenza naye kumsebenzi wokuchwela. Wafundisisa iBhayibhile kunye nam, esebenzisa nayiphi na imibhalo yeMboniselo eyayikho. UStepan, ngoku okhonza uThixo oyinyaniso, uYehova, e-Estonia, wavuyiswa gqitha kukubhaptizwa kwam ngoJulayi 1956.
Ukuchaswa kwakuyinxalenye yobomi bakhe nawuphi na umkhonzi kaYehova eUkraine. Amagunya ayegqogqa imizi ekhangela uncwadi lweBhayibhile, ngoku ndaba neendawo eziliqela zokulufihla. Oodabawo bam uOlena noAnna, ababengamaKatolika angamaGrike, abazange bayithande into yokunxibelelana kwam namaNgqina. Bada bazama ukundiphembelela ukuba ndiyeke ukunxulumana nawo. Kanye njengompostile uPawulos, maxa wambi ndandidla ngokuvakalelwa kukuba ‘ndiphantsi kwengcinezelo engaphaya kwamandla am.’ Kodwa ulwalamano lwam noYehova uThixo lwandomeleza ndakwazi ukunyamezela uvavanyo ngalunye.—2 Korinte 1:8; Filipi 4:13.
Imigudu Yam Yokuhlala Ndingundilele
Ukuba kwinkonzo yomkhosi eSoviet kwakusisinyanzelo kubafana abaneminyaka eli-18 ubudala. Ngenxa yolwazi endandinalo lweBhayibhile, ndandizimisele ukuhlala ndingundilele ngokuphathelele imicimbi yehlabathi, nto leyo eyandenza ndala ukuba kumkhosi waseSoviet. (Isaya 2:4; Yohane 17:14-16) UOlena noAnna bandikhuthaza ukuba ndibe lijoni, nangona umntakwabo, utata ke, wabulawa emfazweni.
Emva kokuba ndifumene iimpepha ekwakufuneka ndizityobele, ndaya kwikomkhulu lomkhosi kwingingqi yethu ndaza ndachaza ukuma kwam. Ndabanjwa ngoko nangoko ndaza ndaba selugcinweni ngoxa kwakusazanywa izityholo endandiza kuzibhaxekwa. Ityala lam lachotshelwa ngasese; noodabawo babengawazi umhla eliza kuchotshelwa ngawo. Ndanikela ubungqina obucokisekileyo kwijaji, umtshutshisi nabagwebi ababini. Emva kwemizuzu engama-20, yayisele iqatyelisiwe yonke into. Ndagwetywa—ukuvalelwa iminyaka emihlanu kwakunye neminye iminyaka emihlanu yokuphulukana namalungelo am njengommi.
Ukusebenza Isigwebo Sam
Emva kokuchotshelwa kwetyala lam ndaphoswa entolongweni eLviv. Emva kweenyanga ezintathu ndibanjiwe de ndathunyelwa kwinkampu ekusetyenzwa nzima kuyo, ndandingekho kunye nabazalwana abangamaKristu, ndingenaBhayibhile nalo naluphi na uncwadi lweBhayibhile. Noko ke, ndaqhubeka ndixakeke zizinto zokomoya ngokunikela ubungqina kwabo ndandibanjwe nabo, abakufumanisa kunzima ukuqonda ukwala kwam ukuya emkhosini. Ebudeni bezo nyanga, ndathembela ngofundisiso lobuqu endandilwenza ngaphambi kokuba ndibanjwe. Ukuba kuloo meko kwandifundisa isifundo esixabisekileyo: Ufundisiso lobuqu lweBhayibhile lusinceda sakhe uvimba wokomoya osilondolozayo mhla ngeemvavanyo.—Yohane 14:26.
NgoAprili 1958, ndatshintshelwa kwinkampu 21 ekusetyenzwa nzima kuyo, kufutshane neDnepropetrovsk, ngaphezu kweekhilomitha ezingama-700 ukusuka ekhaya, ukuze ndisebenze inxalenye eseleyo yesigwebo sam. Apho sasivuka ngeye-6:00 kusasa, yaye emva kwesidlo sakusasa sasikhweliswa ezilorini size sisiwe kwindawo esasisebenza kuyo ngaphandle kwenkampu eyayikumgama omalunga neekhilomitha ezingama-50. Sasisebenza iiyure ezisibhozo esakhiweni, size ke ebusuku sibuyiselwe enkampini.
Sasilala kwizindlu zasemkhosini ezazithwala amabanjwa alikhulu inye. Ukutya kwakungekho mgangathweni, yaye iimeko esasiphila phakathi kwazo zazikumgangatho ophantsi; kodwa noko ndandihlala namaNgqina amabini kwindlu endandikuyo. Ngamnye kuthi wayesenza umzamo wokukhuthazana. Le yenye indlela uYehova abomeleza ngayo abakhonzi bakhe abacinezelekileyo—ngokuhlala nabo bakholwa nabo.—2 Korinte 7:6.
Lilonke kwakukho amaNgqina ali-12 kule nkampu. Amanye kuwo ayenezizalwane ngaphandle, ezazithubelezisa amaphepha eMboniselo kuthi efihlwe phakathi kokutya okwakuziswa. Imithwalo emininzi yayivulwa ngabalindi, ababehlola izinto ezingaphakathi ngaphambi kokuba bazidlulisele kuthi. Kodwa ukuze zingabonwa, la maphepha eMboniselo ayesongelwa ngeplastiki aze afakwe ezinkonkxeni zejam, abalindi ababengazikhathazi ngokuzivula. Sakuwafumana la manqaku, sasiwakhuphela ngokuwabhala size siwasasaze kuye ngamnye wethu.
Kwakhona senza konke okusemandleni ethu ukushumayela ngoBukumkani bukaThixo, yaye uYehova wayeyisikelela imigudu yethu. Ngokomzekelo, ndaqhelana nelinye ibanjwa eligama linguSergei, owayesebenza njengomphathi wemali kwishishini likarhulumente kwimpuma yeUkraine. Xa kwafunyaniswa ubuqhetseba emsebenzini wakhe, wabekwa ityala waza wagwetywa iminyaka elishumi evalelwe. Aliqela amaNgqina awafundisisa naye apho entolongweni, esebenzisa nawaphi na amaphephancwadi awayefumaneka. USergei wasabela kakuhle waza ekugqibeleni wathi kum: “Ukukhululwa kwam kule nkampu, ndifuna ukubhaptizwa ndibe liNgqina likaYehova!” Kanye njengoko wayetshilo, uSergei wabhaptizwa kungethuba lide ekhululwe waza wakhonza uYehova ngokunyaniseka de wafa.
Ukuqondwa Phosakeleyo KweyabaseRoma Isahluko 13
Ndakhululwa ekubanjweni ngoJanuwari 1963 ndaza ndabuyela kwidolophana yasekhaya, iStenyatyn. Kwibandla lalapho eSokal ndakhawuleza ndafumanisa ukuba ikho le nto yayingahambi kakuhle. Kwakukho ukruthakruthwano phakathi kwabazalwana. Kwakonakele phi? Yintoni eyakhokelela koku kungaqiniseki?
Kangangeminyaka amagunya aseSoviet ayezama ukuphehla ukungamanyani phakathi kwabantu bakaYehova ngokuthatha abazalwana aye kubancina aze abaxelele ukuba amaNgqina ayesetyenziselwa ukufeza izilangazelelo zaseMerika. La magosa acebisa ukuba amaNgqina aseSoviet Union aseke eyawo intlangano esecaleni, esongezelela ngelithi ayeya kunandipha uxolo kunye noRhulumente yaye ayeza kunqula ngokukhululekileyo ngaphandle kokutshutshiswa. Amagosa ayenza le nto yabangela umdla.
Emva koko IMboniselo kaNovemba 15, 1962, eyathi yaphuma inguJulayi 1 1964 ngesiUkraine, yachaza indlela entsha yokuqonda eyabaseRoma isahluko 13. De kwalelo xesha, sasiqonda “amagunya awongamileyo” akhankanywe kwindinyana yokuqala njengoYehova uThixo noYesu Kristu, kodwa IMboniselo yathi “amagunya awongamileyo” enyanisweni amela oorhulumente bomhlaba nokuba bona ‘babekwe nguThixo kwizikhundla zabo ezilinganiselweyo.’—Roma 13:1.
Amanye amaNgqina aba nobunzima bokwamkela le mbono intsha, ekubeni iinkokeli zorhulumente wasemhlabeni eSoviet Union zazikhohlakele yaye zizama ukucima unqulo oluyinyaniso lukaThixo. Ngoko ke, la maNgqina ayecinga ukuba IMboniselo enale ngcamango intsha yayingaphumi kwintlangano yamaNgqina kaYehova esemthethweni. Kunoko, ayecinga ukuba le nkcazelo yaqulunqwa ngabo babelalanisa kumagunya ukuze amaNgqina abonakale emthobela ngakumbi uRhulumente waseSoviet.
Ngoko ngamnye kubakhonzi bakaYehova baseUkraine wayejamelene nombuzo wokuba, Liliphi iqela elifanelekileyo, nelingafanelekanga? Ndawabukela amaNgqina exhasa elo cala alixhasayo ndaza ndazibuza, ‘Anaziphi iintshukumisa?’ Akuzange kube kudala wazicacela kum umahluko phakathi kwala macala.
Uninzi lwamaNgqina kaYehova, amanye kuwo awayengekayiqondi kakuhle le ngcaciso intsha yabaseRoma isahluko 13, lwafuna ukubambelela ngokuqinileyo kuYehova nakwintlangano yakhe. Noko ke, amanye aqalisa ukuthandabuza ukuba iimpapasho zelo xesha zeWatch Tower Bible and Tract Society zazivela kwintlangano esemthethweni yamaNgqina kaYehova. Lawo ayekwatyekele ekubeni neembono ezibaxekileyo kwimibandela eliqela. Ngokomzekelo, ayevakalelwa kukuba kwakuphosakele ukuba umtshakazi anxibe ilokhwe emhlophe emtshatweni wakhe nokuba amaqabane omtshato anxibe imisesane yomtshato. Baliqela abantu abayishiyayo intlangano. Noko ke, ekuhambeni kwexesha, imbinana yasibona isiphoso sayo yaza yabuyela ekukhonzeni uYehova.
Ukusebenza Ngokufihlakeleyo
Nangona umsebenzi wethu wamaKristu wawuvaliwe, nanini na kunokwenzeka sasiqhuba iintlanganiso zethu zeveki ngokwamaqela anabantu abamalunga ne-10 ne-15. Kwezi ntlanganiso sasisomelezwa ngokomoya, kufundisiso lwethu lweBhayibhile nonxulumano lwethu emva kwesifundo. Sasidla ngokubalisa amava ethu, yaye loo nto yayisinceda siqonde ukuba ngamnye kuthi ukumzabalazo ofanayo. Sakhumbula oko kwathethwa ngumpostile uPetros xa wabhala wathi: “Behlelwa kwaziimbandezelo ezifanayo nabazalwana benu bonke ehlabathini.”—1 Petros 5:9.
Iingxubusho zethu zazisekelwa kumanqaku eMboniselo. Ayefikelela njani kuthi la maphephancwadi? AmaNgqina awayethunywa ayesiza nemibhalo efinyeziweyo (microfilm copies) ukunqumla imida yaseUkraine. Le mibhalo yayithunyelwa kwimizila eyayilungelelaniswe kwangaphambili ukusuka kwelinye iNgqina ukuya kwelinye. Emva koko ngalinye lalidla ngokuvelisa imibhalo eyanele ibandla lalo. Maxa wambi ndandidla ngokuba nenxaxheba ekwenzeni imibhalo enjalo. Ndandisebenza imini yonke yaye ndandixakekile kwinkonzo kaYehova, ebusuku ndivelisa amaphephancwadi ndisenza nezinye izinto. Kwakulucelomngeni ukugcina olo cwangciso, kodwa abo babenembopheleleko kuthi entlanganweni bafumanisa ukuba uYehova “unika odiniweyo amandla.”—Isaya 40:29.
Senza ithuba lokuthetha ngeBhayibhile nabantu esasidibana nabo. Abaninzi kuthi bakwenza oku ngoxa babekhwele kwizithuthi zikawonke-wonke. Enye yeendlela ezaziqhelekile zokuqalisa incoko yayikukufunda iphephandaba lemihla ngemihla uze ke uthethe ngeendaba ezintsha kumntu okhwele naye. Isakuba iqalisiwe incoko, sasidla ngokuyiqhubela kumbandela weBhayibhile. Sazisasaza ngale ndlela iindaba ezilungileyo kummandla wethu.
Umfazi Ofanelekileyo
Ngowe-1965, ndatshata noTamara owakhuliswa njengomkhonzi woThixo oyinyaniso nowayekwazi ukumela ukholo lwakhe phantsi kweemvavanyo. Umntakwabo uSergei wabanjwa waza wancinwa ngenxa yomsebenzi wakhe njengeNgqina izihlandlo ezithathu. Ekugqibeleni, wafunyanwa enemibhalo yeMboniselo, waza wagwetywa iminyaka elishumi evalelwe. NoTamara wathatyathwa ngabasemagunyeni baya kumncina baza bamsongela ngokumvalela.
Kwakunzima ukufumana indawo yokuhlala emva kokuba sitshatile, kodwa enye intsapho ehlala eSokal neyayiwathanda amaNgqina yasinika igunjana elisendlwini yalo ngemali encinane. Le ntsapho yasiqinisekisa ukuba uTamara unokuqhubeka ehlala kweli gumbi ukuba ndandinokubanjwa ndiphoswe entolongweni kwakhona. Sinomfazi wam sambulela uYehova ngentsikelelo yakhe nale ntsapho ngobubele eyasenzela bona. Kamva, xa le ntsapho yafelwa lilungu layo, uTamara wasebenzisa elo thuba ukuze achazele intombi yalapho enguGalina ngethemba lovuko. Imbewu yenyaniso yeBhayibhile yathwala isiqhamo, yaye uGalina waya emthanda uMdali wethu. Wabhaptizwa yaye ngoku ukhonza uYehova nomyeni wakhe.
Kangangeempelaveki ezininzi ngowe-1970, ndandisiya kwiindawo ezininzi zaseUkraine, kwakunye neMoldavia (Moldova) neCarpathian Mountains, ndidibana ndize ndikhuthaze abo bathabatha ukhokelo entlanganweni kaYehova. Ngokuqhelekileyo ndandidla ngokuhamba ngoLwesihlanu ngokuhlwa ndize ndigoduke matshona ngeCawa. UTamara wayengafane azi apho ndiya khona yaye maxa wambi engaqiniseki nokuba ndiya kubuya. Kwaqhubeka kunjalo kangangeminyaka. Into endinokuyithetha yileyo ithethwa yiBhayibhile ngomfazi ofanelekileyo: “Ixabiso lakhe lingaphezulu lee kwelekorale.”—IMizekeliso 31:10.
Ngaloo maxesha umsebenzi wamaNgqina kaYehova wawuyingozi. Konke esasikwenza kuphela sasifumana amandla okukwenza kuYehova. Amaxesha amaninzi ndandidla ngokujamelana neemeko ezinzima ndize ndixakwe ukuba mandiqale ngaphi. Ngoko ndandidla ngokuthandaza ngaphakathi ndize ndithembele kumandla kaYehova. Leyo yaba yindlela esiphila ngayo.—IZenzo 4:29.
Kutshanje
Ngokuhamba kwexesha, ubomi baya busiba lula kubakhonzi bakaYehova eUkraine. Intshutshiso yadamba, yaye ukugwetyelwa ukuvalelwa kwathatyathelwa indawo kukudliwa imali. Ngeminyaka yee-1980, abasemagunyeni baqonda ukuba amaNgqina kaYehova ngokwenene ayintlangano esehlabathini lonke. Ngenxa yoko, ngokuvalela amaNgqina eUkraine nakwezinye iindawo kwiSoviet Union, uRhulumente wayesonakalisa udumo lwakhe ehlabathini lonke. Ndikhumbula ndincinwa lelinye igosa elathi kum: “Ngoku siyaqonda ukuba unqulo aluyongozi. Eyona nto iphambili kuthi kukuba iqela lonqulo lingabi nabungozi kuRhulumente.”
EMpuma Yurophu uDonga Olwahlula Amazwe lwavuleka ekupheleni kweminyaka yee-1980, yaye ukususela ngoko siye sanandipha inkululeko engakumbi eUkraine. Ngowe-1991 umsebenzi wethu wavulwa ngokusemthethweni. Emva koko, ngoSeptemba 1998, iWatch Tower Society yaseka iofisi yesebe eLviv. Ebutsheni bowe-1999, kwaqaliswa ukwakhiwa kwesakhiwo esitsha sesebe esiya kuhlala abasebenzi abangaphezu kwe-170. Ngoku eUkraine sinabangaphezu kwe-112 000 abanesabelo kumsebenzi wokushumayela, yaye abangaphezu kwama-250 000 bebekho kwiSikhumbuzo sowama-2000. Eyona nto ibangela umdla linani labantu abaselula abaphakathi kwethu. Kwindibano eyayiseKiev ngowe-1991, intatheli yephephandaba yandibuza ukuba:
“Bavela phi abantu abangaka? Bendicinga ukuba akukho maNgqina eSoviet Union, kanti ngethuba elingephi kukho amawakawaka!”
Ndayixelela oku: “Asibangakho ngamabona-ndenzile. Sekuyiminyaka sikhonza uYehova kanye apha.”
Yabuza yathi: “Nibatsalele njani abantu abaselula abaninzi kangaka kunqulo lwenu?”
“Kuya kulunga uye kwaba baselula ubuze bona. Bacele bakuxelele isizathu sokuba bakhonze uYehova.”
Le ntatheli yathi: “Sendivela kubo. Bandixelele ukuba bayakunandipha.”
Ndongezelela ngelithi: “Seso ke isizathu. Ukuba ulutsha lwethu lutsho, lugqibile ke.”
Asingobantu abaselula kuphela abakunandiphayo ukukhonza uYehova. SinoTamara besimkhonza kangangeminyaka engaphezu kwengama-80 idibene yaye asingethandi ukulahla ukholo lwethu nangasiphi na isizathu. Nangona singamaNgqina kaYehova sisenazo iingxaki. Siyaqonda ukuba isekho nje le nkqubo indala, wonke umntu uya kuqhubeka ejamelana nobunzima. Kodwa singabona bantu bazixhobele kakuhle iimvavanyo kunalo naliphi na elinye iqela labantu emhlabeni. Sisazimisele ukujamelana neemvavanyo njengoko senzile ngaphambili, ngamandla kaThixo wethu ongusomandla uYehova. Sivakalelwa ngendlela efanayo noMoses kwingoma yoloyiso: “UYa ungamandla am nokomelela kwam, ekubeni elusindiso kum.”—Eksodus 15:2.
[Umfanekiso okwiphepha 22]
Ndikunye namanye amaNgqina kwinkampu 21 ekusetyenzwa nzima kuyo
[Umfanekiso okwiphepha 22]
Imibhalo efinyeziweyo ye-“Mboniselo” yaseUkraine (umlinganiselo wayo)
[Umfanekiso okwiphepha 23]
Ndikunye nomfazi wam uTamara
[Umfanekiso okwiphepha 24, 25]
Umzobo wesakhiwo sesebe esitsha esakhiwayo eLviv
[Imifanekiso ekwiphepha 25]
Kutheni bebaninzi kangaka eUkraine abantu abaselula abakhonza uYehova?