Ukulondoloza Ukholo Phantsi Kwengcinezelo Yobuzwilakhe

NGOKUBALISWA NGUMICHAEL DASEVICH

“Thina eJamani siyawabulala amaNgqina kaYehova. Uyawubona laa mpu?” labuza latsho igosa leGestapo njengoko lalisalatha umpu osekoneni. “Mna ndingakugrovoza ngencula kungabikho nto ithi thiki futhi emva koko.”

Ndandineminyaka eli-15 ubudala kuphela xa ndasongelwa ngolu hlobo ebudeni bobukho bamaNazi kwiphandle lakowethu ngowe-1942.

NDAZALWA ngoNovemba 1926 kwidolophana ekufutshane neStanislav (ngoku ebizwa ngokuba yi-Ivano-Frankivs’k), kwindawo eyayiyinxalenye yePoland ngelo xesha. Ebudeni beMfazwe Yehlabathi II, ukususela ngoSeptemba 1939 ukuya kutsho ngoMeyi 1945, ummandla wethu wawuyindawo yeSoviet Union, emva koko kangangexesha elithile wabangwa yiJamani, yaye ekugqibeleni waphinda wabuyela kwiSoviet. Emva kwemfazwe yaba yinxalenye yeUkrainian Soviet Socialist Republic, yaye xa iSoviet Union yaphelayo ngowe-1991, yaba yinxalenye yeUkraine.

Utata owayengowasePoland nomama owayengowaseBelorussia babengamalungu eCawa yamaKatolika yamaGrike. Kodwa, ngowe-1939, amabhinqa amabini awayesuka kwibandla lamaNgqina kaYehova angama-30 kwidolophana ekufutshane yaseHoryhliady asihambisela incwadana ethi Universal War Near. Yachaza iziganeko endandizibona zisenzeka. Kodwa, le ncwadana yaphakamisa lo mbuzo, “Siyintoni esona sizathu sokuba izizwe zingxamele imfazwe?” Ndaqwalasela iingcaciso zayo ezisekelwe eBhayibhileni.

Imfazwe yayingekokuphela kwengxaki yethu eUkraine. Kwakugquba indlala ebomvu. Iingcamango zeNkulumbuso yaseSoviet uJoseph Stalin zakhokelela ekubeni abantu babanjwe ngesixhanti basiwe eRashiya. Ukubandezeleka endakufumanayo kwabangela ukuba ndiyihlolisise ngakumbi iBhayibhile. Ndacela elinye iNgqina laseHoryhliady ukuba lifundisise iBhayibhile kunye nam.

Idolophana yakowethu iOdajiv imelene noMlambo iDniester osuka eHoryhliady, yaye izihlandlo eziliqela ngeveki ndandidla ngokusebenzisa iphenyane ukunqumla loo mlambo ukuze ndiye kwisifundo seBhayibhile. NgoAgasti 1941, mna nodade wethu uAnna sabhaptizwa kuloo mlambo kunye nabanye ababini.

Ndancinwa Ligosa LeGestapo

Ulawulo lweJamani lwaqalisa ngowe-1941, yaye phezu kwako nje ukuqhubeka sisongelwa ngokohlwaywa, asizange siwuyeke umsebenzi wethu njengamaKristu. Ngonyaka olandelayo ndaqalisa ubuvulindlela, ndijikeleza ngebhayisikile. Akuzange kube kudala emva koko, ndathana mandla negosa leGestapo laseJamani endilikhankanye ekuqaleni. Naku okwenzekayo.

Ngenye imini xa ndandigoduka ndisuka kubulungiseleli, ndatyelela amanye amaKristu amabini endandikhonza nawo, omnye umama nentombi yakhe. Umyeni wale ntombi wayeluchasile ukholo lwethu yaye wayefuna ukwazi ukuba ilufumana phi uncwadi lwayo lweBhayibhile. Ngaloo mini ndandiphethe kungekuphela nje uncwadi kodwa neengxelo zobulungiseleli zala maKristu ndikhonza kunye nawo. Le ndoda yandibona ndiphuma endlwini.

“Yim’ apho!” yakhwaza. Ndathi hlasi ingxowa yam ndabaleka.

“Yim’ apho! Selandini!” yakhwaza. Abantu ababesebenza emasimini bacinga ukuba ikho le nto ndiyibileyo, ngoko banyanzelisa ukuba mandime. Le ndoda yandisa kwisikhululo sabakwantsasana, apho kwakukho igosa leGestapo.

Lathi lakubona uncwadi olwalukwingxowa yam, eli gosa lakhwaza ngesiJamani, lathi: “Rutherford! Rutherford!” Ndandingafuni mntu wayeza kuguqulela into eyayimenza umsindo. Igama likaJoseph F. Rutherford, owayengumongameli weWatch Tower Bible and Tract Society, lalibhalwe kuqweqwe olungaphandle lweencwadi ezazipapashwa ngamaNgqina kaYehova. Le ndoda yandityhola ngokuthandana nomfazi wayo. Amapolisa negosa leGestapo babona ukuba esi sityholo asinasihlahla, ekubeni umfazi wale ndoda wayemdala enokuba ngumama. Andula ke aqalisa ukundincina.

Bafuna ukwazi ukuba ndingubani na yaye ndivela phi na yaye ngokukhethekileyo ndandizifumana phi ezi ncwadi. Kodwa andizange ndibaxelele. Bandibetha izihlandlo ezimbalwa baza bahlekisa ngam, emva koko bandivalela kwigumbi elingaphantsi komhlaba. Ndancinwa kangangeentsuku ezintathu zilandelelana. Emva koko ndasiwa kwiofisi yegosa leGestapo, elandisongela ngokundigrovoza ngencula. Kwakha kwalithuba ndingaqiniseki nokuba lingayenza ngokwenene na le nto. Ndathokombisa apho, yaye kwakha kwee cwaka ithutyana. Ngendlela engachubekanga lathi: “Hamba-a.”

Unokubona nawe ukuba, ukushumayela ngelo xesha kwakulucelomngeni gqitha kuthi, kwakunjalo ke nangokuqhuba iintlanganiso. Sabhiyozela iSikhumbuzo saminyaka le sokufa kukaKristu ngoAprili 19, 1943, sisebenzisa amagumbi amabini endlu eyayiseHoryhliady. (Luka 22:19) Xa kanye sasiza kuqalisa intlanganiso yethu, kwahlatywa umkhosi wokuba amapolisa ayesiza ngakuloo ndlu. Abanye bethu bazimela esitiyeni, kodwa udade wethu uAnna namanye amabhinqa amathathu baya kwigumbi elingaphantsi komhlaba. Amapolisa ababhaqa apho aza abatsala ngabanye ukuze aye kubancina. Badlakazeliswa kangangeeyure, yaye omnye wabo wenzakaliswa kakubi.

Ihlabathi Liyatshintsha

Ehlotyeni ngowe-1944, amaJamani arhoxa yaye abantu baseSoviet babuyela kummandla wethu. Njengabakhonzi bakaYehova, sabambelela kwimilinganiselo efanayo yeBhayibhile esasiphila ngayo ngoxa sasilawulwa ngamaNazi. Sakwala ukuba nenxaxheba emkhosini okanye kwezobupolitika. Kungekudala ukunyaniseka kwethu kuloo milinganiselo yeBhayibhile kwavavanywa .—Isaya 2:4; Mateyu 26:52; Yohane 17:14.

Kwisithuba seentsuku ezimbalwa, abantu baseSoviet baqalisa ukutsalela bonke abafana ukuba baye kwinkonzo yasemkhosini. Eyona nto yayinzima kukuba, yayingengobantu baseSoviet kuphela ababefuna amajoni. Abo babevukela eUkraine bakhangelela abafana indawo, abathi babathatha babasa ehlathini ukuze babaqeqeshe njengabaphumi-mkhosi. Thina maNgqina sasikwimeko enzima yokufuneka sizingqinile ukuba singoondilele kumacala amabini alwayo—kubantu baseSoviet nakwaba bavukeli.

La maqela mabini alwa kanye kwidolophana yethu, eshiya ababini kwaba bavukeli befile kwisitrato esingaphandle komzi wasekhaya. Amagunya aseSoviet eza ekhaya ngelokubuza ukuba akukho nto siyaziyo na ngaba bantu bafileyo. Amagosa awayeze ekhaya agqiba kwelokuba ahambe nam ukuze andifake kumkhosi wawo, owawuqeqesha amajoni asePoland. Kuba ke ndandiyinzalelwane yasePoland, ndandiza kubhaliswa kuwo.

Ndikunye namanye amaNgqina amane, sala ukubhaliswa emkhosini, ngoko sakhweliswa kuloliwe saza sasiwa eDnipropetrovs’k, isixeko esimalunga neekhilomitha ezingama-700 ukuya ngasempuma. Apho, emva kokuba sichazile ukuba asinakukhonza emkhosini ngenxa yeenkolelo zethu ezisekelwe eBhayibhileni, sasiwa elugcinweni ngoxa kwakusaqulunqwa izityholo zethu. Sathi sakuvela enkundleni, safumanisa ukuba igosa elaliza kusincina lingumYuda. Ngoxa sasizithethelela, ephulaphule ngenyameko lowo wayesincina, sazichaza iinkolelo zethu. Sakhankanya izinto esasiqonda ukuba ziya kumchukumisa, kuquka ukucinezelwa kwamaSirayeli nokukhululwa kwawo eYiputa nguMoses.

Ngeenyanga esasilinde ngazo ukuba inkundla iwise isigwebo kuthi, sasihleli esiseleni kunye namanye amabanjwa amalunga nama-25. Xa afumanisa ukuba siye sala ukungena emkhosini, adanduluka athi: “Ningabazalwana bethu!” Noko ke, kancinane nje emva koko safumanisa ukuba awangomaNgqina kodwa ngamaBhaptizi. Avuma ukungena emkhosini kodwa abanjwa xa ayengafuni ukuphatha izixhobo.

NgoMeyi 1945, ngoxa sasisabanjiwe eDnipropetrovs’k, ezinzulwini zobusuku savuswa zizithonga zompu nemikhwazo kwimizi yamajoni nakwizitrato ezingaphandle. Sasingazi nokuba ngabavukeli, enoba lidabi, okanye ngumbhiyozo kusini na. Ngentsasa elandelayo kwisidlo sakusasa, seva iindaba kwindawo yokucheba: Imfazwe iphelile! Kungethuba lide emva koko, inkundla yavakalisa izigwebo zethu. Sanikwa isigwebo esifanayo nala maBhaptizi—sagwetywa iminyaka elishumi kwiinkampu zentolongo.

Kwinkampu Yentolongo ERashiya

SingamaNgqina amahlanu sathunyelwa kwinkampu yentolongo eRashiya. Emva kokuhamba ngololiwe kangangeeveki ezimbini, sada sehla eSukhobezvodnoje, malunga neekhilomitha ezingama-400 ngakwimpuma yeMoscow. ISukhobezvodnoje yayiliziko lolawulo leenkampu ezingama-32 ekusetyenzwa nzima kuzo ezithe tshitshilili ngakumgaqo kaloliwe. Nkampu nganye yayihlala amawakawaka amabanjwa. Emva kweenyanga ezintandathu ndiseSukhobezvodnoje, ndathunyelwa kwiNkampu 18. Uninzi lwamabanjwa awayelapho yayizizaphuli-mthetho okanye amabanjwa ezobupolitika.

Amagunya alapho asinika umsebenzi wokuwisa imithi, msebenzi lowo owawunzima gqitha. Maxa wambi kwakudla ngokufuneka sifukuze kumkhenkce ofikelela esinqeni, sisika imithi ngesarha size ke sirhuqe iziqobo zayo emkhenkceni. Kanye ngeveki, ngeCawa emva kwesidlo sakusasa, ndandiba nethuba lokuxubusha ngeBhayibhile namanye amaNgqina amane awayekuloo nkampu. Yayiziintlanganiso zethu ke ezo. Kwakhona sasibhiyozela iSikhumbuzo, yaye sakwenza oko equleni ngomnye unyaka. Sasisebenzisa incindi yamaqunube amnyama kuba sasingenayo iwayini esinokuyisebenzisa njengomfuziselo wegazi likaYesu.

Ubulolo bandongamela. Ndayiphalaza kuYehova imbilini yam, wandomeleza njengoko womeleza uEliya xa loo mprofeti wayonganyelwe zezo mvakalelo. (1 Kumkani 19:14, 18) UThixo wandinceda ndabona ukuba sasingesedwa. Wayelixhanti lobomi bam, nangona ndandikwimeko enzima ngolo hlobo.

Kwinkampu nganye kwezaziseSukhobezvodnoje kwakukho igcudwana lamaNgqina, yaye sasikwazi ukunxibelelana nawo maxa wambi sincedwa lelinye iNgqina elalinomsebenzi owawulivumela ukuba lityelele kwezinye iinkampu. Lalingumnxibelelanisi, lithubelezisa uncwadi kwezi nkampu. Loo nto yenza sakwazi ukwabelana ngoncwadi olumbalwa esasinalo. Olunjani lona ukhuthazo okwaba lulo oko!

Ndabuyela EUkraine

Ngenxa yoxolelo olwavakaliswa nguRhulumente, isigwebo sam sehliswa ukusuka kwiminyaka elishumi ukuya kwemihlanu. Ngoko ngoAprili 1950, ndabuyela kwibandla lasekhaya eHoryhliady. Umsebenzi wethu wawusavaliwe eUkraine, yaye kwakuyingozi kakhulu ukuba nesabelo kubulungiseleli. Kodwa nemivuzo yako yayinjalo.

Kungekudala emva kokuba ndibuyile, ndancokola nendoda egama linguKozak, eyayihlala eZhabokruky, idolophana ekwisithuba seekhilomitha ezingama-20 ukusuka ekhaya. Ndabuza ukuba yona nentsapho yayo babephila njani. Ndandisazi kakuhle ukuba abantu abasebenza kwiifama ezidibeneyo babexhalabele indlela yokuzixhasa, ngoko ndandisazi ukuba umbuzo ololo hlobo wawuyindlela efanelekileyo yokuqalisa incoko. Ndayichazela ukuba iBhayibhile yayixele kwangaphambili ukuba kwakuya kunqongophala ukutya kubekho neemfazwe kwixesha lethu. (Mateyu 24:3-14) Yafuna ukwazi ngakumbi. Ngoko ndaphinda ndayityelela. Veki nganye ndandihamba kangangeekhilomitha ezingama-40 ukuya nokusuka eZhabokruky ukuya kufundisisa iBhayibhile nentsapho yakwaKozak. Iingozi ezibandakanyekileyo, kwanexesha elininzi elachithwayo, konke kwalityalwa xa intsapho yakwaKozak yabhaptizwayo ngoAgasti 1950.

Kungekudala nje ibhaptiziwe intsapho yakwaKozak yathatyathwa yasiwa ekuthinjweni kunye namanye amaNgqina angamawakawaka. Babanjwa ngequbuliso ngamajoni axhobileyo ebutsheni buka-Aprili 1951 yaye—ngaphandle kokuthethwa nokuchotshelwa kwetyala—bathunyelwa eSiberia. Apho intsapho yakwaKozak nezinye izihlobo banyanzeleka ukuba bazenzele ikhaya elitsha.a

Kwiintsapho ezili-15 zamaNgqina eHoryhliady, zi-4 kuphela ezagxothwayo. Noko ke, kwamanye amabandla inani lamaNgqina awagxothwayo lalithe chatha. Babegxothwa njani abantu abaninzi kangaka? Kaloku amagunya ayenoludwe lwamaNgqina yaye ngaloo ndlela ayekwazi ukuwabamba ngobuninzi bawo. Kubonakala ngathi olu ludwe lwenziwa ngowe-1950, xa ndandisentolongweni eRashiya, ngoko igama lam lalingekho kulo. Kwinyanga engaphambili, ngoMatshi 1951, ndatshata noFenia, owayengumkhonzi othembekileyo kaYehova. Yonke intsapho yakuloFenia yayithunyelwe ekuthinjweni kodwa wasinda kuyo yonke loo nto kuba wayetshate nam yaye wayezibiza ngefani yam, eyayingekho kolo ludwe.

Uvavanyo Oluqatha Lokholo

Emva kokugxothwa kwabanye, thina babesesemakhaya kwafuneka silungelelanise umsebenzi kwakhona. Ndacelwa ukuba ndinyamekele ibandla elikwindawo ekufutshane yaseIvano-Frankivs’k, ndawo leyo eyayisenamaNgqina angama-30 aseleyo kwibandla ngalinye kwali-15, nasemva kokuba abanye begxothiwe. Njengomchweli ozisebenzelayo, ndandinocwangciso olungaxakekanga, ngoko ndandidla ngokuhlanganisana nabazalwana ngokufihlakeleyo kwibandla ngalinye kanye ngenyanga.

Sasidla ngokudibana emangcwabeni ngobusuku apho sasiqinisekile ukuba sisodwa. Owona mba uyintloko owawudla ngokuxutyushwa kukuqiniseka ukuba onke amabandla analo uncwadi lweBhayibhile. Maxa wambi sasidla ngokufumana iphephancwadi IMboniselo elisexesheni ngesiPolish okanye ngesiRomania size siliguqulele kwisiUkraine. Noko ke, amagunya ayesoloko eliliso kuthi, ezama ukufumana aze atshabalalise oomatshini bethu bokukhuphela abadala.

Kodwa eyona ngxaki yethu inkulu kukuba sasikude nabazalwana bethu abangamaKristu abakwamanye amazwe, kuquka abo baseBrooklyn, eNew York, ababekhokela umsebenzi wethu wamaKristu. Loo nto yaphumela ekubeni amabandla ethu asoloko ezaliswe kukungamanyani, iintetho zolwimi namaqhinga. Amanye amaNgqina ayishiya intlangano aza abumba amaqela aphikisayo. Kwathi saa amabali obuxoki nangakhiyo ngokuphathelele abo bakhokelayo eBrooklyn.

Ngenxa yoko, uninzi lwethu lwafumanisa ukuba uninzi lwezona mvavanyo ziqatha zokholo lwalungabangelwa yintshutshiso yabachasi kuphela kodwa lwalubangelwa nayimilo eyayiphakathi ebandleni. Nangona abanye bakhetha ukuba bangabi sanqula nathi, safumanisa ukuba kwakubalulekile ukubambelela entlanganweni size silindele kuYehova ukuba azilungise ngokwakhe izinto. Okuvuyisayo kukuba uninzi lwamaNgqina kwingingqi yethu lwenza kanye loo nto. Kwakhona, okuvuyisayo kukuba uninzi lwabo bayishiyayo intlangano bayiqonda impazamo yabo baza kamva babuya baza kukhonza uYehova kunye nathi.

Kwanasebudeni baloo maxesha anzima okuba sodwa, sazigcina sixakekile kubulungiseleli basesidlangalaleni yaye sasikelelwa ngokutyebileyo. Yaye enjani yona indlela esiye savuzwa ngayo! Sihlandlo ngasinye ngoku ndisiya kwiSifundo Sencwadi Sebandla lethu, ndikhunjuzwa ngeentsikelelo zikaYehova. Ngamnye kwabangama-20 nangaphezulu abakwelo qela lesifundo sencwadi wafundiswa inyaniso ngamalungu entsapho yam.

Abazali nodade wethu uAnna bonke bafa bethembekile kuYehova. Mna noFenia sisazimisele gqitha ekukhonzeni uYehova. Ixesha likhawulezile. Kwiminyaka engama-30 edluleyo, amaNgqina kaYehova eUkraine aye atyhubela iziganeko ezichukumisayo endingenakukwazi ukuzibalisa kule ngxelo imfutshane. Kodwa ndiyaneliseka xa ndikhangela emva kwiminyaka yam yokukhonza uYehova, ndiqinisekile ukuba uya kuqhubeka elixhanti lam, kuba yena uthi: “NdinguYehova, anditshintshanga.”—Malaki 3:6.

[Umbhalo osemazantsi]

[Umfanekiso okwiphepha 20]

Ndikunye noFenia ngowe-1952

[Umfanekiso okwiphepha 22]

Ndikunye noFenia namhlanje