“Izixeko Ziyaphuphuma”

“Uluntu luyafuduka kunanini na ngaphambili, yaye uninzi lwalo lushiya amakhaya lusiya kufuna ubomi obubhetele ezixekweni.”

YATSHO njalo impapasho ethi Foreign Affairs kwintshayelelo yenqaku elithi “Izixeko Eziphuphumayo Kumazwe Asakhasayo.” Ngokutsho kwelo nqaku, abantu abaninzi baye “barhwetyeshwa zizibane ezimenye-menye, okanye banyanzelwa ukuba bafuduke emaphandleni zizidubedube zezobupolitika nemeko enzima yezoqoqosho, kukwanda kwabemi nakukonakaliswa kwendalo.”

Zizala ngokukhawuleza kangakanani izixeko? Abanye baqikelela ukuba abantu abaninzi bafudukela ezidolophini ngomlinganiselo ongaphaya kwengqondo ngaphezu kwabantu abasisigidi ngeveki! Kumazwe asakhasayo izixeko ezingaphezu kwama-200 ngoku zinabemi abadluleyo kwisigidi. Ezingama-20 ziye zafikelela kwizigidi ezilishumi! Yaye akubonakali ngathi izinto zingatshintsha. Ngokomzekelo, khawucinge ngesixeko saseLagos, eNigeria. Ngokutsho kwengxelo yeWorldwatch Institute, “ngowama-2015, iLagos isenokuba nabantu abamalunga nezigidi ezingama-25, isuka ekubeni sisixeko seshumi elinesithathu ngobukhulu ehlabathini ukusa ekubeni sisixeko sesithathu ngobukhulu.”

Iingcali ezininzi zithi oku akubonisi ukuba izinto ziya kuhamba kakuhle kwixa elizayo. UFederico Mayor, owayesakuba ngumlawuli-jikelele weUnited Nations Educational, Scientific and Cultural Organization, walumkisa ngelithi ngonyaka wama-2035, “abantu abangaphezu kwezigidi ezingamawaka amathathu baya kuba behlala ezidolophini ezikhoyo namhlanje.” Ukuze sinyamekele aba bemi baninzi kangaka, “kuya kufuneka sakhe izixeko eziliwaka eziya kuhlala abemi abazizigidi ezithathu kwiminyaka engamashumi amane ezayo, ezingama-25 ngonyaka.”

Kwakhona iingcali zithi izixeko ezanda ngokukhawuleza ngabemi ziyaziphazamisa izixeko ezisehlabathini jikelele. Yaye ezi ziquka izixeko ezikumazwe ahambele phambili kwezoqoqosho. Yiyiphi ingxaki ejamelene nezixeko, yaye oku kunokukuchaphazela njani wena? Ngaba zikho izicombululo ezinokuvela? Amanqaku alandelayo aza kuhlolisisa le micimbi idl’ umzi.