Iintolongo Zisenkathazweni

“Ukwakha iintolongo ezingakumbi ngelokuzama ukuphelisa ulwaphulo-mthetho kufana nokwenza amangcwaba amaninzi ngelokuzama ukulwa nesifo esibulalayo.”—UROBERT GANGI, OYINGCALI KWEZOLULEKO.

EKUBENI ezobupolitika namhlanje zikuphepha ukukhubekisa abantu, kudla ngokusetyenziswa amagama angathi ayaginyeka noko kunelithi “intolongo.” Kukhethwa igama elithi “isisele” okanye “indawo yoluleko,” apho “kufundiswa ubugcisa” kuze “kunikelwe inkonzo kawonke-wonke.” Kukhethwa ukuthiwa “umntu oseluvalelweni” kunokusebenzisa igama elithob’ isidima elithi “ibanjwa.” Kodwa inyaniso yona ikukuba iintolongo zijamelene neengxaki ezinkulu namhlanje, njengeendleko ezingathethekiyo zokugcina izaphuli-mthetho emva kwezitshixo nokungakwazi ukufeza injongo yokuvalelwa kwazo.

Abanye abantu bayathandabuza ukuba ikho into eluncedo ngayo intolongo. Bathi ngoxa inani lamabanjwa liye lenyuka laya kutsho ngaphezu kwezigidi ezisibhozo ehlabathini lonke, akukabonakali mahluko kwiindawo ezininzi kumlinganiselo wolwaphulo-mthetho. Ngaphezu koko, ngoxa bebaninzi abantu ababanjelwe ulwaphulo-mthetho olubandakanya iziyobisi, indlela ezininzi ngayo iziyobisi ixhomisa amehlo.

Noko ke, abantu abaninzi bakujonga ukuvalela entolongweni njengesona sohlwayo sanelisayo. Bavakalelwa kukuba, xa isaphuli-mthetho sivalelwa entolongweni, kuphunyeziwe okusesikweni. Enye intatheli ithi xa ichaza ukuvalelwa kwezaphuli-mthetho “ziphoswa ngaphaya kwezitshixo.”

Zine izizathu eziphambili zokuvalelwa kwezaphuli-mthetho entolongweni: (1) ukuze zohlwaywe, (2) ukuze kukhuselwe ibutho labantu, (3) ukuze kuthintelwe olunye ulwaphulo-mthetho olunokuphinda lwenzeke, (4) kunye nokufundisa izaphuli-mthetho ubuntu, zifundiswe nokuthobela umthetho zize zibe luncedo zakukhululwa. Makhe sibone ukuba iintolongo ziyawenza na lo msebenzi.