“Ngaba Amabanjwa Anokutshintshwa?”

Lowo ngumbuzo ongaphandle kwinkupho “kaVukani!” kaMeyi 8, 2001. Abaninzi abalifundayo elo nqaku babulela ngongcelele lwamanqaku oluquka imfundo esekelwe eBhayibhileni amaNgqina kaYehova aye ayidlulisela kwisisele saseAtlanta, eGeorgia, eUnited States. Ezi zilandelayo zezinye zeeleta eziye zafunyanwa.

◼ “Ekubeni bendilibanjwa kangangeminyaka esibhozo edlluleyo, ndiye ndabona indlela ophumelela ngayo umsebenzi wamaNgqina kaYehova wokufundisa iBhayibhile abawenza ezintolongweni. Xa ndandikwintolongo yaseAtlanta, ndafumana ilungelo lokusebenza naba bahlanu baboniswe kweli nqaku. Ndiyababulela ngenkxaso nothando abaye balubonakalisa kum. Ndiyababulela abazalwana abanezi mpawu, ababonisa uthando kwabo baye benza iimpazamo kodwa abenza imigudu yokuzilungisa baze babe ngabantu abaphila kakuhle kunangaphambili.”—R. J.

◼ “Ngoku ndisentolongweni yaye abazalwana abasuka kwiHolo yoBukumkani yasekuhlaleni baye benza ilungiselelo lokuqhuba izifundo zeBhayibhile apha. Oko kube nemiphumo emihle, kuba omnye esikunye naye entolongweni uye wabhaptizwa, yaye nakuba ndakha ndasuswa kubudlelane ngoku ndiye ndabuyiselwa. Amanye amabanjwa amaninzi nawo afunda iBhayibhile. Kuyakhuthaza ukwazi ukuba siyinxalenye yomsebenzi wokufundisa owenziwa ehlabathini lonke. Simkhonza uYehova, kungakhathaliseki ukuba sikweyiphi na indawo!”—J. M.

◼ “Ngowe-1970, ndavalelwa entolongweni ngenxa yolwaphulo-mthetho endingazange ndilwenze. Ndagwetywa iminyaka eli-14. Ngoxa ndandisentolongweni ndaqalisa ukufunda iBhayibhile namaNgqina kaYehova. Ndachukumiseka gqitha yindlela awayenyaniseke ngayo nendlela awayendixhalabele ngayo. Emva kokuba ndikhululwe entolongweni ndaqhubeka ndifunda yaye kungekudala emva koko ndabhaptizwa. Ngamanye amaxesha ndiye ndizive ndidanile kwaye ndinomsindo ngenxa yempatho engekho sikweni. Kodwa ndiye ndikhumbule ukuba kungekudala uYehova uza kuphelisa konke okungekho sikweni nokubandezeleka. Amabanjwa anokutshintsha ukuba alandela imigaqo efumaneka eBhayibhileni. Afanele abe nombulelo ngemigudu eyenziwa ngabazalwana abachitha ixesha labo bewanceda. Ndiyababulela!”—R. S.

◼ “Ukufika kwam entolongweni ndanditshaya, ndisebenzisa iziyobisi, ndithuka nokuthuka, yaye ndandingabathobeli abasemagunyeni. Kwakhona ndandikwiqela lemigulukudu. Ukongezelela koko, ndandisusiwe kubudlelane kwibandla lamaKristu. Ngoku ndibuyiselwe, kwaye ndiqhuba kakuhle ngokomoya. Ndiyabulela ngenyaniso, ndivakalelwa kukuba sele indikhulule!”—I. G.