Kungekudala Ukugula Okanye Ukufa Akusayi Kubakho!

AKUKHO namnye umntu okuvuyelayo ukugula, kwaye abantu abafuni ukufa. Unjingalwazi wezamayeza kwizifundo ngoluntu uthi: “Iphulo lokufuna ukuphila ixesha elide libonakala liqhubeka ukutyhubela iinkulungwane nakuwo onke amabutho abantu. Lihlobene nosukelo olusisiseko lokuzilondoloza . . . UPonce de Leon kuphela nje ungoyena udumileyo kudederhu lwabantu abachitha ubomi babo bezama ukufuna indlela yokuphila ixesha elide. Injongo eyintloko yenzululwazi yezamayeza kukufuna indlela yokulondoloza ubomi ixesha elide ngokuzama ukuphelisa izifo nokufa.”

Ukufa kuyasenzakalisa yaye kusibangela intlungu kangangokuba xa kufikela abahlobo namalungu eentsapho, ngokuzenzekelayo sithi sizame ukuyifihla imiphumo yako. Incwadi ethi Funeral Customs the World Over ithi: “Akukho qela, kungakhathaliseki ukuba lisemva okanye liphucuke kangakanani, elingathi xa likhululekile yaye linako lizingcwaba ngembeko izidumbu zamalungu alo. . . . Kwanelisa iminqweno eyendeleyo kubantu bonke. Ukukwenza kubonakala ‘kulungile,’ yaye ukungakwenzi, ingakumbi kwabo basondeleyo ngokwentsapho, ngokweemvakalelo, bebehlala kunye, besabelana ngamava okanye kukho amanye amaqhina, kubonakala ‘kuphosakele,’ yaye kungekho ngokwemvelo, into ekumelwe kungxengxezwe ngayo okanye idanelwe. . . . [Umntu] sisidalwa esibangcwaba ngembeko abafileyo baso.”

Imvelaphi Yokugula Nokufa

Ngaloo ndlela ingcamango yokuba ukugula nokufa ngaminazana ithile kuya kupheliswa ibangel’ umdla omkhulu, kodwa ngaba inkolelo enjalo inesiseko? Enyanisweni inaso, yaye sisengqiqweni, sithembekile yaye asinakuze sisilele. SiliLizwi eliphefumlelweyo loMdali wethu—iBhayibhile Engcwele.

Loo ncwadi iyichaza ngokucacileyo imvelaphi yentlupheko yabantu. Isixelela ukuba umntu wokuqala, uAdam, wadalwa nguThixo waza wabekwa kwikhaya elingumyezo oyiparadisi kummandla othile kuMbindi Mpuma. UAdam wadalwa efezekile; ukugula nokufa wayengakwazi nokukwazi. Kungekudala wathelelwa ngumfazi ngokufanayo owayefezekile, yaye bobabini babenethemba lobomi obungunaphakade emhlabeni.—Genesis 2:15-17, 21-24.

Le meko ifezekileyo ayizange ihlale ithuba elide. Ngoba? Ngenxa yokuba uAdam ngokuzingca wakhetha ikhondo lobomi lokuzimela geqe kuThixo. Umphumo waba yimbulaleko, intlungu ukugula yaye ekugqibeleni nokufa. (Genesis 3:17-19) Inzala yakhe yazuz’ ilifa uhlobo lobomi obungonwabisiyo uAdam awayelukhethile. AmaRoma 5:12 acacisa esithi: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” AmaRoma 8:22 ongezelela esithi: “Siyazi ukuba yonke indalo iyancwina, inenimba kunye, unangoku.”

Ngaba Oku Kuya Kwenzeka Emhlabeni Okanye Ezulwini?

Sekunjalo, iBhayibhile iyasiqinisekisa ukuba uThixo kungekudala uza kubuyisela uluntu oluthobelayo kwimeko yolonwabo eyalahlwa nguAdam noEva. ISityhilelo 21:3, 4 sithi: “UThixo abe nabo . . . Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” Umprofeti wamandulo ngokufanayo wabona ixesha laxa ‘kungekho mmi uya kuthi, Ndiyafa.’—Isaya 33:24.

Ngaba unokulithelekelela ihlabathi apho kungekho zibhedlele, zindawo zokugcina izidumbu namangcwaba? Ngaba ungazithelekelela uphila ngokungenasiphelo, ukhululekile nakuloyiko lokubandezeleka nokufa? Ewe, idinga likaThixo lisenza sonke sichulumance yimincili. Kanti, sinokuqiniseka njani ukuba eli themba limangalisayo liza kuzaliseka kulo Mhlaba wethu—kungekhona ezulwini? Phawula umongo weZibhalo ezikhankanywe ngasentla. Iindinyana zokuqala zeSityhilelo isahluko 21 zithetha ‘ngamazulu amatsha nehlabathi elitsha.’ Kutshiwo ngokucacileyo ukuba uThixo uya kuba nabantu yaye babe ngabantu bakhe. Idinga elikwincwadi kaIsaya lokuba akukho mntu uya kugula lilandelwa yimbekiselo ‘kubantu abahleli khona, ababuxolelweyo ubugwenxa babo.’

Ngoko la madinga akhuthazayo abhekisela kubomi emhlabeni! Kwaye ayavisisana nomthandazo kaYesu kuYise: “Makwenziwe ukuthanda kwakho nasemhlabeni, njengokuba kusenziwa emazulwini.”—Mateyu 6:10.

Kutheni Sisithi Kungekudala?

AmaNgqina kaYehova aye anceda abaninzi baqonda ukuba la madinga aza kuzaliseka kungekudala. Noko ke, yintoni ewaqinisekisayo ngako oku? Kungenxa yobungqina obuyintabalala bokuba siphila ‘kwimihla yokugqibela’ yale nkqubo ikhoyo, okanye ulungelelwaniso lwezinto emhlabeni. (2 Timoti 3:1-5) Abafundi bakaYesu bafuna umqondiso ongexesha lokuqosheliswa kwale nkqubo yezinto. Ebaphendula uYesu wabaxelela ngokweenkcukacha iziganeko zehlabathi ebezisenzeka ukususela ekuqhambukeni kweMfazwe Yehlabathi I ngowe-1914.a Waza wongeza wathi: “Xa nithe nazibona zonke ezo zinto, yazini ukuba kukufuphi, sekusemnyango. Inene ndithi kuni, Asisayi kudlula esi sizukulwana, zingadanga zonke ezo zinto zibekho.” Ngoko bambi besizukulwana esasiphila ngowe-1914 baya kuqhubeka bephila ukuze babone isiphelo sale nkqubo yehlabathi.—Mateyu 24:33, 34.

Ngelo xesha uYehova uThixo uya kuthuma uNyana wakhe, uKristu Yesu, ukuba aphume aphelise bonke oonobangela bokubandezeleka nentlupheko phezu kwesi sijikelezi-langa sihle singuMhlaba. IBhayibhile ithetha ngokupheliswa kobungendawo ‘njengemfazwe yaloo mini inkulu kaThixo uSomandla’ eArmagedon.—ISityhilelo 16:14, 16.

Iqela elikhulu labantu aboyika uThixo liya kusinda kuloo ntlekele yoyikekayo lize liqhubeke liphila libone ukuqalisa kolawulo loxolo lukaKristu Yesu. (ISityhilelo 7:9, 14; 20:4) Nangona eya kube elawula ngokusuka ezulwini, iingenelo zolawulo lwakhe ziya kunanditshwa ngabo bonke abo baya kuba bephila emhlabeni—abo basinde kwimfazwe yeArmagedon nezigidi ngezigidi eziya kuvuswa emangcwabeni. Emva koko liya kuzaliseka idinga elithi: “Umelwe yena kukuthi alawule, ade azibeke phantsi kweenyawo zakhe zonke iintshaba. Olokugqibela utshaba oluya kubhangiswa kukufa.”—1 Korinte 15:25, 26.

Ngenxa yoku ngentembelo sinokuvakalisa sithi: “Kungekudala ukugula okanye ukufa akusayi kubakho!” Eli asilophupha ingekuko nokuba namabhongo. Lidinga eliqinisekileyo likaYehova uThixo, “ongenakuxoka.” Ngaba uza kuba nentembelo kweli themba? Linokukuzisela iingenelo ezingunaphakade!—Tito 1:2.

[Umbhalo osemazantsi]

[Imifanekiso ekwiphepha 7]

Kungekudala ukugula nokufa kuza kuthatyathelw’ indawo yimpilo entle nobomi obungunaphakade