Izinto Ezenza Indawo Yokusebenza Ibe Yingozi
“Abantu abafa emsebenzini bangaphezulu kwabo bafa ezindleleni.” Lo ngumxholo obhalwe ngqindilili kwiphepha lesaziso elalisasazwa yiWorkCover, umbutho wokhuseleko lwabasebenzi eNew South Wales, eOstreliya.
NOKO ke, iingozi ezibulalayo ziyinxalenye nje yale ngxaki. Ngokuqhelekileyo izigidi zidla ngokwehlelwa ziingozi ezinkulu emsebenzini, maxa wambi ezizishiya ziziingxwelerha. Uninzi luye lwafa ngaphambi kwexesha ngenxa yokusebenza ngezinto eziyingozi empilweni yalo okanye ngenxa yoxinezeleko emsebenzini.
Ekubeni ukufa emsebenzini neengozi ezimanyumnyezi zisenzeka phantse kumacandelo ahlukahlukeneyo emizi-mveliso nakwezorhwebo, kufanelekile ukubuza: Ukhuseleke kangakanani kwindawo osebenza kuyo? Ziziphi izinto ezinokuba yingozi kwimpilo nobomi bakho kuloo ndawo?
Iindawo Zempangelo Ezibangela Uxinezeleko
Abasebenzi badla ngokunyanzelwa ukuba babe nemveliso eninzi. EJapan, ibinzana elithi karoshi—“ukufa ngenxa yokusebenza ngaphaya kwamandla akho”—laqala ukusetyenziswa kwiifomu zokucela imbuyekezo ezafakwa ziintsapho ezifelwe zizalamane zazo. Ngokutsho kolunye uhlolisiso olwenziwa kwelo kwiminyaka eliqela edluleyo, kubantu baseJapan abasebenza eofisini, abangama-40 ekhulwini boyika ukufa ngenxa yokusebenza ngaphaya kwamandla abo. Igqwetha elinobuchule kwizicelo ezinjalo lathi banokuba “malunga nama-30 000 abantu ababulawa yikaroshi eJapan nyaka ngamnye.”
Amapolisa aseJapan aye aqikelela ukuba iingxaki ezinxulumene nomsebenzi zezona zibangela ukuba abantu abaninzi abaneminyaka engama-50 ukusa kwengama-59 ubudala bazibulale. Ngokutsho kwencwadi ethi The Violence-Prone Workplace, inkundla ethile yabek’ ityala komnye umqeshi ngokufa komsebenzi owazibulalayo ngenxa yokonganyelwa ziingxaki zomsebenzi.
Iphephandaba laseOstreliya iThe Canberra Times lathi ‘Abantu baseMerika ngabona basebenza iiyure ezininzi xa bethelekiswa nabantu baseJapan.’ Ngoko, amabali amatsha anomxholo ofana nothi “Abantu Bayazibulala Ngokusebenza Iiyure Ezininzi” athetha ngoxinezeleko lwabasebenzi, njengabaqhubi beenqwelo zabaguli, abaqhubi beenqwelo-moya, abasebenzi beenkampani zokwakha nabantu abasebenza kwezothutho kunye nabantu abasebenza ebusuku ababulawayo ngoxa besemsebenzini.
Njengoko iinkampani ezininzi zisenza uhlengahlengiso yaye zidenda abasebenzi ukuze ziqhubeke zisenza ingeniso, abasebenzi banyanzelwa ukuba baziqobe ukuze benze imveliso engakumbi. IBritish Medical Journal yathi ukudenda abasebenzi kuchaphazela impilo yabasebenzi ngendlela engathandekiyo.
Ugonyamelo Lwasemsebenzini
Abasebenzi abasebenza nzima nabaxinezelekileyo abayongozi kwiziqu zabo nje kuphela. Uphando olwenziwe eBritani lubonise ukuba ixesha elininzi abantu abaninzi abasebenza eziofisini bahlala becaphukile besenziwa ngabantu abasebenza nabo yaye ukungavisisani okunjalo kudla ngokubenza babe nogonyamelo.
Iphephancwadi iBusiness Week lathi: “Bamalunga ne-15 abasebenzi baseMerika ababulawa emsebenzini veki nganye.” IHarvard Business Review ithi: “Akukho mphathi ukuthandayo ukuthetha ngogonyamelo emsebenzini. Kodwa inyaniso kukuba nyaka ngamnye amakhulu ngamakhulu abasebenzi bayabethwa okanye babulawe ngabantu abasebenza nabo.”
Kwelinye icala, abantu abaninzi baphathwa kakubi emsebenzini ngabantu abasebenzisana nabo okanye ngabathengi. Ingxelo yolwaphulo-mthetho yaseOstreliya ithi abanye oogqirha boyika ukuhlaselwa kangangokuba bahamba nomnye umntu xa betyelela abaguli kumakhaya abo. Abanye abasemngciphekweni ngamapolisa kunye nabafundisi-ntsapho.
Olunye uhlobo logonyamelo olwenzeka emsebenzini kukuxhatshazwa ngokweemvakalelo, nto leyo i-International Labor Organization eyigqala njengogonyamelo lwengqondo. Olona hlobo lunkqenkqeza phambili loku kukuxhaphaza.
UNjingalwazi uRobert L. Veninga weUniversity of Minnesota, eUnited States uthi, “uxinezeleko nokugula okubangelwa lulo luchaphazela abasebenzi phantse ehlabathini lonke.” Wathi “ngokutsho kwengxelo iWorld Labor Report eyenziwa yiUnited Nations’ International Labor Organization ngowe-1993, esona sizekabani sale ngxaki kukuba uxinezeleko lubangelwa ziindawo zokusebenza ezingafanelekanga, ezisoloko zitshintsha-tshintsha yaye ezinabantu abahlala beneengcwangu.”
Ngoko umbuzo ngulo, Yintoni abanokuyenza abaqeshi nabasebenzi ukuze indawo yabo yokusebenza ikhuseleke? Oku kuza kuxutyushwa kwinqaku elilandelayo.