Ukungqubana Phakathi Konqulo Nenzululwazi

“Ngaba unqulo lutyhefa ingqondo?”—Isazi ngebhayoloji uRichard Dawkins.

MAXA WAMBI unqulo nenzululwazi zigqalwa njengenyoka nesele. Abanye bathi lo nomji uya kuphela mhla kwabakho efayo.

Kukho izazinzulu ezifana nengcali yemichiza uPeter Atkins, ezivakalelwa kukuba unqulo nenzululwazi “azinakuze” zivisisane. Lo ka-Atkins uthi ‘akukho ngqiqweni kwaphela ukukholelwa ukuba (yonk’ into) yadalwa nguThixo.’

Ukanti, abanye abantu abathanda unqulo bagxeka inzululwazi ngelithi ilahlekisa amakholwa. Aba bantu bathi inzululwazi yanamhlanje iyakhohlisa; kusenokwenzeka ukuba iingcamango zayo zichanile, kodwa indlela ezichazwa ngayo ilusingela phantsi ukholo lwabantu abathembekileyo. Ngokomzekelo, isazi ngebhayoloji uWilliam Provine, sithi iingcamango zikaDarwin zibonisa ukuba “imilinganiselo ayinasiseko; ubomi abunantsingiselo.”

Noko ke, ezinye zezinto ekungquzulwana ngazo zibangelwa kukuba omabini la maqela amela iingcamango ezibubuxoki okanye ezingenasihlahla. Kangangeenkulungwane, iinkokeli zonqulo ziye zafundisa iintsomi neemfundiso ezitenxileyo ezingasekelwanga kwiZibhalo eziphefumlelweyo, nezingqubanayo noko kufunyaniswe yinzululwazi yezi mini. Ngokomzekelo, iCawa yamaRoma Katolika yamgxeka kabukhali uGalileo xa wathi umhlaba ujikeleza ilanga nakuba wayechanile. Ingcamango kaGalileo yayingangqubani nemfundiso yeBhayibhile, kodwa nje yayingavisisani nemfundiso yecawa yelo xesha. Kwelinye icala, izazinzulu azichananga xa zifundisa ukuba ubomi bavela kwizinto ezingaphiliyo ezingazange zidalwe nguThixo. Ziyalunyemba unqulo zisithi alwazi nto ngenzululwazi.

Ngoko ke, ngaba inzululwazi nonqulo ziya kuze zivisisane? Ewe. Eneneni inzululwazi esekelwe kwizibakala nonqulo lokwenyaniso ziyavisisana kunokuba zingqubane.

[Umfanekiso okwiphepha 2, 3]

UGalileo wagxekwa kabukhali yicawa ngenxa yokufundisa inyaniso esekelwe kwinzululwazi