Amapolisa—Kutheni Eyimfuneko Nje?
BEBUYA kuba njani ubomi ngaphandle kwamapolisa? Ngowe-1997, ukungabikho kwamapolisa ali-18 000 ngethuba logwayimbo lwawo kwaba nawuphi umphumo kubemi besixeko saseRecife eBrazil, abangaphezu kwesigidi?
IThe Washington Post yathi: “Kwiintsuku ezintlanu zesi siphithiphithi, kwisixeko esikhulu esikufuphi nonxweme ukubulalana kwabantu kuye kwathabath’ unyawo ngendlela engazange ibonwe. Kuphangwe iibhanki ezisibhozo. Izikrelemnqa ziye zadlakazelisa abantu kwindawo eneevenkile ezininzi zaza zahamba zidubula kwindawo ehlala izinhanha. Yaye akukho mntu ukhathalele imithetho yendlela. . . . Ngenxa yolwaphulo-mthetho, iindawo zokugcina izidumbu ziye zazala, yaye xa ungena kwezona zibhedlele zikhulu zikarhulumente udibana nabantu abadutyulweyo nabahlatyiweyo ezipasejini.” Kuthiwa elinye igosa likarhulumente kwisebe lezobulungisa lathi: “Andizange ndilubone ulwaphulo-mthetho olunjengolu.”
Nakweyiphi na indawo enempucuko kusoloko kukho nobungendawo. Siyawafuna amapolisa okusikhusela. Kakade ke, inkoliso yethu ikhe yeva ngamapolisa akhohlakeleyo, anganyanisekanga, angakhathaliyo nalisebenzisa kakubi igunya lawo. Izigigaba ziyahluka ngokwamazwe ngamazwe. Kodwa ke besiya kuba yintoni ngaphandle kwamapolisa? Ngaba asivumi ukuba amapolisa ayasinceda ngokwenene? UVukani! ukhe wadlan’ indlebe namapolisa akumazwe awahlukeneyo ehlabathini, ewabuza ngesizathu sokuba akhethe lo msebenzi.
Umsebenzi Oyingenelo Kwintlalo-ntle Yoluntu
UIvan olipolisa kwelaseBritani wathi: “Ndiyakuvuyela ukunceda abantu. Ndawuthanda lo msebenzi kuba, xa ulipolisa wenza izinto ezahlukeneyo. Abantu abaqondi ukuba kumsebenzi wamapolisa, zizinto ezingama-20 ukuya kuma-30 ekhulwini kuphela eziphathelele ulwaphulo-mthetho. Owona msebenzi mkhulu wawo kukwenza izinto eziyingenelo kwintlalo-ntle yoluntu. Xa ndijikeleza ukuze ndibone ukuba zonke izinto zihamba kakuhle, ndinokunceda xa kukho umntu ofe ngequbuliso, xa kukho ingozi yenqwelo-mafutha, ndihlangule abantu kulwaphulo-mthetho, ndize ndincede osele ekhulile osengxakini. Waneliseka ngokwenene xa uye wafumana umntwana obelahlekile okanye xa uye wanceda ixhoba lolwaphulo-mthetho lihlangabezane nentlungu elikuyo.”
UStephen wayelipolisa eUnited States. Uthi: “Xa abantu besiza kufuna uncedo kuwe ngokunyanisekileyo, wena njengepolisa unayo indlela yokubanceda nexesha lokwenjenjalo. Ndathanda loo nto ke kulo msebenzi. Ndandifuna ukunceda abantu nokubakhulula kwiinzingo ezibathwaxayo. Ndicinga ukuba noko ndiye ndakwazi ukukhusela abantu kulwaphulo-mthetho, ngomlinganiselo othile. Kwiminyaka emihlanu, ndiye ndabamba abantu abangaphezu kwe-1 000. Kodwa ezinye izinto ebendikuvuyela ukuzenza, kukufumana abantwana abalahlekileyo, ukunceda abantu abanesifo sika-Alzheimer abalahlekayo kwanokufumana iinqwelo-mafutha ebezibiwe. Kanti enye into eyayibangela imincili, kukuleqa nokubamba abarhanelwa.”
URoberto olipolisa kwelaseBolivia uthi: “Ndandithanda ukuhlangula abantu abafuna uncedo olungxamisekileyo. Ndiseyinkwenkwe, ndandiwathanda gqitha amapolisa ngenxa yokuba ekhusela abantu kwiingozi. Ukuqala kwam kulo msebenzi, ndandiphethe iqela lamapolisa ahambahamba kumbindi wesixeko, apho kukho iiofisi zakwarhulumente. Phantse yonke imihla, sasigcina ucwangco xa kukho uqhankqalazo lwezobupolitika. Umsebenzi wam yayikukuqinisekisa ukuba abantu ababi ndlongondlongo. Ndafumanisa ukuba xa ndisiba nobuhlobo ndize ndithethe kakuhle neenkokeli zabaqhankqalazi, kwakungabikho zidubedube zinokubangela ukuba kwenzakale abantu abaninzi. Oku kwakundenza ndizive ndanelisekile.”
Mininzi ngokwenene imisebenzi eyenziwa ngamapolisa. Enza imisebenzi enjengokuhlangula ikati ebambiseke emthini, ukuhlangula abantu abathinjwe ngabanqolobi nokubamba abo baphanga iibhanki. Noko ke, amapolisa alithemba kwabanye ngoxa abanye bewoyika. Inqaku elilandelayo liza kusichazela isizathu soko.
[Imifanekiso ekwiphepha 2, 3]
Iphepha 2 nelesi-3: Amapolisa alathisa izithuthi eChengdu, eTshayina; Amapolisa aseGrisi ajongene nogwayimbo; amapolisa aseMzantsi Afrika
[Inkcazelo]
Linda Enger/Index Stock Photography
[Umfanekiso okwiphepha 3]
Ivenkile eyaphangwa ngoJulayi 2001 ngexesha lokugwayimba kwamapolisa aseSalvador, eBrazil
[Inkcazelo]
Manu Dias/Agência A Tarde
[Umfanekiso okwiphepha 4]
UStephen waseUnited States
[Umfanekiso okwiphepha 4]
URoberto waseBolivia