Amapolisa—Liyintoni Ikamva Lawo?

MHLAWUMBI ngekusisiphithiphithi nje ukuba ebengekho amapolisa. Kodwa nakuba amapolisa ekho, ngaba sikhuselekile? Kwizixeko ezininzi namhlanje, njengakumaphandle amaninzi, abantu abakhuselekanga. Ngaba sifanele silindele ukuba amapolisa asikhusele kulwaphulo-mthetho olulungelelanisiweyo nasekuhlaselweni ngokuphindaphindiweyo yimigulukudu? Ngaba ngokwenene sifanele silindele ukuba ibe ngamapolisa enza izitrato zethu zikhuseleke? Aya kuliphumelela na phofu idabi nxamnye nolwaphulo-mthetho?

Kwincwadi yakhe ethi Police for the Future, uDavid Bayley uthi: “Amapolisa akakwazi ukuthintela ulwaphulo-mthetho. Afana nje nebhandeji kwisilonda somhlaza. . . . Enokuba wona anokusebenza nzima kangakanani na ezama ukuthintela ulwaphulo-mthetho, asinakuze sithembele kuwo.” Uhlolisiso lubonisa ukuba eyona misebenzi mithathu iphambili yamapolisa—ukuhambahamba phakathi kwezitrato, ukunikela uncedo kwiingxaki ezingxamisekileyo nokuphanda ngolwaphulo-mthetho—ayiluthinteli ulwaphulo-mthetho. Yintoni ebangela oko?

Ukwandisa inani lamapolisa ngelizama ukuthintela ulwaphulo-mthetho kunokubiza imali engaphaya kwengqondo. Izaphuli mthetho zibonakala zingayikhathalele into yokubakho kwamapolisa amaninzi ahambahamba phakathi kwabantu. Ukusabela ngokukhawuleza kwamapolisa akuluthinteli kangako ulwaphulo-mthetho. Amapolisa athi kunokuba lula ukubamba isaphuli-mthetho xa enokufika kwindawo yesiganeko kwisithuba esingaphantsi komzuzu. Kubonakala ngathi izaphuli-mthetho ziyazi ukuba amapolisa akanakukwazi ukufika ngokukhawuleza kangako. Nokwenza uphando ngezaphuli-mthetho akuncedi nganto. Kwanaxa abacuphi bezigweba baze bazivalele entolongweni izaphuli-mthetho loo nto ayiluthinteli ulwaphulo-mthetho. EUnited States kuvalelwa ezona zaphuli-mthetho zininzi kunalo naliphi na ilizwe kodwa isankqenkqeza phambili kulwaphulo-mthetho; ngoxa eJapan kuvalelwa izaphuli-mthetho ezimbalwa, ulwaphulo-mthetho alukho kangako. Kwanoonogada bengingqi abenzi nto kangako, ingakumbi kwimimandla enomlinganiselo ophezulu wolwaphulo-mthetho. Kuye kuthatyathwe amanyathelo angqongqo kusiliwa iindidi ezithile zolwaphulo-mthetho, ezinjengokuthutyeleziswa kweziyobisi okanye ukuphanga, ibonakale ngathi iyasebenza loo nto okwethutyana, kodwa emva kwexesha elithile luphinde luqale phantsi.

Incwadi ethi Police for the Future ithi: “Abantu abanengqiqo abakuboni kungumnqa ukoyiswa kwamapolisa lulwaphulo-mthetho. Yaziwa nanguthathatha into yokuba izinto ezibangela ulwaphulo-mthetho, zingaphaya kwamandla amapolisa nenkqubo yezobulungisa.”

Bekuya Kuba Njani Ngaphandle Kwamapolisa?

Wenza ntoni xa usazi ukuba akukho mapolisa akujongileyo? Ngaba usebenzisa elo thuba ukuze waphule umthetho? Ungothuka xa usiva ngendlela abantu abaninzi abahlonelwayo nabaziingcungcu abalonakalisa ngayo udumo nekamva labo, bejonge iingenelo abangaqinisekanga ngazo ngokubandakanyeka kulwaphulo-mthetho olwenziwa ngabasebenzi baseziofisini. IThe New York Times isandul’ ukunikela ingxelo ‘ngabantu abali-112 ababhaxekwa izityholo zokubandakanyeka kubuqhetseba, nekuthiwa bebebandakanyeke kwiyelenqe lokukhohlisa iinkampani zeinshorensi zeenqwelo-mafutha. Abanye kwabo babetyholwa yayingamagqwetha, oogqirha, iingcali zamathambo, ingcali yezonyango, iacupuncturist nesekela-mphathi kwiSebe Lamapolisa.’

Obunye ubuqhetseba obungaphaya kwengqondo obusandul’ ukushiya izinhanha ezinikela inkxaso-mali kumashishini obugcisa zibamb’ ongezantsi, bobokuba abo babesakuba ngabaphathi beSotheby’s yaseNew York neChristie’s yaseLondon baphoswa emva kwezitshixo ngenxa yokuzitshintshela amaxabiso. Kuye kwafuneka bahlawule amakhulu ezigidi zeedola eziphuma kumashishini abo! Ngoko bonke nje abantu bayinyolukele imali, enokuba bakuwuphi na umgangatho.

Laa nto yenzeka eRecife, eBrazil, ngowe-1997 ngoxa amapolisa ayegwayimbile, ibonisa phandle ukuba abantu bangena becimele kulwaphulo-mthetho xa bengathintelwa. Bangade babe bayanqula kodwa loo nto ayiyiguquli indlela abaziphatha ngayo. Kulula ukungayikhathaleli imilinganiselo emihle yokuphila. Akumangalisi ukuba kube kumazwe amaninzi amapolisa alwa idabi elingayi ndawo, kweli hlabathi lizaliswe lulwaphulo-mthetho, enoba kukwizinto ezincinane okanye kwezinkulu.

Kwelinye icala, bakho abantu abathobela imithetho ngenxa yentlonelo yabo ngegunya. Umpostile uPawulos waxelela amaKristu aseRoma ukuba afanele athobele igunya elivunyelwe nguThixo ukuba libekho, kuba lilondoloza ucwangco kwibutho labantu ngomlinganiselo othile. Ethetha ngeli gunya, wabhala: “Lingumlungiseleli kaThixo, umphindezeli wokubonakalisa ingqumbo kulowo uqhelisela okubi. Ngoko ke kukho isizathu esinyanzelisayo sokuba nithobele, kungekuphela ngenxa yengqumbo leyo kodwa kwanangenxa yesazela senu.”—Roma 13:4, 5.

Ukutshintsha Kweemeko Kwibutho Labantu

Ngokuqinisekileyo, umsebenzi wamapolisa unalo igalelo ekuphuculeni iimeko kwibutho labantu. Xa abantu bebona ukuba azikho izinto ezinjengeziyobisi nogonyamelo kwindawo abahlala kuyo, baye bazame ukuziphatha ngendlela efanelekileyo. Kodwa eneneni, amapolisa akanakuze akwazi ukuphucula indlela yokuphila kwabantu.

Ngaba unomfanekiso-ngqondweni wendawo enabantu abawuhlonelayo umthetho kangangokude kungabikho mfuneko yamapolisa? Unawo na umbono wendawo enabantu abathandanayo abakulungeleyo ukuncedana apho kungekho mfuneko yakuncedwa ngamapolisa? Mhlawumbi oku kuvakala njengentsomi. Kodwa la mazwi kaYesu, nangona wawathetha ebhekisela kwenye into, ayasebenza nakule nkalo. Wathi: “Ebantwini le yinto engenakwenzeka, kodwa kuThixo izinto zonke zinako ukwenzeka.”—Mateyu 19:26.

IBhayibhile ithi kwixesha elizayo bonke abantu baya kulawulwa ngurhulumente omiselwe nguYehova uThixo. “UThixo wezulu uya kumisa ubukumkani . . . Buya kuzityumza buziphelise zonke ezi zikumkani.” (Daniyeli 2:44) Lo rhulumente uya kufundisa bonke abantu abanyanisekileyo indlela kaThixo yothando, nto leyo eya kutshintsha iimeko ezibangela ulwaphulo-mthetho kwibutho labantu. “Umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.” (Isaya 11:9) UKumkani omiselwe nguYehova, uYesu Kristu, uya kukwazi ukuthintela zonke iintlobo zolwaphulo-mthetho. “Akayi kugweba ngayo nayiphi na imbonakalo nje esemehlweni akhe, engayi kohlwaya ngokwento nje eviwe ziindlebe zakhe. Uya kuzigweba izisweli ngobulungisa, abohlwaye ngokuthe tye abo balulamileyo bomhlaba.”—Isaya 11:3, 4.

Aziyi kubakho izaphuli-mthetho okanye ulwaphulo-mthetho. Akuyi kubakho mfuneko yamapolisa. Bonke abantu “okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.” (Mika 4:4) Ukuba ufuna ukuba ngomnye wabo baya kuphila ‘kumhlaba omtsha’ ekuthethwa ngawo eBhayibhileni, lixesha lokuba uhlolisise izithembiso zikaThixo ezifumaneka eLizwini lakhe.—2 Petros 3:13.

[Amagama acatshulweyo akwiphepha 12]

Ngaba unomfanekiso-ngqondweni wendawo enabantu abawuhlonelayo umthetho kangangokude kungabikho mfuneko yamapolisa?

[Amagama acatshulweyo akwiphepha 12]

Aziyi kubakho izaphuli-mthetho okanye ulwaphulo-mthetho

[Ibhokisi/Umfanekiso okwiphepha 11]

Ukulwa Kwamapolisa Nabanqolobi

Njengoko kwabonakala kwiziganeko ezenzeka ngoSeptemba 11, 2001, kwisiXeko saseNew York naseWashington, D.C., ukuqweqwediswa kweenqwelo-moya, ukuthinjwa kwabantu nokubakho kwabanqolobi, kubangela ukuba kube nzima gqitha ngamapolisa ukukhusela abantu. Kwiindawo ezininzi ehlabathini kuye kwakho amaqela amapolisa aqeqeshwe ngokukhethekileyo ukuze ahlangule iinqwelo-moya eziqweqwediswayo. Kwakhona afundiswa ubuchule bokungena kwizakhiwo ngokungalindelekanga—ukungena eluphahleni ngentambo, ukungena ngefestile nokuphosa iibhombu zokwenza abantu bangabikho zingqondweni okwethutyana nokusebenzisa izintywizisi. La mapolisa aqeqeshwe ngale ndlela adla ngokuphumelela ekothuseni nasekoyiseni abanqolobi engakhange abubeke mngciphekweni kangako ubomi babantu abathinjiweyo.

[Inkcazelo]

James R. Tourtellotte/U.S. Customs Service

[Umfanekiso okwiphepha 12]

Izinto ezingayi kuba yimfuneko kwihlabathi elitsha likaThixo