Ngaba Ufanele Ufune Ulwalathiso Kumanani?

NGABA ukuvumisa ngamanani kubonakala kusengqiqweni xa kuthelekiswa nenzululwazi nezibakala? Ngaba simele sixhomekeke kumanani ukuze sazi ikamva lethu? Ngaba ikamva lakho lifanele lisekelwe kwinkcazelo noqikelelo lwabantu abavumisa ngamanani?

Eny’ into eseyinkohla kubantu abavumisa ngamanani kukusetyenziswa kweekhalenda ezahlukahlukeneyo kwiindawo ngeendawo. Ngokomzekelo, kuthekani ukuba kusetyenziswa ikhalenda yamaTshayina kwindawo ohlala kuyo? Cinga nje ngomhla okhankanywe kwinqaku lokuqala—uSeptemba 11, 2001. Ngokwekhalenda yamaTshayina, lowo yayingumhla wama-24 wenyanga yesi-7 kunyaka we-18 kumjikelo wama-78. Kwikhalenda kaJulian, lowo yayingumhla ka-Agasti 29, 2001. Kwikhalenda yamaSilamsi, yayingowama-22 Jumada II 1422, ngoxa kweyamaHebhere yayingowama-23 Elul 5761. Bekunokwenzeka njani ukuba usuku olwahluke ngaloo ndlela lube nentsingiselo efanayo? Nantsi eny’ ingongoma: Lwimi ngalunye lunendlela yalo yokubhala amagama. Ngokomzekelo, oonobumba begama lesiNgesi elithi John bamelwa linani elisisi-2, kodwa ngeSpanish oonobumba belo gama linye—uJuan—bamelwa linani elisisi-1.

Inyaniso kukuba izinto ezininzi zendalo zinokuchazwa ngokusekelwe kumanani. Loo nkcazelo inokuhlalutywa kuze kufunyaniswe ukuchana kwayo. Kodwa oku kwahluke ngokupheleleyo ekuthini igama lakho, umhla owazalwa ngawo, namanani athile, anokukuchazela ngesiphelo sakho.

Lizicacele elokuba: Ekubeni abavumisi ngamanani besebenzisa iikhalenda neelwimi ezahlukahlukeneyo, akukho ngqiqweni kwaphela ukukholelwa ukuba inkcazelo abayinikelayo ichanile.

‘Ixesha Nesihlo’

Abanye abantu baba nomdla ekuvumiseni ngamanani kuba befuna ukwazi ikamva labo. Noko ke, iBhayibhile ikwenza kucace ukuba akukho mntu unokulazi kwangaphambili ikamva lakhe. Sifunda oku: “Ukukhawuleza asikokwababalekayo, idabi asilolabanamandla, nokutya asikokwezilumko, nobutyebi asibobabanokuqonda, kwanobabalo asilolwabanokwazi; ngenxa yokuba bonke behlelwa lixesha nasisihlo esingenakubonwa kwangaphambili.” (INtshumayeli 9:11) Ewe, iziganeko ezininzi zenzeka zingalindelekanga. Ngenxa yoko akukho mntu ukwazi ukuchaza ikamva ngokusekelwe kumhla wokuzalwa okanye kwinani elimela igama.

Cinga nje ngomnye umzekelo: Xa ikhuthaza ukuba nesisa, iBhayibhile ithi: “Siphose isonka sakho phezu kwamanzi, kuba uya kuphinda usifumane emva kwemihla emininzi. Nika babe sixhenxe isahlulo sakho, okanye abasibhozo, kuba akuyazi intlekele eya kwenzeka emhlabeni.” (INtshumayeli 11:1, 2) Ngaphandle kweemeko ezimbalwa, abantu abazazi—eneneni abanakuzazi—kusengaphambili izinto eziza kubehlela. Ngenxa yoko, unjingalwazi wezibalo u-Underwood Dudley ubhala athi ngabavumisi ngamanani: “Bayasilibala isibakala sokuba ezinye izinto zenzeka zingalindelekanga. Iintlekele zinokusuka zenzeke nje zingalindelekanga.”

Liyinyaniso elokuba ezinye izinto ezithethwa ngabavumisi ngamanani ziba yinyaniso. Yintoni ebangela oku? Kwezinye iimeko, iba kukungqamana nje kweziganeko. Kanti, maxa wambi abavumisi ngamanani banokuthetha into eneentsingiselo ezininzi, nenokungqamana neziganeko eziliqela. Kodwa kukho omnye umbandela onzulu esifanele siwuqwalasele.

Ngaba Luhlobo Lokuvumisa?

Ukuvumisa ngamanani akukhankanywa eBhayibhileni. Kodwa ithetha ngoHaman, umAmaleki owenza iyelenqe lokubulala amaYuda awayehlala ePersi ngenkulungwane yesihlanu ngaphambi kweXesha Eliqhelekileyo. Le ngxelo ithi: “UHaman wayalela ukuba kwenziwe amaqashiso (ipuri) ukuze kukhethwe usuku nenyanga efanelekileyo yokuphumeza iyelenqe lakhe. Kwafikelelwa kwisigqibo sokuba elo yelenqe liphunyezwe ngomhla weshumi elinesithathu ngenyanga yeshumi elinambini uAdari.” (akekeliswe sithi)—Estere 3:7, iToday’s English Version.

Kumaxesha amandulo, ukwenza amaqashiso kwakuyindlela esemthethweni eyayisetyenziswa ukuzinzisa iimbambano.a (IMizekeliso 18:18) Kodwa uHaman wayevumisa xa wayesenza loo maqashiso—nto leyo engavunyelwayo yiBhayibhile. IDuteronomi 18:10-12 ithi uThixo uyamcekisa ‘nabani na ovumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili. . . . UYehova uyamcekisa wonke ubani ozenzayo ezi zinto.’

IBhayibhile ithi ukuvumisa nokuthembela kumandla angaphaya kwawemvelo kunxibelelene nokusebenzelana nemimoya. Imimoya engendawo inokubangela ukuba kuhle iziganeko ukuze kuzaliseke ukuthanda kwayo. Enokuba oko ayikwenzi kuzo zonke izinto, nantsi into esimele siqiniseke ngayo: Ukusebenzelana nemimoya akufunwa nguThixo, yaye kunokubangela umntu abe likhoboka lemimoya engendawo.—1 Samuweli 15:23; Efese 6:12.

Ukuvumisa ngamanani akusekelwanga kwinzululwazi, yaye kungqineka kulilize xa kuhlalutywa ngokwezibakala. Okona kubaluleke nangakumbi kukuba, ngenxa yokuba kuluhlobo oluthile lokuvumisa, kuchasene neemfundiso zeBhayibhile. Ngenxa yoko, ubomi nekamva lakho abumele buxhomekeke ekuvumiseni ngamanani.

[Umbhalo osemazantsi]

[Ibhokisi ekwiphepha 22]

UKUSETYENZISWA KWEEKHALENDA EZAHLUKAHLUKENEYO KWENZA KUBE YINGXAKI UKUVUMISA NGAMANANI

KWEKAGREGORY yayinguSeptemba 11, 2001

KWEKAJULIAN yayinguAgasti 29, 2001

KWEYAMASILAMSI yayingowama-22 Jumada II 1422

KWEYAMAHEBHERE yayingowama-23 Elul 5761

[Ibhokisi/Imifanekiso ekwiphepha 23]

NGABA UKUVUMISA NGEENKWENKWEZI KUNOKUTHENJWA?

“Maxa wambi uyakuthanda ukuhlala nabahlobo, kodwa ngamany’ amaxesha uba ngumntu othuleyo. Akuthandi ukuthetha yonke into ngesiqu sakho kubantu ongabaziyo. Ungumntu owasebenzisayo amathambo engqondo yaye akwamkeli yonke into ongenabungqina bayo. Uthanda ukwenza izinto ezahlukahlukeneyo ebomini, yaye akuthandi kubotshelelwa yimithetho emininzi. Unobuchule bokwenza izinto ezininzi ebomini, kodwa akukabusebenzisi ngokupheleleyo. Akudli ngokwaneliseka ngumsebenzi owenzileyo okanye ubuchule bakho.”

Ngaba unjalo nawe? Ukuba utsho, uwuphosil’ umhlola. Kaloku baninzi abantu abanezi mpawu zikhankanywe ngasentla. Ngenxa yoko, abantu abakholelwa kwiinkwenkwezi batyekele ekwamkeleni inkcazelo abacinga ukuba ichanile, baze bayiyeke leyo ingachananga. Ngokutsho kwencwadi ethi Why Do Buses Come in Threes—The Hidden Mathematics of Everyday Life, “abaphandi bafumanise ukuba xa kungabekwanga phawu, abantu badla ngokungakwazi ukubona ukuba yiyiphi inkcazelo ebhekisela kubo, kodwa xa bebona uphawu badla ngokukholelwa ukuba loo nkcazelo yeyona ichanileyo.”

[Ibhokisi ekwiphepha 24]

AMANANI OKOMFUZISELO ASEBHAYIBHILENI

Amanye amanani aseBhayibhileni aneentsingiselo ezifuziselayo, kodwa afuzisela izinto ekuthethwa ngazo eZibhalweni kuphela. Ngokomzekelo, ukusetyenziswa kwenani isine, kufuzisela ukuphelela kwezinto okanye ukuqukwa kwayo yonke into. Oku sinokukubona kumazwi anjengala “kwiziphelo ezine zomhlaba” nathi ‘kwimimoya yomine yamazulu.’ (Isaya 11:12; Daniyeli 8:8) Maxa wambi, inani isithandathu lifuzisela ukungafezeki. Okubangel’ umdla kukuba, kwincwadi yeSityhilelo, inani ekuthiywe ngalo intlangano yasemhlabeni yezobupolitika kaSathana “linani lomntu”—ama-666. (ISityhilelo 13:18) Apha eli nani liphindwe izihlandlo ezithathu, nto leyo ebalaselisa ukungafezeki kwale ntlangano ifana nerhamncwa. Xa inani isixhenxe lisetyenziswe ngendlela efuziselayo, limela ukugqibelela kwento. (Levitikus 4:6; Hebhere 9:24-26) Intsingiselo yala manani namanye afuziselayo aseZibhalweni ifumaneka kumongo weziprofeto asetyenziswe kuzo.

Nangona iZibhalo zibonisa ukubaluleka kwamanani athile, iBhayibhile ayikhuthazi ukunxulunyaniswa kwamagama athile namanani ukuze kuqondwe imibandela entsonkothileyo.

[Umfanekiso okwiphepha 24]

UHaman wavumisa ukuze akhethe umhla wokuphumeza iyelenqe lakhe lokubulala uhlanga