Ukhokelo Olunokuthenjwa Ngekamva

NGABA ukungabi nasihlahla kwezinto ezithethwa ngabavumisi ngamanani nezinye iintlobo zokuvumisa kuthetha ukuba asinakuze silazi ikamva? Akunjalo konke konke!

Amanani akanakuze asixelele oko sikufunjathelwe likamva. Kodwa ‘nguThixo ophilayo’ ‘oxela ukuphela kwasekuqaleni’ okwaziyo. Usebenzisa iLizwi lakhe iBhayibhile. (1 Timoti 4:10; Isaya 46:10) Ilizwi loThixo ophilayo, ‘liyakwazi ukuphicotha iingcamango notyekelo lwentliziyo’ yaye lilo elinokukunceda uqonde iintshukumisa zakho noko kunokukwenza uphumelele ngokwenene, kungekhona abavumisi ngamanani.—Hebhere 4:12.

NguMdali wethu, onguMbhali weBhayibhile kuphela onokusixelela inyaniso ngekamva. Oku kungenxa yokuba uThixo unamandla, yaye unokuthenjwa. UYehova uThixo wathi: ‘Ndikuthethile oko, yaye ndiya kukwenza.’ (Isaya 46:11) Emva kokukhokelela amaSirayeli kwiLizwe Lesithembiso, eqinisekile uYoshuwa wathi: “Akukho sithembiso sasilelayo kuzo zonke izithembiso ezilungileyo uYehova awayezenzile kwindlu kaSirayeli; zonke zaba yinyaniso.”—Yoshuwa 21:45; 23:14.

IBhayibhile ineziprofeto ezininzi ezingekazaliseki. Ezinye zazo zisixelela ukuba ubungendawo buza kupheliswa emhlabeni uze wenziwe iparadesi. (INdumiso 37:10, 11; IMizekeliso 2:21, 22) Ngaba oko akubangeli mdla kuwe? Ngaba uyakholelwa ukuba uMdali wethu unobulumko namandla okulungisa izinto kwesi sijikelezi-langa? Ukuba kunjalo, hlolisisa oko kuthethwa yiBhayibhile ngekamva lomhlaba.a

Ngenxa yoko, lisebenzise ngobulumko ngoku ixesha onalo—ungazami ukwazi ikamva lakho ngokujonga kumanani, kodwa zabalazela ukuzuza ulwazi oluchanileyo ngeBhayibhile neziprofeto zayo. AmaNgqina kaYehova akulungele ukukunceda ufumane ulwazi olungakumbi ngekamva ekuthethwa ngalo kwiLizwi likaThixo, iBhayibhile.

[Umbhalo osemazantsi]