Wuqonde Ngokupheleleyo Umbandela

Kunzima ukuyiqonda ngokupheleleyo eminye imibandela. Urhulumente nezinye iinkampani azidli ngokunikela iinkcukacha ezipheleleyo ngemibandela ethile. Amajelo amakhulu eendaba adla ngokuthembisa ukuba aza kuzichaza ngokupheleleyo iinkcukacha zemibandela ethile, kodwa ezo zithembiso ziphelela emoyeni. Oogqirha abasoloko bezichaza zonke izigulo ezinokubangelwa kukusela amayeza abasinika wona. Ngaba ikho indlela yokufumana inkcazelo enokuthenjwa?

Ukufika kwe-Internet kwaqhwatyelw’ izandla ngabaninzi besithi ngowona mthombo wenkcazelo enokuthenjwa ehlabathini lonke. Kakade ke kusenokuba kunjalo, ukuba nje umntu uyayazi indawo anokuyifumana kuyo loo nkcazelo. Ingxelo yeThe New York Times yathi: “Eyona ngenelo nge-Internet kukuba inokuba luncedo ekufundiseni abantu ngokukhawuleza ukudlula naliphi na ijelo leendaba. Ukanti ngaphezu kwalo naliphi na ijelo leendaba, inokwenza ukuba umntu abe sisidenge.”

Le ngxelo yahlabela mgama yathi: “Ekubeni abantu beyithabathela phezulu i-Internet ngenxa ‘yobugcisa’ bayo, abantu abangafundanga ngabona bayikholelwayo inkcazelo abayifumana kuyo. Abaqondi ukuba eyona nto imbi nge-Internet kukuba ifana nje nejelo lokuhambisa ilindle: ilijelo le-elektroniki elihambisa inkcazelo ekungekho bungqina bayo nengacocekanga.” Njengoko umbhali ebonisile, okubuhlungu kukuba akukho nkqubo yekhompyutha yokucima inkcazelo enjalo.

Izinto ezikwi-Internet, kwiphephancwadi okanye kwincwadi zinokubhalwa nangubani na. Ngoko sifanele sisebenzise ubulumko size siziqhelise ukungakholelwa yonke into esiyifundayo. Abo bafuna inkcazelo echanileyo bafanele baqinisekise ukuba ivela kumthombo onokuthenjwa. Oku kunokuthabath’ ixesha. Kodwa xa siwuqonda ngokupheleleyo umbandela othile, siya kuqiqa ngendlela efanelekileyo, senze izigqibo ezichanileyo size siqiniseke xa sisenza izigqibo ezibalulekileyo.