Into Embi Ngokuthanda Ifashoni
ALITHANDABUZEKI elokuba ukunxiba impahla esefashonini kunokuyiphucula inkangeleko yakho kukwenze uzithembe nangakumbi. Ukunxiba into ekufanelayo kunokuzifihla iziphako onazo emzimbeni yaye kunokuzenza zibonakale ngakumbi iimpawu zakho ezithandekayo. Kunokuba nempembelelo nakwindlela abakujonga ngayo abanye.
Kodwa zikho izinto ezimbi ngokuthanda ifashoni yaye loo nto ayifanele ibethwe ngoyaba. Abantu banokuzibona sele bequqa bebuyelela ezivenkileni besiya kuthenga iimpahla ezintsha. Ngapha koko, kusoloko kusithi gqi iifashoni ezintsha. Oku kubangelwa kukuba iinkampani ezenza iimpahla, zenza ingeniso xa ifashoni ikhawuleza iphelelwe. Njengoko umenzi weempahla uGabrielle Chanel esitsho, “ifashoni ikhawuleza iphelelwe lixesha.” Ngoko engaqondi, umntu unokuziva enyanzelekile ukuba athenge iimpahla ezintsha kuba nje engafuni kwahluka.
Kukwakho nengozi yokuba umntu unokude anikezele xa esoloko exelelwa ngento enye ngabathengisi. Iinkampani ezenza iimpahla zichitha izigidi zeerandi zibonisa ngeempahla zazo yaye zidla ngokwenza ngathi abantu abanxiba uhlobo oluthile lwempahla, abanazo iingxaki. Oku kunokuba nempembelelo enamandla ebantwini. Omnye umfundisi-ntsapho waseSpeyin uthi: “Kubantu abakwishumi elivisayo, akukho nto ibuhlungu njengokungabi ‘nahlobo luthile’ lwesihlangu.”
Umgibe Ngokuthanda Ifashoni
Abanye abantu banxiba ngendlela eyahlukileyo ukuze babonwe ukuba ngabeqela elithile. Isinxibo sabo sisenokubonisa ukuba abakhathali, bafuna ukwenza izinto ngendlela yabo okanye banogonyamelo okanye intiyo yobuhlanga. Nangona ezinye iindlela abanxiba ngazo zisenokuba azamkelekanga okanye zixhomis’ amehlo, abantu abakwiqela elithile badla ngokunxiba ngendlela efanayo. Nabantu abasenokuba abavumelani nezinto ezenziwa lelo qela, basenokuyithanda indlela elinxiba ngayo. Abo banxiba njengamalungu elo qela, basenokwenza abantu bacinge ukuba bayavumelana nalo yaye bayazixhasa izenzo zalo.
Ifashoni ifika iphinde idlule, ukanti maxa wambi ihlala nje iinyanga ezimbalwa. Isenokuqala ibonwe kwimvumi ethile edumileyo okanye kumntu owaziwayo kwezefashoni. Noko ke, ezinye iifashoni zihlala ixesha elide. Ngokomzekelo, iijini zazidla ngokunxitywa lulutsha olugwayimbileyo kwiminyaka yee-1950 neyee-1960. Noko ke, ngoku zinxitywa naphi na ngabantu abakubudala obahlukahlukeneyo.
Umnqweno Wokuba Nomzimba Omhle
Abantu abayithanda gqitha ifashoni basenokuzixhalabisa ngokugqithiseleyo ngenkangeleko yabo. Abantu ababonisa ngempahla esefashonini bathe ncothu yaye banemizimba emincinane yaye sisoloko siboniswa imifanekiso yabo.a Xa kuthengiswa izinto, ukususela kwiinqwelo-mafutha ukuya kwiilekese, kudla ngokuboniswa abantu abanemizimba “emihle” kuphela. I-Social Issues Research Centre yaseBritani iqikelela ukuba “ngosuku nje olunye, amabhinqa aselula abona imifanekiso yeembelukazi emininzi ngakumbi kunaleyo yabonwa ngoonina ngoxa babeselula.”
Ukusoloko ubona le mifanekiso kunokuba nempembelelo enkulu kuwe. Ngokomzekelo, olunye uhlolisiso olwacatshulwa kwi-Newsweek lwabonisa ukuba kumantombazana amhlophe akwishumi elivisayo e-United States, angama-90 ekhulwini akayithandi imizimba yawo. Amanye ala mantombazana axolel’ ukwenza nantoni na ukuze abe ‘nemizimba emihle.’ Sekunjalo, i-Social Issues Research Centre ithi angaphantsi nakwi-5 ekhulwini amabhinqa anokukwazi ukuba naloo mizimba. Sekunjalo, umnqweno wokuba nomzimba omncinane uye wawakhoboza amabhinqa aselula amaninzi. Uye wabangela ukuba amanye abe ne-anorexia nervosa.b UNieves Álvarez, ibhinqa laseSpeyin elibonisa ngempahla esefashonini elalikhe lane-anorexia lithi: “Ndandisoyika ukutyeba ngaphezu kokufa.”
Liyinyaniso elokuba, i-anorexia ne-bulimia zinokubangelwa nazezinye izinto. Noko ke, uGqr. Anne Guillemot noMichel Laxenaire bathi: “Ukufuna ukuba nomzimba omncinane kunegalelo kwezi zigulo.”
Ngokucacileyo, ukuthanda ifashoni kunazo iingenelo kodwa kunayo nemigibe. Kwanelisa umnqweno wemvelo wokufuna ukunxiba ngendlela eyamkelekileyo nokufuna ukunxiba into entsha. Kodwa xa sithanda ifashoni ngokugqithiseleyo sinokude sinxibe izinto eziya kwenza abanye babe nembono ephosakeleyo ngathi. Yaye ukuba sigqala inkangeleko njengeyona nto ibalulekileyo, sisenokude samkele ingcamango ephosakeleyo yokuba ubuntu bethu abubalulekanga kuba “yindlela esinxiba ngayo” kuphela esenza sixabiseke. UÁlvarez ocatshulwe ngaphambili uthi: “Sifanele sinikel’ ingqalelo kubuchule bomntu nakubuntu bakhe kunokuba sijonge indlela anxiba ngayo.” Kodwa kubonakala ngathi kuza kuthabath’ ixesha ngaphambi kokuba abantu batshintshe isimo sabo sengqondo. Ngoko ke, yintoni enokusinceda sibe nembono elungeleleneyo ngefashoni?
[Imibhalo esemazantsi]
a Iphephancwadi iTime lithi ngokuqhelekileyo kulindeleke ukuba abantu ababonisa ngempahla esefashonini “babe malunga neemitha ezisisi-1.74 ubude, babe nemizimba emincinane kakhulu, imilebe emikhulu, izandundu ezitsolo, amehlo amakhulu, imilenze emide nempumlo etsolo.”
b I-U.S. National Association of Anorexia Nervosa and Associated Disorders iqikelela ukuba eUnited States kuphela, bazizigidi ezisibhozo abantu abaphathwa yi-anorexia yaye abanye ide ibabulale. Abantu abaninzi (abangama-86 ekhulwini) baqalisa ukuba neengxaki ezibangelwa kukungatyi ngendlela efanelekileyo bengekafiki nakwiminyaka engama-21 ubudala.
[Ibhokisi/Imifanekiso ekwiphepha 8, 9]
Ngaba Ukho Umntu Onokunxiba Loo Nto?
Ngentwasahlobo nasekwindla, iindawo ezenza iimpahla zase-New York, eParis nezaseMilan zisoloko zibonisa impahla yodidi oluphezulu eyenziwe ngabenzi beempahla abadumileyo. Ngaphandle nje kwexabiso lazo elixhomileyo, ezinye iimpahla akunakukwazi nokuzinxiba. UJuan Duyos waseSpeyin owenza iimpahla uthi: “Iimpahla ezinobugoci-goci odla ngokuzibona azenzelwanga kunxitywa. Eyona njongo yomboniso wefashoni isenokungabi kukuthengisa iimpahla eziboniswayo, kodwa ibe kukunikela ingqalelo kumntu ozenzileyo okanye igama lazo. Ngokomzekelo, iifashoni ezinomtsalane kubachola-choli beendaba zisenokuba luncedo ekuthengiseni uhlobo oluthile lwesiqholo.”
[Umfanekiso okwiphepha 7]
Ukuthanda ifashoni kunokubiza imali eninzi
[Umfanekiso okwiphepha 7]
Abanye baye baba ne-“anorexia”
[Umfanekiso okwiphepha 7]
Ukunxiba ngohlobo oluthile kunokubangela ukuba wayanyaniswe neqela elithile