Imbono Elungeleleneyo Ngefashoni
IBHAYIBHILE ithi uThixo ‘wenze yonke into yantle ngexesha layo.’ (INtshumayeli 3:11) Zonke izinto ezisingqongileyo zintle. Nabantu bahle.
Abenzi beempahla bazama ukwenza ukuba iimpahla zethu zivelise obo buhle. Kodwa njengoko kuboniswe kwinqaku elingaphambili, ishishini lempahla liye layitshintsha indlela esibujonga ngayo ubuhle. UNjingalwazi wezifundo eziphathelele ukusebenza kwengqondo uRuth Striegel-Moore uthi: “Kuqhelekile ukubona amabhinqa anemizimba emincinane kangangokuba abantu bacinga ukuba ukuze ube mhle kufuneka ulingane nawo.”
Ngokucacileyo, ibingayi kuba bubulumko ukuvumela ihlabathi liphembelele indlela esibujonga ngayo ubuhle. Kwincwadi yakhe ethi Always in Style, uDoris Pooser uthi “namhlanje akukho mfuneko yokuba ibhinqa litshintshe imbonakalo yalo kuba nje lifuna ukunxiba ngendlela ‘eyamkelekileyo.’” Enyanisweni, kutheni sifanele sivumele amajelo eendaba abe nempembelelo kwindlela esicinga ngayo? Lo kaPooser uthi: “Hayi indlela ekumnandi ngayo ukuphila ubomi bakho ngendlela ethandwa nguwe ungazami ukutshintsha inkangeleko yakho.”
Ubuhle Obungapheliyo
Ubuhle asikokuphela kwento ebangela ukuba umntu azithembe aze aneliseke ebomini. UJudy Sargent owayekhe wane-anorexia ubhala enjenje: “Ulonwabo lokwenene lubangelwa yindlela ovakalelwa ngayo. Aluxhomekekanga kubunzima bomzimba wakho.” IBhayibhile ithetha okungakumbi ngalo mbandela. Umpostile uPetros wabhala wathi: “Ubuhle bakho bumele buquke ubuntu bangaphakathi, ubuhle obuhlala buhleli bomoya omhle nozolileyo, into ebaluleke gqitha emehlweni kaThixo.”—1 Petros 3:4, Today’s English Version.
Ubuhle obuhlala buhleli abhekisela kubo uPetros buyabodlula ubuhle bangaphandle kuba bona bubuhle obungapheliyo yaye bubalulekile emehlweni kaThixo. Kwiinkulungwane ezininzi ezidluleyo, ukumkani osisilumko wathi: “Umtsalane usenokuba yinkohliso, nobuhle busenokuba lilize; kodwa ngumfazi owoyika uYehova oya kudunyiswa.”—IMizekeliso 31:30.
Nangona umntu omhle esenokuba ngoyena unomtsalane ebantwini, abantu abaninzi bahlonela umntu oneempawu zobuKristu. Umpostile uPawulos wabongoza amaKristu: ‘Yambathani ubuntu obutsha, umsa wemfesane, ububele, ukuthobeka kwengqondo, ubulali, nokuzeka kade umsindo.’—Kolose 3:10, 12.
Ifashoni yinto edlulayo. Ayikhe ihlale ixesha elide. Kodwa kungakhathaliseki ukuba sibahle kangakanani, ukuba abantu banezinto abangazithandiyo kubuntu bethu, buyaphela obo buhle. Khumbula ukuba “isiqhamo somoya”—esiquka uthando, uvuyo, uxolo, ukuzeka kade umsindo, ububele, nokuzeyisa—asiphelelwa lixesha.—Galati 5:22, 23; 1 Timoti 2:9, 10.
Noko ke, kuyavunywa ukuba sifanele sinikele ingqalelo kwindlela esinxiba ngayo. UAline waseFransi uthi kwakungelula ukuba ngolungeleleneyo kule nkalo. Uthi: “Ngoxa ndandiselula, ndandizithanda kakhulu iimpahla. Ndandifuna ukunxiba izinto ezisefashonini kuba oko kwakundenza ndizithembe. Yaye ndandikuthanda gqitha ukuthenga impahla enegama.”
UAline wongezelela athi: “Kodwa ndithe ndakukhula kwanyanzeleka ndifunde ukuzimela, ndaza ndachitha ixesha elininzi kubulungiseleli bamaKristu. Ndaqonda ukuba ukuze ndingabi likhoboka lamatyala, ndifanele ndahlukane nokuthanda ifashoni. Ndaqalisa ukuthenga impahla xa ethotyiwe amaxabiso okanye kwiivenkile ezithengisa impahla ngamaxabiso aphantsi. Ndafumanisa ukuba ndinako ukunxiba kakuhle—kodwa ndichithe nje ikota yemali endidla ngokuyichitha ezimpahleni. Imfihlelo kukuthenga impahla ekufanelayo, onokukwazi ukuyinxiba, onokuyinxiba nempahla osele unayo nengasoze ikhawuleze iphume efashonini. Kunokuba ndiphenjelelwe yifashoni xa ndithenga impahla, ndithenga impahla endifanelayo. Andinakuthi ayibalulekanga indlela endinxiba ngayo. Kodwa asiyondlela endinxiba ngayo kuphela endenza ndibe nexabiso.”
Kweli butho labantu lixabise imbonakalo kuneempawu zomntu ezintle, amaKristu afanele akhumbule esi siluleko seBhayibhile sibalulekileyo: “Konke okusehlabathini—inkanuko yenyama nenkanuko yamehlo nokuqhayisa ngezinto zobu bomi—akuphumi kuBawo, kodwa kuphuma ehlabathini. Ngapha koko, ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.”—1 Yohane 2:16, 17.
[Umfanekiso okwiphepha 9]
Eyona nto ikwenza ube mhle ngokwenene, ngumntu onguye ngaphakathi, kungekhona indlela onxibe ngayo
[Umfanekiso okwiphepha 10]
Khetha impahla oza kukwazi ukuyinxiba nonokukwazi ukuyinxiba neempahla osele unazo