Unxibelelwano—Lubalulekile Kwizinto Eziphilayo
XA WAYESELUSANA uJulie, abazali bakhe babelindele ngolangazelelo olukhulu umhla aya kuqalisa ngawo ukuthetha. Unina kaJulie uthi: “Akukho nto ivuyisa umzali njengokuva usana lwakhe lusithi ‘Mama’ okanye ‘Tata.’ Ukuqala kwam ukuva uJulie esithi ‘Mama,’ kwaba ngathi undanga ngezo ngadlwana zakhe yaye uthi: ‘UnguMama wam. Ndiyakuthanda, yaye ndifuna ukuncokola nawe.’ Ndiya kuhlala ndisikhumbula eso sihlandlo sikhethekileyo.” Ewe, ukukwazi ukunxibelelana sisipho esixabiseke ngokwenene!
Kakade ke, asingobantu kuphela izidalwa ezikwaziyo ukunxibelelana. Nangona ubukhulu becala zilawulwa lithuku, izilwanyana ziyakwazi nokunxibelelana ngeendlela ezibalaseleyo. Ngokomzekelo, minyaka le kwiAntarctica enomkhenkce, ngaphambi kokuba kufike ubusika, inkunzi nemazi yephengwini zenza intsholo—yaye aziyenzi nje ngenjongo yokuzonwabisa. Ubomi bentshontsho eliza kuzalwa yile nkunzi nale mazi buxhomekeke kule ndlela yazo yokunxibelelana. Njani?
Xa igqiba kuzalela iqanda, imazi ilifaka kwisingxobo esikwiqabane layo ukuze liliqandusele ngoxa yona isaya kufuna ukutya elwandle. Emva kweentsuku ezingama-65, ibuya sele itshibiliza ngesisu emkhenkceni kangangeekhilomitha ezili-150. Ingumnqa indlela ekwazi ngayo ukufumana loo ndawo zihlala kuyo, kodwa imazi ikwazi njani ukufumana iqabane layo nelo ntshontsho lisandul’ ukuqanduselwa phakathi kwaloo mashumi amawaka eenkunzi zeephengwini ezenza intsholo? Ebudeni bokuthandana kwazo, ntaka nganye igcina ingoma yenye kakuhle kangangokuba ziphinda zazane nasemva kweenyanga zahlukene!
Ukongezelela kwezi zandi zahlukahlukeneyo, izilwanyana zinxibelelana ngezimbo zomzimba, imibala ngemibala etsala ingqalelo, ngokuvelisa ukukhanya okumibalabala nangamavumba ahlukahlukeneyo. Nangona oku kusenokuba nzima ukukukholelwa, kwanezityalo ziyakwazi ukunxibelelana nezinye izityalo nezilwanyana ezithile, njengoko siza kubona. Ewe, ukunxibelelana kubaluleke ngokwenene kwizinto ezintsonkothileyo eziphilayo emhlabeni nezixhomekeke kakhulu enye kwenye.
Ngaba ufuna ukwazi okungakumbi ngezinye iintlobo zonxibelelwano ezimangalisayo ezisehlabathini? Ngaba ungathanda ukwazi ngakumbi ngobuchule bakho bokunxibelelana ukuze ubuphucule? La manqaku alandelayo anokukunceda.
[Umfanekiso okwiphepha 19]
Imazi yephengwini ikwazi njani ukuphinda ifumane iqabane layo?