Unxibelelwano Olukhokelela Ebomini
KUZO zonke izidalwa ezisemhlabeni, ngabantu kuphela abanganeliswa nje kukunxibelelana nabanye. Kungakhathaliseki ukuba ngabaluphi na uhlanga, udidi, ngamadoda okanye ngamabhinqa, bakuwuphi na umgangatho wemfundo, ngokwemvelo abantu banomnqweno wokunxibelelana noyena uphakamileyo, uThixo.
Ngaba le yinkolelo nje yobudenge? Nakanye! Njengokuba kuchazwe kwinqaku elingaphambili, uThixo wabadala abantu ngokomfanekiso wakhe. Wasenza sanomdla wokuqonda izinto zokomoya. Oku kuquka umnqweno wokunxibelelana naye njengoBawo wethu wasezulwini. (Genesis 1:27; Mateyu 5:3) Enyanisweni, uThixo ukugqala ukunxibelelana naye njengento ebaluleke gqitha kangangokuba ubizwa ngokuba ‘nguMphulaphuli wemithandazo.’—INdumiso 65:2.
Hayi indlela ekulilungelo ngayo ukuthandaza kuSomandla! Inkoliso yabantu ibiya kukugqala njengelungelo ukuthetha ekhusini nesihandiba esibalulekileyo, njengomongameli okanye inkulumbuso. Ukanti, uYehova uThixo ngoyena mntu uphakamileyo kuyo yonke indalo! Yaye akuyomfuneko ukuba siqale senze idinga ukuze sithethe naye. Sinokuthandaza nangaliphi na ixesha, nokuba siphi na. Sinako ukuthandaza kuThixo ngentliziyo. (1 Samuweli 1:12-15) Noko ke, uYehova ufuna ukuba sinyaniseke yaye simthobele. (Mika 6:8; Mateyu 6:5-13) Kaloku, ukuze abantu banxibelelane ngokuphumelelayo kufuneka baphulaphulane, andithi?
Ngaba Uyamphulaphula UThixo?
Umntu umphulaphula njani uThixo? Ngokuyintloko umphulaphula ngokufunda aze asebenzise iimfundiso ezifumaneka kwiLizwi lakhe elibhaliweyo, iBhayibhile Engcwele. (2 Timoti 3:16; 2 Petros 1:20, 21) UYesu wathi: “Umntu, uphila ngamazwi onke aphuma emlonyeni kaYehova.” (Mateyu 4:4) Ngaba uyamphulaphula uThixo ngokufunda iLizwi lakhe elibhaliweyo uze ulisebenzise?
Abo banxibelelana rhoqo noYehova bafumana inkoliseko yakhe yaye banandipha “uxolo lukaThixo olungaphaya kokuqonda.” (Filipi 4:6, 7; IMizekeliso 1:33) Kwakhona banethemba lobomi obungunaphakade kumhlaba oyiparadesi, apho kungayi kubakho maxhala nokubandezeleka okukhoyo namhlanje. (INdumiso 37:29; Yohane 17:3) Onjani wona ukuba mkhulu umvuzo oya kufunyanwa ngabo balisebenzisa kakuhle eli lungiselelo limangalisayo lokunxibelelana!
[Umfanekiso okwiphepha 26]
Ukunxibelelana noThixo kuquka ukufunda iBhayibhile nokuthandaza