UYehova NoKristu—Abona Banxibelelanisi Babalaseleyo

“Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”—AMOSI 3:7.

1. Ziziphi iindlela zonxibelelwano ezisetyenziswayo namhlanje?

NAMHLANJE unxibelelwano lulushishino olunemali eninzi. Zonke iincwadi ezipapashwayo, onke amaphephandaba namaphephancwadi ashicilelwayo ngalo lonke ixesha, zonke iinkqubo zikanomathotholo nezikamabonwakude ezisasazwayo, nayo yonke imifanekiso-bhanyabhanya nemidlalo yeqonga, yimigudu yonxibelelwano. Kukwanjalo nangazo zonke iileta ezibhalwayo zize ziposwe ndawonye nayo yonke iminxeba etsalwayo. Zonke ezi ziyimigudu yokunxibelelana.

2. Yiyiphi eminye yemizekelo yenkqubela abantu abaye bayenza kwicala lezobugcisa kwezonxibelelwano?

² Inkqubela eyenziwe ngabantu kwicala lobugcisa kwezonxibelelwano yengathethekiyo. Ngokomzekelo, iingcingo zemfonomfono ezenziwe ngohlobo oluthile lomqhaphu, eziphucuke ngaphezu kweengcingo ezenziwe ngobhedu, zinokwamkela iminxeba eyahlukahlukeneyo engamashumi amawaka ngaxeshanye. Kanti kukho neziphekepheke zonxibelelwano, ezijikeleza umhlaba esibhakabhakeni nezinezixhobo zokudlulisela imiqondiso yemfonomfono, yocingo, kanomathotholo nekamabonwakude. Isiphekepheke esinye esinjalo sinokuthwala imiyalezo yemfonomfono engama-30 000 ngaxeshanye!

3. Kwenzeka ntoni xa kukho imisantsa kunxibelelwano?

³ Kodwa phezu kwazo nje zonke ezi ndlela zonxibelelwano, ihlabathi lisebugxwayibeni ngenxa yokungabikho konxibelelwano phakathi kwabantu. Ngenxa yoku, sixelelwa ukuba “kukho umsantsa okhulayo—‘umsantsa wonxibelelwano’ oya uvuleka—phakathi kwabalawuli nabalawulwa.” Yaye yintoni le ngokuqhelekileyo ibizwa ngokuba ngumsantsa wesizukulwana? Ngaba asikokusilela kwabazali nabantwana babo ukunxibelelana ngokunempumelelo? Abacebisi bomtshato banikela ingxelo yokuba eyona ngxaki ingundoqo kwimitshato kukungabikho konxibelelwano phakathi kwendoda nomfazi. Ukungabikho konxibelelwano olufanelekileyo kusenokubangela kwanokufa. Ekuqaleni kowe-1990, abantu abangama-73 baye baphulukana nobomi babo ngenxa yokuntlitheka kwenqwelo-moya, yaye kubonakala ukuba oku ngokuyintloko kwabangelwa kukuqhawuka konxibelelwano phakathi komqhubi wenqwelo-moya nabo bayilawula besemhlabeni. Umxholo wephephandaba wathi: “Ukungabikho Konxibelelwano Kukhokelele Kwintlekele.”

4. (a) Lithetha ukuthini igama elithi “unxibelelwano”? (b) Yiyiphi injongo ephambili yonxibelelwano olwenziwa ngamaKristu?

⁴ Xa kuziwa kubuKristu luyintoni unxibelelwano? Ngokutsho kwesinye isichazi-magama, “unxibelelelwano” luthetha “ukudlulisela inkcazelo, ingcingane, okanye uluvo ukuze lufunyanwe luze luqondwe ngokwanelisayo.” Esinye isichazi-magama siluchaza ngokuthi “bubuchule bokuvakalisa iimbono ngokunempumelelo.” Phawula ukuba kuthiwa, “bokuvakalisa iimbono ngokunempumelelo.” Unxibelelwano olwenziwa ngamaKristu lufanele ngokukhethekileyo lube loluphumelelayo kuba injongo yalo kukufikelela iintliziyo zabantu ngenyaniso eseLizwini likaThixo ukuze, ukuba kunokwenzeka, benze ngokuvisisana noko bakufundayo. Ngokukhethekileyo, lushukunyiswa bububele, luthando.

Indima KaYehova NjengomNxibelelanisi

5. Ziziphi ezinye zeendlela zokuqala uYehova awanxibelelana ngazo nomntu?

⁵ Ngokungathandabuzekiyo uYehova ungoyena mNxibelelanisi mkhulu. Ngenxa yokuba wasidala ngokomfuziselo wakhe nangokufana naye, uyakwazi ukunxibelelana nathi, yaye nathi siyakwazi ukunxibelelana nabanye sithethe ngaye. Ukususela ekudalweni komntu, uYehova ebenxibelelana nezidalwa zakhe zasemhlabeni ezazisa ngaye. Enye indlela akwenze ngayo oku kungendalo yakhe ebonakalayo. Ngaloo ndlela, umdumisi usixelela oku: “Izulu libalisa uzuko lukaThixo, saye isibhakabhaka sixela umsebenzi wezandla zakhe. Imini impompozelela imini intetho, ubusuku buxelela ubusuku ukwazi.” (INdumiso 19:1, 2) Yaye amaRoma 1:20 asixelela ukuba “iindawo [zikaThixo] ezibe zingenakubonwa zibonwa kakuhle, ziqondeke, ngezinto ezenziweyo.” Ukuthi “zibonwa kakuhle” kuthetha unxibelelwano oluphumelelayo!

6. UYehova wazixelela ntoni izidalwa zakhe zasemhlabeni xa wanxibelelana nazo zikumyezo wase-Eden?

⁶ Abo bangakholelwayo kuThixo nakwisityhilelo sakhe bafuna sikholelwe ukuba umntu umele aziphandele isizathu sokuba abekho. Kodwa iLizwi likaThixo likwenza kucace ukuba uThixo ebenxibelelana nomntu kwasekuqaleni. Ngaloo ndlela, uThixo wagunyazisa indoda nomfazi bokuqala ukuba bavelise inzala esithi: “Qhamani, nande, niwuzalise umhlaba niweyise; nibe nobukhosi . . . ezintweni zonke eziphilileyo.” Kwakhona uThixo wabavumela ukuba baziyolise ngeziqhamo ezazisemyezweni—ngaphandle kwesinye kuphela. Kwathi ke, bakuba uAdam noEva bengathobelanga, uYehova wanxibelelana nabo edlulisela idinga lokuqala elingoMesiya, ethembisa uluntu ukuba: “Ndiya kumisa ubutshaba phakathi kwakho [nyoka] nomfazi, naphakathi kwembewu yakho nembewu yakhe; yona iya kukutyumza intloko, wena uya kuyityumza isithende.”—Genesis 1:28; 2:16, 17; 3:15.

7. Incwadi yeGenesis ityhila ntoni ngokunxibelelana kukaYehova nabakhonzi bakhe?

⁷ Xa unyana ka-Adam uKayin wayezaliswe ngumona owawunokukhokelela ekubulaleni, uYehova uThixo wanxibelelana naye, ngokungathi kunjalo esithi: ‘Lumka! Uza kuzifak’ enkathazweni!’ Kodwa uKayin wala ukusithobela eso silumkiso waza wambulala umzalwana wakhe. (Genesis 4:6-8) Emva koko, xa umhlaba wawuzaliswe lugonyamelo nobungendawo, uYehova wanxibelelana nendoda elilungisa uNowa wayixelela injongo Yakhe yokutshayela konke okwakungcolisa umhlaba. (Genesis 6:13–7:5) Emva koNogumbe, xa uNowa nentsapho yakhe baphumayo emkhombeni, uYehova wanxibelelana nabo wabaxelela injongo yakhe engobungcwele bobomi negazi, yaye ngokwenza umnyama wabaqinisekisa ukuba wayengayi kuphinda azitshabalalise zonke izinto eziphilayo ngomkhukula. Kwiinkulungwane kamva, uYehova wanxibelelana noAbraham wamazisa injongo Yakhe yokuba zonke iintsapho zabantu zisikelelwe ngeMbewu ka-Abraham. (Genesis 9:1-17; 12:1-3; 22:11, 12, 16-18) Yaye xa uThixo wavakalisa ukuba wayeza kutshabalalisa abantu abagwenxa baseSodom naseGomora, ngothando wanxibelelana noAbraham wamazisa oko, esithi: “Ndomfihlela na uAbraham into endiza kuyenza?”—Genesis 18:17.

8. UYehova uye wanxibelelana ngaziphi iindlela ezine nabakhonzi bakhe emhlabeni?

⁸ Ukuqalela kuMoses, uYehova wasebenzisa uthotho lwabaprofeti ekunxibelelaneni noSirayeli. (Hebhere 1:1) Maxa wambi wayethetha nabo ngomlomo, njengaxa waxelela uMoses oku: “Wabhale la mazwi.” (Eksodus 34:27) Izihlandlo ezininzi uYehova wayenxibelelana nabo babethetha egameni lakhe ngemibono, njengokuba wayesele enzile kuAbraham.a Kwakhona uYehova wasebenzisa amaphupha ukunxibelelana nabantu, yaye kungekuphela nje nabakhonzi bakhe kodwa kwanabo babenento yokwenza nabakhonzi bakhe. Ngokomzekelo, uYehova wabangela ukuba amabanjwa amabini awayekunye noYosefu entolongweni aphuphe amaphupha, uYosefu awawachazayo. Kwakhona uYehova wabangela ukuba uFaro noNebhukadenetsare baphuphe amaphupha, abakhonzi bakhe uYosefu noDaniyeli abawachazayo. (Genesis 40:8–41:32; Daniyeli, isahluko 2 nesesi-4) Ukongezelela, izihlandlo ezininzi uYehova wasebenzisa abathunywa abazizithunywa zezulu ekunxibelelaneni nabakhonzi bakhe.—Eksodus 3:2; ABagwebi 6:11; Mateyu 1:20; Luka 1:26.

9. Yintoni eyashukumisela uYehova ukuba anxibelelane nabantu bakhe uSirayeli, yaye oko kubonakaliswa ngawaphi amazwi akhe?

⁹ Lonke olo nxibelelwano uYehova awayelwenza ngabaprofeti bakhe lwabonakalisa uthando lwakhe ngabantu bakhe uSirayeli. Ngokomzekelo, ngomprofeti wakhe uHezekile wathi: “Unakanye ukuba kube mnandi kum ukufa kongendawo; kumnandi kum ukubuya kongendawo endleleni yakhe, aphile. Buyani, buyani ezindleleni zenu ezimbi! Yini na ukuba nide nife, ndlu kaSirayeli?” (Hezekie 33:11) UYehova wayezeka kade umsindo yaye enomonde xa wayenxibelelana nabantu bakhe abanemvukelo bamandulo, njengoko kunokubonwa kweyesi-2 yeziKronike 36:15, 16 ethi: “UYehova, uThixo wooyise, wathumela kubo ngabathunywa bakhe, wanyameka ukuthumela; ngokuba wayenemfesane ngabantu bakhe, nekhaya lakhe. Baye . . . bewadela amazwi akhe, bebagxeka abaprofeti bakhe . . . kwada akwabakho mpilo.”

10. UYehova unxibelelana njani nabantu bakhe namhlanje, yaye unguThixo wonxibelelwano ukusa kuwuphi umkhamo?

¹⁰ Namhlanje, sineLizwi likaThixo eliphefumlelweyo, iBhayibhile Engcwele, uYehova anxibelelana ngayo nathi esinika inkcazelo engaye, engeenjongo zakhe nokuthanda kwakhe ngathi. (2 Timoti 3:16, 17) Enyanisweni, kunjengokuba oyena mNxibelelanisi uBalaseleyo, uYehova, esithi: “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.” (Amosi 3:7) Uyabazisa abakhonzi bakhe oko anenjongo yokukwenza.

UNyana KaThixo NjengomNxibelelanisi

11. Ngubani uYehova amsebenzisa ngokuyintloko ukunxibelelana nabantu, yaye kutheni isibizo sakhe sokuba ‘nguLizwi’ sifanelekile?

¹¹ Kubo bonke abathunywa abasetyenziswa nguYehova ukunxibelelana nabantu ukubazisa ukuthanda Kwakhe, oyena ubalaseleyo nguLizwi, uLogos, owaba nguYesu Kristu. Kunantsingiselo yiphi ukubizwa kwakhe ngokuba nguLizwi, okanye uLogos? Kuthetha ukuba usiSithethi sikaYehova Esiphambili. Yaye kuthetha ukuthini ukuba sisithethi? Kuthetha ukunxibelelana nabantu ubaxelela oko omnye afanele akuthethe. Ngoko uLogos wanxibelelana nezidalwa zikaYehova uThixo ezikrelekrele zasemhlabeni ezazisa ilizwi likaThixo. Leyo yindima ebaluleke kangangokuba ubizwa ngokuba nguLizwi.—Yohane 1:1, 2, 14.

12. (a) Yiyiphi injongo uYesu awayeyizele emhlabeni? (b) Yintoni enikela ubungqina bokuba wayifeza ngokuthembeka loo njongo?

¹² UYesu waxelela uPontiyo Pilato ukuba injongo yakhe ephambili yokuza emhlabeni yayikukunxibelelana nabantu abaxelele inyaniso: “Mna ndizalelwe oku; ndizele oku ehlabathini, ukuze ndiyingqinele inyaniso.” (Yohane 18:37) Yaye ingxelo ekwiincwadi zeVangeli isixelela indlela awasiphumeza ngayo eso sabelo. INtshumayelo yakhe yaseNtabeni igqalwa njengeyona ntshumayelo ibalaseleyo yakha yanikelwa ngumntu. Hayi indlela awasidlulisela kakuhle ngayo isigidimi sakhe kuloo ntshumayelo! “Zakhwankqiswa iindimbane [ezazimamele loo ntshumayelo] kukufundisa kwakhe.” (Mateyu 7:28) Ngokubhekisele kwesinye isihlandlo, sifunda oku: “Lwaye ke uninzi lwabantu lumva kamnandi.” (Marko 12:37) Xa amagosa athile athunywa ukuya kubamba uYesu, abuya ngaphandle kwakhe. Kwakutheni? Abaphendula abaFarisi athi: “Akuzanga kuthethe mntu njongoko athetha ngako lo mntu.”—Yohane 7:46.

Abafundi BakaKristu Bathunywa Ukuba Banxibelelane Nabanye

13. Yintoni ebonisa ukuba uKristu wayenganelisekanga kukuba ngokuphela konxibelelana nabantu?

¹³ Enganeliswanga kukuba ngokuphela konxibelelana nabantu, uYesu waqala ngokuthuma abapostile abali-12 emva koko wathuma abashumayeli beendaba ezilungileyo abangama-70 ukuba banxibelelane nabantu babazise iindaba ezilungileyo zoBukumkani. (Luka 9:1; 10:1) Wandula ke ngaphambi nje kokuba anyukele ezulwini, wathuma abafundi bakhe ukuba benze umsebenzi okhethekileyo. Wuphi umsebenzi? Njengokuba sifunda kuMateyu 28:19, 20, wabayalela ukuba banxibelelane nabantu; yaye babemele bafundise nabanye ukuba nabo banxibelelane nabantu.

14. Ayenempumelelo kangakanani amaKristu okuqala kumsebenzi wokunxibelelana nabantu?

¹⁴ Ngaba abafundi babenempumelelo kulo msebenzi wokunxibelelana nabantu? Ngokuqinisekileyo kwakunjalo! Ngenxa yokushumayela kwabo ngomhla wePentekoste yowama-33 C.E., kongezelelwa imiphefumlo engama-3 000 kwibandla lamaKristu elalisandul’ ukusekwa. Kungekudala inani labo landa langabantu abangama-5 000. (IZenzo 2:41; 4:4) Akumangalisi ke ngoko ukuba iintshaba zabo ezingamaYuda zabatyhola ngokuba babezalise yonke iYerusalem ngemfundiso yabo zaza kamva zakhalaza zisithi baliqungaqungile elimiweyo ngokushumayela kwabo!—IZenzo 5:28; 17:6.

15. Sisiphi isixhobo uYehova asisebenzisayo ukunxibelelana nabantu kumaxesha anamhlanje?

¹⁵ Kuthekani ngamaxesha anamhlanje? Njengoko kwaxelwa kwangaphambili kuMateyu 24:3, 45-47, iNkosi, uYesu Kristu, iye yamisela ‘umkhonzi othembekileyo noqondayo,’ obunjwa ngamaKristu athanjisiweyo, ukuba anyamekele yonke impahla yayo esemhlabeni ebudeni bale mini yobukho bayo. Namhlanje loo mkhonzi uthembekileyo noqondayo umelwa liQumrhu Elilawulayo lamaNgqina kaYehova, elinombutho walo wokupapasha oyiWatch Tower Bible and Tract Society. Ngokufanelekileyo, loo mkhonzi uthembekileyo noqondayo ukwabizwa ngokuba lijelo likaThixo lonxibelelwano. Nawo, usikhuthaza ukuba sinxibelelane kakuhle nabantu. Enyanisweni, kwainkupho yokuqala yeZion’s Watch Tower and Herald of Christ’s Presence yacebisa abafundi bayo yathi: “Ukuba unommelwane okanye umhlobo ocinga ukuba unokuba nomdla okanye usenokungenelwa yimfundiso [ekweli phephancwadi], usenokutsalela ingqalelo yabo kulo; ngaloo ndlela ushumayela iLizwi yaye usenza okulungileyo kubantu bonke njengoko ufumana amathuba.”

16. Yintoni ebonisa ukuba kufuneka okungakumbi kunokufunda nje iBhayibhile ukuze uThixo anxibelelane nabakhonzi bakhe abasemhlabeni?

¹⁶ Noko ke, ukuba neLizwi likaThixo kuphela nokulifunda akwanele ukuze sifumane ulwazi oluchanileyo nolukhokelela ubani kwindlela esinge ebomini. Khumbula igosa elinguMtiyopiya elalifunda isiprofeto sikaIsaya kodwa lingakuqondi oko lalikufunda. UFilipu umshumayeli weendaba ezilungileyo walicacisela eso siprofeto, laza emva koko lalungela ukubhaptizwa njengomfundi kaKristu. (IZenzo 8:27-38) Isibakala sokuba kufuneka okungakumbi kunokuzifundela nje iBhayibhile sinokubonwa kumaEfese 4:11-13, apho uPawulos abonisa ukuba uKristu akazange aphelele nje ngokupha abanye babe ngabapostile nabaprofeti abaphefumlelweyo kodwa wabapha “abanye babe ngabashumayeli beendaba ezilungileyo, abanye babe ngabalusi nabafundisi, ukuze abangcwele basulungekiselwe umsebenzi wolungiselelo, ukwakhiwa ke komzimba kaKristu; side thina sonke sifike kubo ubunye benkolo, nobokumazi okuzeleyo uNyana kaThixo, ebudodeni obupheleleyo.”

17. Sinokuwubona ngaziphi iimpawu umbutho uYehova awusebenzisayo namhlanje ukunxibelelana nabantu ukuze abazise iinjongo zakhe?

¹⁷ Sinokubaqonda njani abo uYehova uThixo noYesu Kristu babasebenzisayo ukunceda abo baza kuba ngamaKristu ukuba bafikelele ebudodeni obupheleleyo? Ngokutsho kukaYesu, olunye uphawu lokubafanisa luya kuba kukuba aba bathandane njengokuba noYesu wabathandayo abalandeli bakhe. (Yohane 13:34, 35) Olunye uphawu olubafanisayo: Kukuba babengayi kuba yinxalenye yehlabathi, kanye njengokuba noYesu wayengeyonxalenye yehlabathi. (Yohane 15:19; 17:16) Yaye olunye uphawu luya kuba kukuba baligqala iLizwi likaThixo njengeliyinyaniso, njengokuba uYesu wenzayo, esoloko ebhekisela kwigunya lalo. (Mateyu 22:29; Yohane 17:17) Ukubalaselisa igama likaThixo, njengoko uYesu wenzayo, kuya kuba lolunye uphawu. (Mateyu 6:9; Yohane 17:6) Yaye olunye uphawu olongezelelekileyo luya kuba kukulandela umzekelo kaYesu ekushumayeleni ngoBukumkani bukaThixo. (Mateyu 4:17; 24:14) Linye kuphela iqela elizifikelelayo ezi mfuneko, oko kukuthi ngabo banxibelelana nabantu emhlabeni wonke abaziwa ngokuba ngamaNgqina kaYehova angamaKristu.

18. Ziziphi iinkalo ezintathu zonxibelelwano amanqaku alandelayo aza kuxubusha ngazo?

¹⁸ Noko ke, unxibelelwano luthetha ukuba nembopheleleko kwabanye. AmaKristu anembopheleleko yokunxibelelana noobani? Ngokusisiseko, kukho iinkalo ezintathu amaKristu amele azixhalabise ngokugcina amajelo onxibelelwano evulekile kuzo: kwisangqa sentsapho, kwibandla lamaKristu nakubulungiseleli basentsimini bamaKristu. Amanqaku alandelayo aza kuxubusha ngezi nkalo zombandela wethu.

[Umbhalo osemazantsi]

Ubuya Kuphendula Njani?

◻ Yiyiphi ingozi enokubakho ngenxa yokungabikho konxibelelwano?

◻ Ngoobani abona banxibelelanisi babalaseleyo?

◻ Ziziphi iindlela ezahlukahlukeneyo uThixo azisebenzisileyo ukunxibelelana nabantu?

◻ UYesu wayebalasele njani kunxibelelwano?

◻ Ayenempumelelo kangakanani amaKristu okuqala ekunxibelelaneni nabanye?

[Umfanekiso okwiphepha 18]

NjengoYise wasezulwini, uYesu wayenovelwano xa wayenxibelelana nabantu