Abantu Bakhalela Utshintsho

NGUMBHALI KAVUKANI! EJAMANI

“Ukuba bendiselula, bendiya kuseka umbutho olwela utshintsho!” wakhala watsho uAnna, ibhinqa laseJamani elineminyaka engama-80 ubudala. “Yintoni obuya kuyitshintsha?” wabuza uRobert. “Yonk’ into!” waphendula uAnna.

ABANTU abaninzi bebeya kuvumelana noAnna. Uhlolisiso olwenziwa eJamani kwiminyaka yee-1990, lwabonisa ukuba abantu aba-2 kwaba-3 kwabo kwathethwa nabo bavakalelwa ukuba kufuneka ‘iinguqulelo ezinkulu notshintsho oluphawulekayo entlalweni.’ Kusenokwenzeka ukuba kunjalo nakwilizwe okulo.

Xa abantu befuna utshintsho, badla ngokuthenjiswa ukuba luza kwenziwa. Ethetha ngotshintsho olwenziwa kwimfundo, uFrederick Hess, umncedisi wenjingalwazi kwimfundo nakurhulumente, wabhala wathi: “Ukuthembisa ukwenza utshintsho yinkwalambisa nje yokuthomalalisa abantu abaphelelwe ngumonde.” Sidla ngokufunda imixholo yamaphephandaba ethetha ngezicwangciso zokwenza utshintsho kwezoqoqosho, kwezempilo, kwezolimo nakwezomthetho. Siva izithembiso zokwenza utshintsho kwimfundo, ezentlalo nakwizigwebo zenkundla.a Sifunda nangamalungu ezinye iicawa afuna kuhlaziywe imfundiso yeecawa.

Ukuthelekisa Utshintsho Nemeko Ekhoyo

Yintoni ebangela kufuneke utshintsho kangaka? Abantu basoloko befuna ukuphucula indawo abahlala kuyo. Bazama ukwenza oko ngokuvota, ngokuchitha imali, ngokumisela imithetho, okanye ngokusebenzisa ugonyamelo. Oku kubangelwa ngumnqweno owendeleyo ebantwini wokufuna ukuphucula ubomi babo, wokufunela abantwana babo ikamva elibhetele, okanye wokuba abantu bafikelele kumgangatho othile oncomekayo wentlalo, wokuziphatha nokubakho kokusesikweni. Logama nje kusekho abantu abathwaxwa kukungabi nalwazi, zizifo, ubuhlwempu nendlala, abantu baya kuhlala bekhalela utshintsho.

Ngoxa abantu abaninzi belwamkela utshintsho, abanye bacinga okwahlukileyo ngabo benza utshintsho noko bazama ukukuphumeza. Abanye bakhetha ukuba kungenziwa tshintsho, ukuze kulondolozwe imeko eqhelekileyo. Bagqala abo beza notshintsho njengabantu abafuna ukutshintsha ihlabathi ngoxa bengakuqondi kakuhle oko kwenzeka kulo. IHandbuch der deutschen Reformbewegungen 1880-1933 (Handbook of German Reform Movements 1880-1933) ithi abo benza utshintsho “zizisulu zokugxekwa yaye kuhlekiswa ngabo ngabenzi bemizobo yokuhlekisa.” Umbhali wemidlalo ongumFrentshi uMolière wakha wathi: “Akukho ngcamango yobudenge njengokufuna ukwenza ihlabathi libe yindawo ebhetele.”

Ucinga ntoni wena? Ngaba ukwenziwa kotshintsho kunokuziphucula iimeko zehlabathi? Okanye ngaba abo benza utshintsho ngabantu nje abaneembono ezingenakufezekiswa? Kuthekani ngeenzame zotshintsho ezenziwe kwixesha elidluleyo? Ngaba abenzi bazo baluphumeza usukelo lwabo? Amanqaku alandelayo aza kuxubusha ngoko.

[Umbhalo osemazantsi]