Kwasebuntwaneni Ndafundiswa Ukumthanda UThixo

KUBALISA UANATOLY MELNIK

Abantu abaninzi bandibiza kamnandi bathi Tat’ omkhulu. Eli gama lindichukumisa gqitha kuba lindikhumbuza owam uTat’ omkhulu, endandimthanda gqitha nendinombulelo ongathethekiyo kuye. Makhe ndikuchazele ngaye nangendlela yena noMakhulu ababa nempembelelo ngayo kwintsapho yabo, nakwabanye abantu.

NDAZALELWA kwidolophana yaseHlina, kumantla endawo ekuthiwa yiMoldova namhlanje.a Kwiminyaka yee-1920, abalungiseleli abahambahambayo, ababesaziwa njengabahambi ngezonqulo bawela umda weRomania baza kugaleleka kwingingqi yethu entle ephahlwe ziinduli. Abazali bakaMama bazamkela ngokukhawuleza iindaba ezilungileyo ababeziva zishunyayelwa ngokusuk’ eBhayibhileni. Ngowe-1927, baba ngaBafundi beBhayibhile, igama awayebizwa ngalo amaNgqina kaYehova ngoko. Ukuqalisa kweMfazwe Yehlabathi II ngowe-1939, kwakusele kukho ibandla lamaNgqina kaYehova kwidolophana yethu.

Ngowe-1936, unyaka endazalwa ngawo, zonke izihlobo zam zazingamaNgqina kaYehova ngaphandle kukaTata, owayesahamba iCawa yamaOthodoki. Ebudeni bemfazwe yesibini yehlabathi, waqala ukucingisisa nzulu ngenjongo yobomi yaye ekugqibeleni wahlulela ubomi bakhe kuMdali wethu, uYehova uThixo, efuzisela oko ngokubhaptizwa emanzini. UTat’ omkhulu waba negalelo elikhulu ukuze intsapho yakuthi ikhule ngokomoya. Wayeyithanda gqitha iBhayibhile esazi iindinyana ezininzi ngentloko. Wayekwazi ukwalathisela nayiphi na incoko eBhayibhileni.

Ndandidla ngokusingatha kuTat’ omkhulu ndimphulaphule xa ebalisa amabali eBhayibhile. Wandenza ndamthanda uThixo. Ndimbulela gqitha ngoko! Xa ndandineminyaka esibhozo ubudala, ndaya kushumayela isihlandlo sokuqala ndihamba noTat’ omkhulu. Sisebenzisa iBhayibhile, sasichazela abantu bedolophana yethu ukuba ngubani uYehova nangendlela yokusondela kuye.

Ukucinezelwa NgamaKomanisi

Ngowe-1947, bephenjelelwa bubuKomanisi neCawa yamaOthodoki, abasemagunyeni baqalisa ukuwatshutshisa amaNgqina kaYehova eMoldova. Amalungu entlangano eyabizwa ngokuba yiKGB kamva, namapolisa asekuhlaleni ayedla ngokufika ekhaya asibuze abantu abakhokela umsebenzi wethu wokushumayela, indawo oluvela kuyo uncwadi nalapho sinqulela khona. Babesithi baza kuwuvala tu umsebenzi wamaNgqina kaYehova, besithi “adodobalisa ubuKomanisi kwelo lizwe.”

Ngelo xesha uTata, owayesisifundiswa wayesele eyithanda ngokunzulu iBhayibhile. Yena noTat’ omkhulu babekwazi ukuphendula abecuphi ukuze bangangcatshi abazalwana noodadewethu abangamaKristu. Bobabini babenenkalipho nothando beyikhathalele impilo-ntle yamanye amakholwa. Njengabo, uMama wayehlala azole engakhawulezi ukucaphuka.

Ngowe-1948, uTata wabanjwa waya kulahlwa kude. Asizange saziswe ngezityholo abekwa zona. Wagwetywa iminyaka esixhenxe kwintolongo eluqilima kusongezelelwa kwiminyaka emibini yokugxothelwa kwelinye ilizwe. Ekugqibeleni, wathunyelwa kwingingqi yaseMagadan kude kumntla-mpuma weRashiya, kumgama ongaphezu kweekhilomitha ezingama-7 000 ukusuka ekhaya. Asizange sibonane kangangeminyaka esithoba. Kwakunzima gqitha ukuhlala ngaphandle kukaTata, kodwa uTat’ omkhulu wandikhuthaza ngokwenene.

Ukugxothelwa Kwelinye Ilizwe

NgoJuni 6, 1949 ebusuku, kwagaleleka ekhaya amajoni amabini ehamba negosa elithile. Asixelela ukuba sisalelwe ziiyure ezimbini ngaphambi kokuba siphume siphele endlwini singene kwinqwelo yabo. Abazange baphinde bakhuphe nelimdaka. Basixelela nje ukuba sigxothelwa kwelinye ilizwe yaye asisayi kuze sibuye. Ngoko, sinoMama, uTat’ omkhulu, uMakhulu namanye amakholwa sathunyelwa eSiberia. Ndandineminyaka eli-13 kuphela ubudala. Emva kweeveki ezimbalwa saya kugaleleka kumahlathi ashinyeneyo anemigxobhozo. Ndandiyithanda gqitha indawo esasivela kuyo yaye le yayahlukile. Maxa wambi sasisuka silile. Kodwa, sasiqinisekile ukuba uYehova akayi kusishiya.

Kwidolophana esaya kulahlwa kuyo kwakukho oongquphantsi abalishumi nje kuphela. Amanye amaNgqina athunyelwa kwiidolophana ezahlukahlukeneyo ezikuloo mahlathi. Besenzela ukuba abantu balapho basoyike yaye basithiye, abasemagunyeni bathi kubo amaNgqina zizidla-bantu. Noko ke, bakhawuleza baqonda ukuba babethwe ngemf’ iphindiwe baza bayeka ukusoyika.

Kwiinyanga ezimbini zokuqala sifikile, sahlala kungquphantsi omdala. Kwakufuneka sizakhele indawo efanelekileyo yokuhlala ngaphambi kokuba kufike iingqele zobusika. UTat’ omkhulu noMakhulu basincedisa noMama sakha elethu ixhobongwana, elalithe gabhu isiqingatha salo singaphantsi komhlaba ngoxa esinye sivele ngaphezulu. Sahlala apho isithuba esingaphezu kweminyaka emithathu. Sasingavunyelwa ukuphuma kuloo dolophana ngaphandle kwemvume, mvume leyo singazange siyinikwe.

Ethubeni ndavunyelwa ukuya esikolweni. Ekubeni unqulo lwam lwalwahlukile kolwabanye apho, ootitshala nabantwana besikolo babesoloko bendibuza imibuzo. UTat’ omkhulu wayevuya gqitha xa ndifika ndimxelela indlela endizichaze ngayo iinkolelo zam.

Inkululeko Engephi

Emva kokufa kozwilakhe uStalin ngowe-1953, imeko yethu yaba bhetelana. Sasivunyelwa ukuphuma kuloo dolophana. Satsho sakwazi ukunxulumana namanye amakholwa nokuya kwiintlanganiso kwezinye iidolophana ezazinamaNgqina. Siphepha ukutsal’ amehlo, sasihlanganisana ngokwamaqela amancinane. Ukuze siye kufika apho, sasihamba iikhilomitha ezingama-30, maxa wambi kwikhephu elithi gabhu emadolweni nengqele efikelela kuma-40 ngaphantsi kweqondo lobushushu. Kusuku olulandelayo sasihamba indlela ende sibuyela ekhaya. Endleleni sasisitya ikomkomere egcinwe kwiviniga neswekile. Ukanti, sasivuya gqitha njengoDavide wamandulo!—INdumiso 122:1.

Ngowe-1955, ndabhaptizwa ndifuzisela ukuzahlulela kwam kuYehova. Kancinane nje ngaphambi koko, kwelinye ibandla elikwidolophana eselumelwaneni ndandibone uLidiya, intombazana enesidima eneenwele ezimnyama. Njengathi, kokwabo babengamaNgqina begxothwe eMoldova. Wayengumlonjikazi ezazi ngentloko phantse zonke iingoma ezingama-337 zeculo esasilisebenzisa ngoko. Oku kwandichukumisa gqitha kuba ndandiwuthanda umculo. Ngowe-1956 sagqiba ekubeni sitshate.

Ndabhalela uTata ileta—sasivile ukuba uthunyelwe eMagadan—yaye salurhoxisa usuku lomtshato silindele imvume yakhe. Kungekudala emva koko, uTata wakhululwa waza kuhlala nathi kuloo ndawo sasigxothelwe kuyo. Wasibalisela indlela yena namanye amaKristu abancedwa ngayo nguThixo ukuze basinde kwiimeko ezimaxongo ababesebenza phantsi kwazo kwiinkampu ababevalelwe kuzo. Ezo ngxelo zalomeleza ukholo lwethu.

Kungekudala uTata ebuyile, kwehla intlekele embi ngoxa uMama wayesapheka ioli esasiyisebenzisa kwipeyinti. Imbiza enkulu yeoli ebilayo yabhukuqa phezu kwakhe, yamchithela. Wafela esibhedlele. Saba buhlungu gqitha. UTata wathuthuzeleka yaye ethubeni watshata noTatyana, iNgqina elalihlala kwenye idolophana eselumelwaneni.

Ukwandisa Ubulungiseleli Bethu

Ngowe-1958, sinoLidiya sayishiya iKizak, idolophana yethu safudukela kwenkulu yaseLebyaie eyayikumgama omalunga neekhilomitha ezili-100. Sasivile ukuba amaKristu kwamanye amazwe ashumayela kwindlu ngendlu. Ngoko sazama ukwenza okufanayo kwindawo yethu entsha. Ewe, IMboniselo noVukani! zazingavumelekanga, kodwa sasifumana ezithutyeleziswe zivela kwezinye iindawo. Saxelelwa ukuba siza kufumana amaphephancwadi ngesiRashiya kuphela. De kube ngoko sasizifumana nangesiMoldavia. Ngoko sazibhokoxa sifunda isiRashiya. Nanamhlanje andikhumbuli nje kuphela imixholo yaloo manqaku kodwa ndisakhumbula noko kwakuthethwa kuwo.

Ukuze sikwazi ukuzixhasa, uLidiya wayesebenza kumzi ogcina ukutya okuziinkonzo mna ndasebenza kwindawo yokothula iinqwelo ezilayishe imithi. Loo msebenzi wawuqoba gqitha nomvuzo umncinane. Nakuba amaNgqina ayesaziwa njengabasebenzi abakhutheleyo, sasingaxhamli kwiimali zamalungelo athile. Abasemagunyeni batsho phandle ukuba: “AmaNgqina kaYehova akanandawo phakathi kwamaKomanisi.” Kodwa sasivuyiswa kukuba ayezaliseka kuthi amazwi awathethwa nguYesu kubalandeli bakhe esithi: “Abayonxalenye yehlabathi, kanye njengoko nam ndingeyonxalenye yehlabathi.”—Yohane 17:16.

Ucelomngeni Olutsha

Ngowe-1959 kwazalwa intombi yethu uValentina. Ngokukhawuleza emva koko kwaqalisa intshutshiso. IThe Encyclopædia Britannica ithi: “Ngowe-1959-64 kwavuka intiyo yonqulo iphenjelelwa yiNkulumbuso uNikita Khrushchev.” Amalungu ezokhuseleko asixelela ukuba usukelo lukarhulumente weSoviet kukulutshayela neengcambu lonke unqulo, ngokukhethekileyo amaNgqina kaYehova.

Xa uValentina wayemalunga nonyaka ubudala, ndabizelwa emkhosini. Ndathi ndakungayi ndagwetywa iminyaka emihlanu entolongweni ngenxa yokuba ngundilele. Ngaxa lithile uLidiya eze kundibona, elinye igosa leKGB lathi kuye: “Sifumene isaziso esivela kuRhulumente esithi kwiminyaka nje emibini kuza kube kungasekho nelinye iNgqina likaYehova kwiSoviet Union.” Emva koko lalumkisa lathi: “Lulahle olu kholo lwakho kungenjalo uya kubhadla esiseleni.” Eli gosa lalicinga ukuba ezo zoyikiso ziza kuwaval’ umlomo amabhinqa, lisithi: “Abuthathaka.”

Ngethutyana nje elingephi, inkoliso yamaNgqina angamadoda yaba ngaphaya kwezitshixo nakwiinkampu zomsebenzi onzima. Kodwa amaKristu angamabhinqa anesibindi aqhubeka nomsebenzi wokushumayela. Ezibeka esichengeni ayethubelezisa uncwadi alungenise kwezo ntolongo nakwiinkampu zomsebenzi onzima. NoLidiya wajamelana nezo zilingo yaye wayesoloko esilwa nokuncwaswa ngamadoda awayezama ukusebenzisa ithuba lokuba ndingekho. Ukongezelela, waxelelwa ukuba andinakuze ndikhululwe. Ukanti ndakhululwa!

Ukukhululwa Nokufudukela EKazakhstan

Ityala lam laphinda laqulunqwa ngowe-1963 yaye kamva ndakhululwa—emva kweminyaka emithathu ndisentolongweni. Noko ke, sasingafumani imvume yokuba nendawo yokuhlala naphi na, ngoko ndandingenako ukufumana umsebenzi. Umthetho kaRhulumente wawusithi: “Akukho mntu unokufumana msebenzi engenayo imvume yokuhlala.” Sazingisa emthandazweni sicela uYehova asincede. Sagqiba ekubeni sifudukele ePetropavl kumantla eKazakhstan. Noko ke, abasemagunyeni apho babesele bexelelwe ngathi ngoko bala ukuba sihlale okanye sisebenze apho. Amalunga nama-50 amaNgqina awayetshutshiswa ngendlela efanayo kweso sixeko.

Sahamba nesinye isibini esingamaNgqina safudukela emazantsi, kwidolophu encinane yaseShchuchinsk. Kwakungekho maNgqina ahlala apho, yaye abasemagunyeni babengazi nto ngomsebenzi wethu wokushumayela. Kangangeveki mna noIvan safuna umsebenzi ngoxa abafazi bethu babehlala kwisikhululo sikaloliwe, apho sasilala khona. Ekugqibeleni safumana umsebenzi kumzi-mveliso weeglasi. Saqesha igumbi elincinane elalisanela iibhedi nje ezimbini nezinye iintwanantwana ukuze sihlale khona neentsapho zethu, ukanti sasanelisekile koko.

SinoIvan sazibhokoxa kumsebenzi wethu, yaye abaqeshi bethu baneliseka gqitha. Xa ndandibizelwa emkhosini kwakhona, umphathi womzi-mveliso wayesele evile ukuba isazela sam esiqeqeshwe yiBhayibhile asindivumeli ukuba ndiye emkhosini. Okumangalisayo kukuba, wanxibelelana nomphathi womkhosi wamxelela ukuba mna noIvan sinobuchule gqitha emsebenzini ngoko umzi-mveliso awunakuqhuba kakuhle kwaphela ngaphandle kwethu. Ngoko sayekwa sahlala.

Ukukhulisa Abantwana Nokunceda Abanye

Intombazana yethu yesibini, uLilya yazalwa ngowe-1966. Emva kokuba igqibe unyaka safudukela eBelyye Vody, kumazantsi eKazakhstan kufuphi nomda weUzbekistan, apho kwakukho iqela elincinane lamaNgqina. Ngokukhawuleza kwasekwa ibandla, ndaza ndamiselwa njengomveleli owongamelayo. Ngowe-1969 safumana unyana, uOleg, yaye kwiminyaka emibini kamva safumana uNatasha untondo wethu. SinoLidiya asizange silibale ukuba abantwana balilifa elivela kuYehova. (INdumiso 127:3) Saxubusha ngoko simele sikwenze ukuze bakhule bemthanda uYehova.

Nakwiminyaka yee-1970, inkoliso yamaNgqina angamadoda yayisavalelwe kwiinkampu zomsebenzi onzima. Amabandla amaninzi ayefuna abantu abaqolileyo abaza kuwongamela nabaza kunikela ulwalathiso. Ngoko ngoxa uLidiya wayenyamekela imbopheleleko enkulu yokukhulisa abantwana, maxa wambi esiba ngumama notata, mna ndakhonza njengomveleli ohambahambayo. Ndandityelela amabandla aseKazakhstan namanye amazwe azimeleyo eSoviet njengeTajikistan, iTurkmenistan neUzbekistan. Kwangaxeshanye ndandisebenza ukuze ndixhase intsapho, yaye uLidiya nabantwana babesebenzisana nam.

Nangona maxa wambi ndandikhe ndingabikho kangangeeveki, ndandizama ukubonisa abantwana bam ukuba ndiyabathanda njengoyise yaye ndibanceda bakhule ngokomoya. SinoLidiya sasithandaza ngokuzingisileyo kuYehova sicela ancede abantwana bethu, yaye sasixubusha nabo ngendlela abanokwenza ngayo bangoyiki bantu nokuze babe nolwalamano olusenyongweni noThixo. Ngaphandle kwenkxaso engathethekiyo yomfazi wam endimthandayo, ndandingenakukwazi ukuphumeza iimbopheleleko zam zokuba ngumveleli ohambahambayo. ULidiya nabanye oodadewethu babengekho ‘buthathaka,’ njengokutsho kwegosa lomkhosi. Babomelele—amaqhawe okwenene okomoya!—Filipi 4:13.

Ngowe-1988, bakuba bekhule bonke abantwana bethu, ndamiselwa njengomveleli ohambahambayo osisigxina. Isiphaluka endandisebenza kuso sasiquka inkoliso yamazwe akuMbindi Asia. Emva kokuba umsebenzi wokushumayela wamaNgqina kaYehova ubhaliswe ngokusemthethweni kwelo lalisakuba yiSoviet Union ngowe-1991, amanye amadoda afanelekayo naqolileyo ngokomoya akhonza kulo mazwe aseAsia ayekade ephantsi kweSoviet Union. Namhlanje kukho abaveleli abahambahambayo abali-14 abakhonza kula mazwe, kuwo nyakenye ekuye kwakho abantu abangaphezu kwama-50 000 kwiSikhumbuzo sokufa kukaKristu.

Isimemo Esingalindelekanga

Ekuqaleni kowe-1998, ndafumana umnxeba ongalindelekanga uvela kwiofisi yesebe lamaNgqina kaYehova yaseRashiya. Ndabuzwa oku: “Anatoly, ngaba wena noLidiya nikhe nacinga ngenkonzo yexesha elizeleyo?” Kakade ke, sasikhe sacinga ukuba elo lungelo linokuxhanyulwa ngabantwana bethu. Eneneni, unyana wethu uOleg wayesele ekhonze kwiofisi yesebe laseRashiya kangangeminyaka emihlanu.

Ukuxelela kwam uLidiya ngeso simemo wandibuza: “Siza kuwuthini umzi wethu, igadi nempahla yethu?” Emva kokuthandaza nokuwuxubusha lo mbandela, sagqiba ekubeni sisamkele eso simemo. Ekugqibeleni samenywa ukuba siye kukhonza kwiziko lonqulo lamaNgqina kaYehova eliseIssyk, eKazakhstan, kufuphi nesixeko esikhulu saseAlma-Ata. Apho kuguqulelwa uncwadi lweBhayibhile kwiilwimi zasekuhlaleni ezithethwa kuwo wonke loo mmandla.

Intsapho Yethu Namhlanje

Simbulela gqitha uThixo ngokusinceda ekufundiseni abantwana bethu inyaniso yeBhayibhile! Intombi yethu yamazibulo, uValentina, watshata waza waya kuhlala nomyeni wakhe eIngelheim eJamani, ngowe-1993. Banabantwana abathathu, bonke bangamaNgqina kaYehova abhaptiziweyo.

ULilya, intombi yethu yesibini naye unentsapho yakhe. Ekunye nomyeni wakhe, umdala kwibandla laseBelyye Vody, bakhulisa abantwana babo ababini ukuze bamthande uThixo. UOleg watshata noNatasha, udade ongumKristu waseMoscow, yaye bakhonza kunye kwiofisi yesebe laseRashiya kufuphi naseSt. Petersburg. Ngowe-1995 intombi yethu eliphelo, uNatasha watshata yaye ukhonza nomyeni wakhe kwibandla lesiRashiya eliseJamani.

Ngamathuba athile sikhe sidibane kunye njengentsapho. Abantwana bethu babalisela abantwana babo indlela u“Mama” no“Tata” abamphulaphula ngayo uYehova baza bakhulisa abantwana babo ukuba bamthande baze bamkhonze uThixo oyinyaniso, uYehova. Ndiyabona ukuba ezi ngxubusho zinceda abazukulwana bethu bakhule ngokomoya. Inkwenkwana engoyena mzukulwana wethu mncinane ifuze mna xa ndandisengangayo. Maxa wambi isuka ize kusingatha kum icele ukuba ndiyibalisele ibali leBhayibhile. Zisuke zithi gwantyi iinyembezi xa ndikhumbula indlela endandidla ngokusingatha ngayo kuTat’ omkhulu nendlela awandinceda ngayo ndamthanda ndaza ndamkhonza uMdali wethu Ozukileyo.

[Umbhalo osemazantsi]

[Umfanekiso okwiphepha 21]

Ndikunye nabazali bam ngaphandle kwekhaya lethu eMoldova ngaphambi nje kokuba uTata abanjwe

[Umfanekiso okwiphepha 22]

Ndikunye noLidiya ngowe-1959, ngoxa sasigxothelwe kwelinye ilizwe

[Umfanekiso okwiphepha 23]

ULidiya nentombi yethu uValentina ngoxa ndandisentolongweni

[Umfanekiso okwiphepha 25]

Ndikunye noLidiya namhlanje

[Umfanekiso okwiphepha 25]

Sikunye nabantwana nabazukulwana bethu, sonke sikhonza uYehova!