Izimvo Zabafundi BakaVukani!

Ukusebenzisana Kuluncedo Kwizinto Eziphilayo (Septemba 8, 2005) Ndimele ndivume ukuba xa ndandiqala ukubona lo mxholo wale nkupho, andizange ndicinge ukuba ndinganomdla kuwo. Kodwa ndawafunda onke la manqaku, yaye ndawathanda! Ngamaxesha amaninzi ngoxa ndandiwafunda, ndandinqumama ndize ndimbulele uYehova ngendlela emangalisayo azidale ngayo izinto. Kuyamangalisa ukubona indlela izilwanyana ezisebenzisana ngayo.

B. K., EMerika

Abantu Abaselula Bayabuza . . . Ndingakuphepha Njani Ukunxulumana Nabantu Abanempembelelo Embi? (Septemba 8, 2005) Ndaba nomdla kumntu “onempembelelo embi” owayengazinzanga enyanisweni. Le nkcazelo yandinceda ndaqonda ingozi yokunxulumana nomntu obuthathaka ngokomoya. Kuyathuthuzela ukwazi ukuba uYehova usikhathalele. Ndibamba ngazibini ngoncedo olufike ngexesha elifanelekileyo.

A.B.K., Zambia

Eli nqaku landinceda ndabona imfuneko yokutshintsha abahlobo bam. Nangona oku kwakunzima, eli nqaku—endisoloko ndiligcina likufuphi—liqhubeka lindomeleza. Ndiyalubulela uncedo nokhuthazo esisoloko silufumana thina bantu baselula.

L. R., EMerika

Imbono YeBhayibhile—Ngaba Ufanele Uthandaze KuMariya Oyintombi Enyulu? (Septemba 8, 2005) Ndiwothulel’ umnqwazi amaNgqina kaYehova ngendlela entle aziphatha ngayo yaye amaphephancwadi enu andincede gqitha. Noko ke, kutheni nisithi asifanele sithandaze kuMariya? Nguye osingxengxezela kuBawo, ukuze sibe seluxolweni.

E. R., ESpeyin

“UVukani!” uyaphendula: Njengokuba licacisile eli nqaku, akukho ndawo eBhayibhileni esiyalela ukuba sithandaze nakubani na ngaphandle kukaThixo. Ngokutsho komfundisi nombhali ongumKatolika uAndrew Greeley, “umfanekiso kaMariya unxulumanisa ubuKristu neenkonzo zamandulo zoothixokazi abangoomama.” Ngoko ke, ukunqulwa kukaMariya kunemvelaphi yobuhedeni ingeyiyo eyobuKristu. Le isenokuba yingcamango entsha kwabaninzi abafunda iincwadi zethu, yaye siyabakhuthaza abanjalo ukuba bahlole iBhayibhile ukuze bafumanise oko ngenene ikufundisayo. AmaNgqina kaYehova amaninzi ayengamaKatolika, kodwa athi akufunda iLizwi likaThixo, afumanisa ukuba uThixo akafuni ukuba sisebenzise abalamleli ngaphandle kukaYesu Kristu xa sithandaza kuye. (Hebhere 7:25) Ukuze ufumane inkcazelo engakumbi, funda incwadi ethi “Yintoni Ngokwenene Efundiswa YiBhayibhile?”a iSahluko 15, esithi “Unqulo Olumkholisayo UThixo,” esithetha ngokubaluleka kokuvumelanisa iinkolelo zethu neZibhalo Ezingcwele.

Ukujamelana Nokugula Uchwayitile (uVukani! wesiNgesi ka-Aprili 22, 2005) Umfazi wam wabulawa sisifo sesibindi ngoDisemba 2002. Wagula iinyanga ezimalunga nezisibhozo. Sekunjalo, wayesoloko ethetha ngezinto ezakhayo aze asibalisele amava ahlekisayo. Ude wafa engumntu ochayitileyo. Emva kokufunda eli nqaku, ndiyasiqonda isizathu. Wayefuna ukuhlala enesimo sengqondo esihle njengokuba oko kwakufuneka nakuthi. Kumele ukuba oku kwakumenza azive ebhetele njengokuba kwakunjalo ngoConchi. Ndiyanibulela ngokundinceda ndisiqonde isizathu sokuba umfazi wam azenze izinto ngendlela awayezenza ngayo.

D. H., EMerika

Izimvo Zabafundi BakaVukani! Ndisoloko ndikulangazelela ukufunda inqaku elithi “Izimvo Zabafundi BakaVukani!” Maxa wambi ndiye ndifunde ileta ebhalwe ngothile ndize ndithi ngaphakathi, ‘nam ndiziva ngendlela efanayo!’ Ngamanye amaxesha, ndidla ngokuzibuza, ‘Ngaba ndiyiphosile le ngongoma kweli nqaku?’ Emva koko ndaphinda ndalifunda elo nqaku, yaye ndidla ngokuchukumiseka ndize ndikhuthazeke ngokwenjenjalo.

M. T., EJapan

[Umbhalo osemazantsi]