Inyathelo 1
Cela Amacebiso
Kutheni eli ilinyathelo elibalulekileyo? Xa umzali egone usana lwakhe lwamazibulo, usenokuba udidekile. UBrett, indoda ehlala eBritani uthi: “Kwakuthe ngco ngaphakathi, phofu ke, ndandimangalisekile. Ndandingcangcazela xa ndicinga ngembopheleleko engaka yokuba ngutata yaye ndandingaqinisekanga enoba ndandiza kukwazi ukuyifeza kusini na le ndima.” Yena uMonica, umama waseArgentina, uthi: “Ndandingaqondi enoba ndandiza kukwazi ukuyikhulisa le ntombazana. Ndandizibuza, ‘Kazi ndiza kukwazi na ukuyiqeqesha ukuze ibe ngumntu oqolileyo?’”
Ngaba unokuzifaka ezihlangwini zaba bazali? Ngokuqinisekileyo, ukukhulisa umntwana yenye yezona zinto zinzima nezivuyisayo, into ekhathazayo nenomvuzo umntu anokuyenza. Kunjengokuba enye indoda enabantwana yakhe yatsho, “umntwana uba ngumntwana kube kanye.” Xa sicinga ngempembelelo enkulu abazali abanayo kwimpilo nakulonwabo lwabantwana babo, usenokuyibona imfuneko yecebiso elinokuthenjwa ngendlela yokukhulisa abantwana ngokuphumelelayo.
Ingxaki: Kubonakala ngathi mntu ngamnye unecebiso lakhe ngendlela yokukhulisa abantwana. Ngaphambili, xa abazali beqalisa ukuba nabantwana, babethembele kumzekelo wabazali babo okanye kwindlela izinto ezenziwa ngayo ecaweni yabo. Kodwa kumazwe amaninzi, iintsapho ziwohlokile yaye unqulo alusenampembelelo ebantwini. Ngenxa yoku, abazali abaninzi babhenela kwiingcali ezihlawulwayo ukuze bafumane amacebiso okukhulisa abantwana. Amanye amacebiso ezi ngcali aluncedo. Noko ke, ngamanye amaxesha, amacebiso azo akanakuthenjwa yaye akhawuleza aphelelwe lixesha.
Isicombululo: Funa icebiso loMntu owazi yonk’ into ngokukhulisa abantwana—uMdali wobomi, uYehova uThixo. (IZenzo 17:26-28) ILizwi lakhe, iBhayibhile, linamacebiso angqalileyo nemizekelo eluncedo enokukunceda ukuze ukhulise abantwana bakho ngendlela ephumelelayo. UThixo uthembisa esithi: “Ndiya kukucebisa iliso lam likuwe.”—INdumiso 32:8.
UThixo ubacebisa esithini abazali ukubanceda bakhulise abantwana abonwabileyo?
[Amagama acatshulweyo akwiphepha 3]
“Kholosa ngoYehova ngayo yonke intliziyo yakho, ungayami ngokwakho ukuqonda.”—IMizekeliso 3:5.