Kutheni Sisoyika Ukuya Kwantsonga Nyawana?
“Ayikho into eyoyikeka njengokufa; kuba kulapho siphelela khona.”—UAristotle.
WAYESAZIWA zizihlobo zakhe njengebhinqa elinenzondelelo kunqulo, ikholwa lokwenene. Abanye babede balityibele ngokuba “liyintsika yecawa yalo.” Lafundiswa ukuba, ukufa ayisosiphelo, kodwa lisango kubomi obuzayo. Kodwa xa lalisekhukweni lokufa lagubha luloyiko. Linomva-ndedwa nokuthandabuza, eli bhinqa labuza umfundisi walo lisithi: “Zininzi kakhulu [iinkolelo malunga noko kwenzeka ekufeni]; wazi njani ukuba yiyiphi echanileyo?”
Kuyinto eqhelekileyo ngabantu neenkonzo ukwamkela ingcamango yokuba kukho ubomi emva kokufa. Phakathi kweenkolelo ezininzi, yiyiphi echanileyo? Abantu abaninzi bayathandabuza enoba kukho nayiphi na indlela umntu angaphila ngayo emva kokufa. Uthini wena? Ngaba ufundiswe ukuba kukho ubomi emva kokufa? Ngaba uyakoyika ukuya kwantsonga nyawana?
Ukoyika Ukungabikho
Abaphandi bathi ukoyika ukufa “kukuxinezeleka ngenxa yokufa.” Kwiminyaka yakutshanje kubhalwe iincwadi neengxelo zenzululwazi ngalo mba. Kodwa abantu abaninzi bakhetha ukungacingi ngokufa. Noko ke, ngenxa yokuba abantu besifa, sithanda singathandi sinyanzelekile ukuba sicinge ngako. Ubomi bomntu buyinto ethe-ethe—malunga nabantu abangama-160 000 bayafa suku ngalunye! Mntu ngamnye, kungakhathaliseki ukuba ungubani, uza kufa, yaye oko kubenza batyhwatyhwe abantu abaninzi.
Iingcali ziye zabeka ukoyika ukufa ngokwamanqanaba awahlukahlukeneyo. Oku kuquka ukoyika iintlungu, ukoyika into esingayaziyo, ukoyika ukulahlekelwa sisalamane okanye umhlobo nokoyika indlela ukufa okuza kubachaphazela ngayo abaseleyo.
Eyona nto iphambili kolu loyiko, kukoyika ukungabikho. Kungakhathaliseki ukuba lufundisa ntoni unqulo, ingcamango yokuba ukufa kukuphela kobomi ibenza babe nentaka abantu abaninzi. Phofu izazinzulu ziyaluphembelela olu loyiko. Ngaphezu koko, onke amalungu omzimba womntu achazwa ngokwenzululwazi ngendlela asebenza ngayo. Ngokuqinisekileyo akukho nasinye isazi ngebhayoloji, ngenzululwazi okanye ngemichiza esifumanise ukuba kukho nto ithile ngaphakathi emntwini ehlala iphila emva kokufa. Ngoko ke, inkoliso yezazinzulu zichaza ukufa komntu njengenkqubo yokwemvelo.
Akumangalisi ke ngoko ukubona abantu abanenzondelelo kunqulo, besoyika ukujongisa imibombo kwantsonga nyawana. Okubangel’ umdla kukuba, kwizinto awazibhala kude kudala uKumkani uSolomon wakuchaza ukufa njengesiphelo esenza abantu batyhwatyhwe luloyiko.
“Eluthulini”—Ngaba Kulapho Siya Kuphelela Khona?
Kwincwadi yakhe yeNtshumayeli eyabhalwa kwiminyaka engama-3 000, uSolomon wathi: “Ngokuba abadla obomi bayazi ukuba baya kufa; ke bona abafileyo abazi lutho, abasabi namvuzo; ngokuba balityelwe, abasakhunjulwa nganto. Sele luphelile kade uthando lwabo nentiyo yabo, nekhwele labo.” Wongezelela ngelithi: “Yonke into esiyifumanayo isandla sakho ukuba siyenze, yenze ngamandla akho; ngokuba akukho kwenza, nakucinga, nakwazi nakulumka kwelabafileyo, apho uya khona wena.”—INtshumayeli 9:5, 6, 10 IBhayibhile YesiXhosa.
USolomon ephefumlelwe wathi “siyafana isiphelo soonyana boluntu nesiphelo sesilo. Njengoko kunjalo ukufa kwaso, kunjalo nokufa kwabo; . . . khon’ ukuze kungabikho kongama komntu kunesilo, . . . ngokuba yonk’ into ingamampunge. Zonke ziya ndaweni nye. Zonke zavela eluthulini, yaye zonke zibuyela eluthulini.”—INtshumayeli 3:19, 20.
Nakuba la mazwi ayebhalwe nguKumkani uSolomon, ayephefumlelwe nguThixo yaye ayinxalenye yeLizwi lakhe iBhayibhile. Ezi ndinyana, nezinye ezininzi eBhayibhileni, aziyixhasi inkolelo eqhelekileyo yokuba kukho into ephilayo kuthi esindayo ekufeni ize iphile ikwenye imo. (Genesis 2:7; 3:19; Hezekile 18:4) Ngaba uThixo usixelela ukuba isiphelo sethu “luthuli” okanye into engekhoyo? Nakanye!
IBhayibhile ayifundisi ukuba kukho into esindayo ekufeni komntu. Kodwa isinika ithemba elihle ngabangasekhoyo. Inqaku elilandelayo liza kubonisa isizathu sokuba ungamele ukoyike ukufa njengesiphelo sobomi kuluntu.
[Ibhokisi ekwiphepha 3]
UTSHABA ESINGENAKUBHUNGCA KULO
Ukufa kwaziwa ngokuba lutshaba lwabantu. Lutshaba ngokwenene, phofu nathi sizibonela ngawethu. Ngokutsho kolunye uhlolisiso, abantu abamalunga nezigidi ezingama-59 bafa minyaka le—umlinganiselo wabantu ababini mzuzwana ngamnye. Ziziphi iindlela abantu abafa ngazo?
◼ Rhoqo kwimizuzwana eli-102 kufa umntu emfazweni.
◼ Ngemizuzwana engama-61 kufa umntu ngokugetyegwa.
◼ Kukho umntu ozibulalayo kwimizuzwana engama-39.
◼ Kufa umntu kwingozi yemoto kwimizuzwana engama-26.
◼ Kwimizuzwana emithathu kukho umntu ofayo ngenxa yendlala.
◼ Kukho umntwana ongaphantsi kweminyaka emihlanu ofayo kwimizuzwana emithathu.
[Ibhokisi ekwiphepha 4]
KUKUSUKELANA NOMOYA
NgoNovemba 9, 1949, uJames Kidd, indoda eyayineminyaka engama-70 ubudala owayesebenza kwimigodi yobhedu, walahleka kwiintaba zaseArizona, eUnited States. Kwiminyaka eliqela kamva, emva kokuba inkundla igunyazisile ukuba agqalwe njengomntu ofileyo, kwafunyanwa umyolelo wakhe obhalwe ngepensile kunye nesazisi sotyalo-mali esasinemali emalunga namakhulu amawaka eedola. OkaKidd, wathi le mali mayisetyenziselwe “ukuphanda ubungqina ngokwenzululwazi ukuba umphefumlo womntu uyaphi na xa esifa.”
Ngokukhawuleza emva koko, izazinzulu ezingaphezu kwe-100 zafaka isicelo sale mali. Kangangeenyanga kwaphulaphulwa izicelo eziliwaka ezazisithi kukho umphefumlo ongabonakaliyo ophilayo. Ekugqibeleni, ijaji yanikela ngale mali kwimibutho emibini ukuze iphande. Sele kungaphezu kweminyaka engama-50, abaphandi abakakhuphi nelimdaka “kubungqina benzululwazi bokuba uyaphi umphefumlo womntu xa esifa.”