Yintoni Oyaziyo Ngokufa?
SONKE siyayazi ukuba ngenye imini siza kufa, enoba sisempilweni okanye sizizityebi kangakanani. Sisenokufa sinqumla nje isitrato okanye silele. Isihelegu esinjengokuhlasela kwabagrogrisi ngoSeptemba 11, 2001, kwisiXeko saseNew York naseWashington, D.C., kusenza siqonde ukuba “olokugqibela utshaba,” ukufa, luhlasela wonk’ umntu enoba umdala okanye uselula, yaye maxa wambi luhlasela amawakawaka abantu ngokuqhwanyaza nje kweliso.—1 Korinte 15:26.
Sekunjalo, abantu babaz’ iindlebe xa kuthethwa ngokufa. Abantu baba nomdla gqitha kwiphephandaba nakumabonwakude, xa zombini ezo zinto zithetha ngokufa, ingakumbi xa kufe abantu abaninzi ngendlela eyothusayo. Abantu abadinwa kukuphulaphula xa kuthethwa ngokufa kwabantu, enoba bafa emfazweni, ngenxa yentlekele yokwemvelo, ulwaphulo-mthetho okanye ngenxa yezifo. Ukufa kuba ngundaba-mlonyeni ingakumbi xa kufe abantu abadumileyo.
Konke oku kuyinyaniso emsulwa. Abantu babaz’ iindlebe xa kuthethwa ngokufa—ukufa kwabanye. Noko ke, baqalisa ukoyika xa becinga ngokufa kwabo. Akukho namnye umntu ofuna ukucinga ngokufa kwakhe.
Ngaba Uyadideka Xa Ucinga Ngokufa?
Akumnandi kwaphela ukucinga ngokufa kwakho yaye loo nto iya kuhlala injalo. Kutheni kunjalo? Kungenxa yokuba uThixo usidale sanomnqweno wokuphila ngonaphakade. INtshumayeli 3:11 ithi ngokutsho kweBhayibhile yesiXhosa: “Kwanephakade ulinikele ezintliziyweni zabo.” Ngoko ke, isibakala sokuba ukufa akunakuphepheka, kuye kwabangela abantu badideka, kuba besadidekile nanamhlanje. Ukuze bayeke ukudideka yaye banelise umnqweno wokwemvelo wokufuna ukuphila, abantu baye bayila iinkolelo ezahlukahlukeneyo, njengemfundiso yokungafi komphefumlo nenkolelo yokuzalwa ngokutsha.
Sekunjalo, ukufa kuseyinto exhalabisayo neyoyikekayo, yaye bonke abantu bayakoyika. Ngoko ke, asimele sothuke kuba abantu ngokubanzi bekufumanisa kunzima ukukwamkela. Ukufa kubhenca ubuze bobomi obusekelwe ekuthandeni izinto eziphathekayo negunya.
Ngaba Sahlukaniswa Kukufa?
Kumaxesha adluleyo, umntu ogulela ukufa okanye onzakeleyo wayedla ngokuvunyelwa ukuba aye kufela kwindawo ayiqhelileyo phambi kwabantu abamthandayo ekhayeni lakhe. Ngokufuthi oko kwakunjalo ngamaxesha okubhalwa kweBhayibhile, yaye oko kusenjalo nakwezinye iindawo. (Genesis 49:1, 2, 33) Kwiimeko ezinjalo, intsapho iyahlanganisana, yaye kubizwa nabantwana ukuze nabo baze kuncokola. Oku kwenza ukuba ilungu ngalinye lentsapho lingabi buhlungu lilodwa aze onke amalungu athuthuzelane.
Oku kwahluke gqitha kwiindawo ekungathethwa nokuthethwa ngokufa, apho ukufa kugqalwa njengento ebuhlungu gqitha nekucingelwa ukuba abantwana abanakukwazi “ukumelana” nayo. Namhlanje ukufa kwahlukile ngeendlela ezininzi, yaye ngokufuthi kubangela ubani azive engenabantu. Nangona inkoliso yabantu ibingathanda ukufela ekhaya, iseluxolweni yaye isezandleni zentsapho yayo eyithandayo, inyaniso ikukuba abaninzi bafela esibhedlele, ngokuqhelekileyo bebodwa yaye begcuma ziintlungu, befakwe oomatshini abaxhakaxhaka. Kwelinye icala, abantu abaninzi bafa bengaziwa—amaxhoba okutshatyalaliswa kohlanga, bebulawa yindlala, uGawulayo, imfazwe yamakhaya okanye ngenxa yobuhlwempu obugqithiseleyo.
Into Ekufanele Kucingwe Ngayo
IBhayibhile ayithi masingacingi ngokufa. Enyanisweni, INtshumayeli 7:2 iyasixelela: “Kulunge ngakumbi ukuya endlwini yokuzila kunokuya endlwini yesidlo, ngenxa yokuba oko kukuphela koluntu lonke.” Xa sijamelane nokufa, sisenokuzilibala izinto esizenza imihla ngemihla size sicinge ngendlela ubomi obufutshane ngayo. Oku kusenokusinceda ukuba siphile sinenjongo kunokuphilela nje ilize.
Yintoni oyaziyo ngokufa? Ngaba uye wayihlola indlela ovakalelwa ngayo, oko ukukholelwayo, ithemba onalo, nezinto ozoyikayo ngesiphelo sobomi bakho?
Njengobomi, abantu abanakukwazi ukukucacisa okanye ukukuqonda ukufa. Okuphela komntu onokuthetha ngalo mbandela eqinisekile nguMdali wethu. Ukuye “umthombo wobomi,” yaye zezakhe “iindlela zokuphuma ekufeni.” (INdumiso 36:9; 68:20) Nakuba kungakholeleki, ukuhlolisisa ezinye iinkolelo ezaziwayo ngokuphathelele ukufa sisebenzisa iLizwi likaThixo kuza kusithuthuzela kuze kusomeleze. Liza kutyhila ukuba ukufa akusosiphelo sayo yonke into.
[Amagama acatshulweyo akwiphepha 4]
Ukwazi ukuba siya kufa kusinceda siphile sinenjongo