Imibuzo Yabafundi . . .
Ngaba Umhlaba Uya Kusoloko Ukwazi Ukuvelisa Ukutya Okwaneleyo?
▪ Umhlaba uyakwazi ukuxhasa ubomi. Noko ke, xa ubona inani labantu lisanda ngesantya esiphezulu kunye nendlela ababurhwaphiliza ngayo ubuncwane bomhlaba usenokuzibuza ukuba: ‘Ngaba kunokwenzeka ukuba umhlaba ungakwazi ukusixhasa? Ngaba kuya kuhlala kukho ukutya okwaneleyo?’
Xa sicinga ngalo mbuzo, sinokuqinisekiswa sisithembiso esenziwa nguThixo kuma-4 000 amane eminyaka eyadlulayo xa wathi: “Ngayo yonke imihla yobukho bomhlaba, akuyi kuphela ukuhlwayelwa kwembewu nokuvuna, ingqele nobushushu, ihlobo nobusika, imini nobusuku.” (Genesis 8:22) Kanye njengokuba sisazi ukuba ilanga liza kuphuma suku ngalunye, sinokuqiniseka ukuba umhlaba awusayi kuze usilele ukuvelisa ukutya okwaneleyo.
Kwingxelo yowama-2004 eyayinomxholo othi “Ngaba Umhlaba Unokusondla?” UAlex Kirby wathi: “Umhlaba uvelisa ukutya okwaneleyo. Ingxaki ikubantu abakuvelisayo yaye ukutya kubiza imali eninzi kakhulu ibe akunakugcinwa ixesha elide. Ngoko ke, asiyonzululwazi egqiba ekubeni abantu baza kuba nokutya okwaneleyo kusini na kodwa yipolitiki.” Ukuba umhlaba ubunyanyekelwa kakuhle besingekhe sibe nexhala lokuba kuza kunqongophala ukutya. Ngokomzekelo, uThixo wayalela uSirayeli wamandulo ngendlela yokusetyenziswa komhlaba. Njengokuba kubhalwe kwiLevitikus 25:4 uThixo wathi kumaSirayeli: “Ngonyaka wesixhenxe kobakho isabatha yophumlo olupheleleyo elizweni . . . Uze ungayihlwayeli ngembewu intsimi yakho.” Nangona babengazi kulima ngonyaka wesixhenxe, uThixo wathembisa abantu ukuba babeza kuba nentabalala yaye babengazukuphelelwa kukutya.—Levitikus 26:3-5.
Nangona abantu besiwa bevuka bezama ukulungisa umonakalo oye wenziwa emhlabeni, abanye banexhala lokuba akusekho nto ingako inokwenziwa. Ekuphela kwesicombululo sale ngxaki sikwiSityhilelo 11:18. Kuloo vesi yeBhayibhile kuthiwa uYehova uza “konakalisa abo bawonakalisayo umhlaba.” UYehova akazukuphelisa ukusetyenziswa kakubi komhlaba nje kuphela kodwa uza kuqinisekisa ukuba umhlaba uvelisa intabalala yokutya. Bonke abantu abayichasa ngenkani injongo kaThixo ngomhlaba nabarhwaphiliza ubuncwane bawo baza kutshatyalaliswa. Kwelinye icala, abo baluxhasa ngokuzithandela ulongamo lukaYehova baza kubona ukuzaliseka kwamazwi eNdumiso 72:16 athi: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.”
Ngenxa yothando lwakhe nobulumko bakhe obungenakulinganiswa nanto, uYehova unenjongo yokuba uluntu luphile luze lunyamekele ikhaya lalo—eliza kuba yiparadesi esemhlabeni. (Genesis 1:28) Ngaphantsi kolawulo lwakhe, abantu abathobelayo baya kufunda ukubusebenzisa kakuhle ubuncwane bomhlaba. Sinombulelo ngokuba noMlungiseleli onjalo oza kwanelisa iintswelo zayo yonke into ephilayo.—INdumiso 145:16.
[Amagama acatshulweyo akwiphepha 22]
“Eyona nto igqiba ekubeni abantu baza kuba nokutya okwaneleyo asiyonzululwazi kodwa yipolitiki”