Ukuqiqa Okusezindabeni
Ngaba Kukhokelela Kubomi Bangaphambili?
Kwiinyanga ezidluleyo amantombazana amathathu esikolo sabaqalayo nesekondari yabancinane afunyanwa ethe tywa engekho zingqondweni kwindlela eseTokushima, eJapan, oko kungumphumo wokuzama ukuzibulala. Yintoni eyawaqhubela ekwenzeni oko? IAsahi Shimbun yanikela le ngxelo: “Ayekholelwa ekubeni ayekukuvela ngokutsha kweenkosazana zamandulo aza azeyisela kwelokuba ukuba ayenokuphantse afe ayenokukwazi ukuthi ntlaa kubomi bawo bangaphambili.” Eli phephandaba lithi, unobangela wesi siganeko ‘lutyekelo phakathi kwabantwana lokuphethukela kwihlabathi lobugqwirha bomlingo, obebusasazeka ngokuphawulekayo kwiminyaka embalwa edluleyo.’ La mantombazana ayengabafundi abanenzondelelo beencwadi ezihlekisayo ezibalaselisa ukuvela ngokutsha.
Noko ke, ukwamkela ingcamango yokuvela ngokutsha kulilize nje ngokufanayo nokusukela into engekhoyo. IBhayibhile ityhila ukuba ekufeni ‘umntu ubuyela emhlabeni wakhe, yaye ngaloo mini ayatshitsha amabhongo akhe.’ (INdumiso 146:4) Le nyaniso engokufa iye yagqutyuthelwa yimfundiso eyinkohliso yokuba umphefumlo uyasinda ekufeni komntu. Kunokufundisa ukuba abantu banomphefumlo ongafiyo, iBhayibhile ithi umphefumlo uyafa. (Hezekile 18:4) Kodwa ngabo bakwinkumbulo kaThixo, kukho ithemba elizukileyo lovuko. (Yohane 5:28, 29) IBhayibhile ikwatyhila umphembeleli oyintloko wemfundiso esisiseko yokungafi komphefumlo neyokuvela ngokutsha; nguSathana uMtyholi, ‘uyise wamaxoki.’—Yohane 8:44; thelekisa iGenesis 3:4.
AmaKatolika Nokuqhomfa
Phantse ukuba kudlule iminyaka elishumi ukususela oko kwathi kwaphandwa ngezimvo zabantu ngokuqhomfa eItali okwashiya iCawa yamaKatolika yoyisiwe. Noko ke, kuxwebhu lwakutshanje olukhutshwe ngoobhishophu baseItali, abaphathi becawa yamaKatolika kwakhona balatha ukuba “ukwala ukuqhomfa okanye kwanokuba lidlelane kuko kuyimfanelo enzulu engokokuziphatha, emiliselwe kumthetho obhalwe entliziyweni yomntu ngamnye nephinde yaqinisekiswa yicawa kuwiso-mthetho lwayo, eyohlwaya amaKristu aqhomfayo okanye adlelanayo nako ngokuwasika ecaweni.”
Abantu baseItali bacinga ntoni ngokuqhomfa? Uhlolisiso lwakutshanje olubandakanya abantu abangama-2 040 lwatyhila ukuba ngokuchasene nemiyalelo yecawa, abantu baseItali bayakuvumela ukuqhomfa kwiimeko ezine. (1) Ukuba ukumitha kububeka engozini ubomi bukamama, ama-83 ekhulwini ayakuxhasa ukuqhomfa. (2) Xa kukho ingozi yokungayileki kakuhle kwemveku engekazalwa, ama-76,3 ekhulwini ayakuxhasa ukupheliswa kokumitha. (3) Xa impilo kamama isengozinini, ama-71,1 ekhulwini ayakuxhasa ukuqhomfa. (4) Ukuba ukumitha kungumphumo wokudlwengulwa, ama-55,2 ekhulwini ayavuma ukuba ukuqhomfa kufanele kuvunyelwe. Abantu baseItali abangaphezu komnye kwabane bayakuxhasa ukuqhomfa “kuzo zonke iimeko apho ibhinqa lithanda ukukwenza,” inikela le ngxelo iLa Repubblica. Ukuqhomfa okusemthethweni nokungekho mthethweni okuthelekelelwa kuma-300 000 kuyenziwa nyaka ngamnye eItali.
Kucacile ukuba kwiimeko ezinjalo ukuba nzulu, abaphathi becawa abangamaKatolika abakwazanga ukunikela uyalelo olungokweZibhalo olufanelekileyo noluthembekileyo olunokubenza bathotyelwe. Noko ke, amaKristu okwenyaniso aye afundiswa oko kuthethwa ziZibhalo ngalo mbandela ubalulekileyo. Ngenxa yokuhlonela kwawo iimfuneko eziphakamileyo ezingokweBhayibhile zokuziphatha okuhle, akaqhomfi kuzo naziphi na iimeko ezine ezichazwe ngasentla.—Eksodus 21:22-25; bona kwaneNdumiso 139:14-17; Yeremiya 1:5.