Indlela Ekhuselekileyo Yokuqhuba
NANGONA izigidi zabantu namhlanje zikugqala njengento eyimfuneko, ukuqhuba kunokuba yingozi. Kuqikelelwa ukuba nyaka ngamnye abantu abangaphezu kwesi-1 200 000 ehlabathini lonke baye bafa kwiingozi zemoto! Ngenxa yoko, ngaba akungebi kuhle ukufunda ukuqhuba ngendlela ekhuselekileyo? Makhe sihlolisise amanyathelo anokusinceda.
✔Zihlolisise
Ingxelo ekwiAustralian Journal of Social Issues yaphawula ukuba enye into enokwenziwa ngumqhubi ukuze anciphise iingozi, kukuphucula indlela aqhuba ngayo. Ngoko ke, ngaphambi kokuba angene endleleni, umqhubi usenokuzibuza oku, ‘Ngaba ndikwimeko entle ukuba ndingaqhuba?’ Ukudinwa kunokuyenza icothe ingqondo yomntu yaye usenokungakwazi ukuphepha ingozi. ILand Transportation Office yakwiiPhilippines ithi, umsindo, uxinezeleko, nemincili ziyayichaphazela indlela umntu aqhuba ngayo yaye zinokubangela ukuba umntu afane enze aze abe krwada kwabanye abaqhubi.
Nawe umele uhlole isiqu sakho kuba ezinye izigulo okanye ukwenzakala kusenokukwenza ukuba ungaqhubi ngendlela ekhuselekileyo. Umqhubi obuxabisileyo ubomi babanye abantu, akasayi kuqhuba xa esele utywala. Ezinye iipilisi okanye amayeza zinokuphazamisa indlela umqhubi asabela ngayo. Kwezinye iimeko kunokuba bubulumko ukungaqhubeki nolo hambo okanye ucele omnye umntu akuqhubele.
✔Hlolisisa Indlela Oqhuba Ngayo
Njengokuba ziya zisiba ninzi iimoto ingakumbi kumazwe asakhasayo, baninzi nabaqhubi abangekabi namava. Ngenxa yoko, kuhle ukuba umqhubi acinge ngezi zinto zimbini ukuze aphephe iingozi.
Yijonge indlela abanye abaqhuba ngayo! Hlala uphaphile, jonga ngaphambili nangasemva izinto ezisenokuba yingozi uze ujonge indlela abanye abaqhubi abaqhuba ngayo—kuquka nabo baqhuba kakubi. Ekubeni iingozi ezininzi zibangelwa kukusondelelana kakhulu kweemoto, umqhubi olumkileyo akayisondezi kakhulu imoto yakhe kwezinye.
Jonga nantoni na eyenzekayo macala omabini emoto nezinto ezisenokukuphazamisa. Yijikajike intloko yakho ukuze ukubone oko kwenzekayo emacaleni emoto yaye ungathembeli kwizipili zakho kuphela. Ziphephe izinto ezisenokukuphazamisa ngoxa uqhuba. Musa ukwenza izinto ezininzi ngexesha elinye—njengokuthetha efowunini okanye ukucofa-cofa ezinye izinto.
Ukuba uqhuba isithuthuthu: Abasemagunyeni bathi, ngekhilomitha enye umntu oqhuba isithuthuthu unamathuba angama-37 okufa engozini xa kuthelekiswa nomntu oqhuba imoto. Ungazikhusela njani? La manyathelo angasentla ayasebenza nakumntu oqhuba isithuthuthu. Ukongezelela, iMotorcycle Safety Foundation yaseUnited States ithi: “Abanye abaqhubi mabakubone.” Qiniseka ukuba abanye abantu bayakubona. Izibane mazihlale zikhanyisiwe. Kuphephe ukuba kwiindawo ongenakubonwa kuzo ngabanye abaqhubi. “Nxiba ngendlela ekhuselekileyo.” Nxiba umnqwazi wesithuthuthu nempahla ekhuselekileyo, engqindilili nenombala oqaqambileyo. “Yijonge indlela abanye abaqhubi abaqhuba ngayo.” Qhuba ngokungathi abanye abakuboni.
✔Yihlolisise Imoto Yakho
Umqhubi ufanele aluxhalabele ukhuseleko yaye imoto yakhe ifanele ibe kwimeko entle. Iziqhoboshi zifanele zisebenze kakuhle kuquka nazo zonke ezinye izinto zemoto. Amatayara amele abe kwimeko entle ukuze imoto ikwazi ukubambelela endleleni ingatyibiliki. Xa enomoya owaneleyo, amatayara aya kunceda umqhubi akwazi ukulawula imoto ize ime lula xa ebamba iziqhoboshi. Iimoto ezininzi zakutshanje zenziwa zibe namabhanti. La mabhanti akancedi xa engabotshwanga.
Qhuba imoto yakho ngokuvumelana nendlela ehamba kuyo. Imoto imisa kade yaye kunzima ukuyilawula kwindlela emanzi ngokukodwa xa inomkhenkce okanye ikhephu. Izibane zifanele zihlale zisebenza kakuhle ukuze zikuncede xa uqhuba ebusuku yaye ufanele uqhube ngesantya esifanelekileyo. Ekubeni ubomi busisipho esivela kuThixo, kubalulekile ukwenza oko sinokukwenza ukuzikhusela, kuquka ukufunda ukuqhuba ngendlela ekhuselekileyo.
[Ibhokisi/Umfanekiso okwiphepha 13]
UKUQHUBA NGENDLELA EYONGA IMALI
◼ Qhuba kakuhle: Ukubalekisa imoto nokusoloko ubamba iziqhoboshi kwenza usebenzise amafutha amaninzi.
◼ Kuphephe ukudumisa imoto ngenjongo yokuyifudumeza: Iimoto ezikhoyo akuseyomfuneko ukuba zifudunyezwe ngaphambi kokuba zihambe. Ukuba akuzi kuyiqhuba imoto kwisithuba esingaphezu kwesiqingatha somzuzu, yicime.
◼ Amatayara makahlale enomoya owaneleyo: Amatayara ajikeleza lula xa enomoya owaneleyo, nto leyo eyonga amafutha.
◼ Qhuba ngesantya esiphantsi: Ukuqhuba ngesantya esiphezulu kunokuba yingozi yaye kugqiba amafutha.
[Umzobo/Umfanekiso okwiphepha 11]
❏ Hlala uphaphile
❏ Bopha ibhanti
❏ Musa ukwenza izinto ezininzi ngexesha elinye
❏ Ziphephe izinto ezinokukuphazamisa
[Umzobo/Umfanekiso okwiphepha 12]
❏ Ziphaphele izinto ongenakuzibona ngokulula
❏ Iziqhoboshi zemoto zimele zisebenze kakuhle
❏ Amatayara afanele abe nomoya owaneleyo
❏ Amatayara makabe kwimeko entle
❏ Musa ukusondela kakhulu kwezinye iimoto
[Umzobo/Umfanekiso okwiphepha 13]
❏ “Nxiba ngendlela ekhuselekileyo”
❏ “Abanye abaqhubi mabakubone”
[Umzobo/Umfanekiso okwiphepha 13]
❏ Hlola izibane zemoto