Okwenzeka Ehlabathini

◼ “Ngoku iintlekele ezisithoba kwezilishumi zibangelwa yimozulu. Inani leentlekele ezaziwayo liye laphindaphindeka kabini lisuka kuma-200 laya kutsho kuma-400 ngonyaka kule minyaka ingamashumi amabini idluleyo.”—UJOHN HOLMES, USEKELA SOSIBA JIKELELE WEZIZWE EZIMANYENEYO NOMALATHISI WEMICIMBI YOLUNTU NONCEDA KWIINTLEKELE.

Amalungelo Abantu Bomthonyama

Isindululo Sezizwe Ezimanyeneyo Samalungelo Abantu Bomthonyama esamkelwa ngowama-2007 sele siguqulelwe ngesiMaya nangesiNahuatl, lwimi ezo zithethwa ngabantu abaninzi eMexico. Iphephandaba iEl Universal lithi: “[EMexico] abantu abamalunga nezigidi ezili-10 abawazi amalungelo abo. Ngenxa yaloo nto abadli ngakuyazi into yokuba bangamaxhoba okuxhatshazwa.” Kuthiwa ukuguqulelwa kolu xwebhu kuza kwenza ukuba ahlonelwe amalungelo asisiseko aba bantu.

Ukuthengisa Ngobunyulu

Iphephancwadi iNewsweek Polska lithi, izazi ngentlalo yabantu zothukile yindlela olunye ulutsha lwasePoland olukungxamele ngayo ukuba neentlobano zesini okokuqala ngenjongo yokufumana imali. Isazi ngengqondo, uJacek Kurzępa weYunivesithi yaseZielona Góra sithi: “Ulutsha luphenjelelwa yingcamango ezele yonk’ indawo yokuba yonk’ into iyathengiswa.” Luninzi ulutsha olude luthengise ngobunyulu balo kwi-Internet. Noko ke, olu lutsha lubetheka kabuhlungu ngokwenza ukhetho olunjalo. Lo kaKurzępa uthi: “Eso sigqibo sonakalisa ubomi balo bonke size sonakalise nemvisiswano phakathi kwalo nabo baza kuba ngamaqabane alo.”

Kwakha Kwakho Iidolophu EAmazon

Kusenokwenzeka ukuba imimandla emikhulu ekumazantsi eAmazon, ekucingwa ukuba ayizange imiwe, yakha yanezixeko “ezibiyelwe ngeendonga ezinde.” Le ngxelo yeza nezazi ngezentlalo ezisebenza eMato Grosso, eBrazil. Apho bafumanisa ukuba sele kukhule imithi kwindawo emalunga nezikwekhilomitha ezingama-30 000, “eyayithe tshitshilili iidolophu nezixekwana” ezibiyelwe ngeendonga. Ezinye kwezi dolophu zaziziihektare ezingama-60. Ingxelo eyenziwa yiYunivesithi yaseFlorida nezazisebenza kuyo ezi zazi ngezentlalo kuthethwe ngazo ngasentla ibonisa ukuba, ezi dolophu zazikho “phakathi kowe-1250 nowe-1650, xa abemi baseYurophu nezifo abaza nazo zabulala uninzi lwabemi balapho.”

Izityalo Zikwenza Uchache Msinya Emva Kotyando

Sekulithuba icingelwa into yokuba, ukusondela kwindalo kunokulunciphisa uxinezeleko, kumenze ayeke ukuzisizela kuze kumnike isiqabu umntu ogulayo. Uphando olutsha luya kungqina oko. IScience Daily ithi: “Emva kokuba betyandiwe, abanye abantu bathathwa basiwa kumagumbi anezityalo abanye basiwa kwangenazo. Abo babekumagumbi anezityalo babengeva zintlungu zingako, ngenxa yoko babengawasebenzisi kakhulu amayeza okuthomalalisa iintlungu, iintliziyo zabo zazibetha kakuhle negazi lihamba kakuhle ibe bayitsho into yokuba bayawathanda amagumbi abawanikiweyo ngokungafaniyo nabo babengenazo izityalo. Ama-93 ekhulwini abo babenezityalo bathi “zaziyeyona nto ibenza bachache” kula magumbi abo.