Ukusebenzisa Ezobugcisa Ngendlela Efanelekileyo Nelinganiselweyo
UKatherine okwiminyaka engama-20 ubudala usebenzisa ikhompyutha emsebenzini. Kodwa wafumanisa ukuba xa esekhaya, uchitha ixesha elininzi kwi-Internet, ethenga izinto kuyo aze afunde “iie-mail” zakhe. Sekunjalo, wafumanisa ukuba akazisebenzisi kangako izinto zobugcisa xa ezithelekisa nolutsha asebenza nalo. Uthi: “Kutheni besoloko bendithumelela imiyalezo engenamsebenzi? Ndingumntu! Kutheni bengenakundifowunela bathethe nam?”
UNZIMA ke lo mbuzo kaKatherine kuba naxa uthetha nomntu efowunini akumboni. Kodwa ke siyavakala isikhalo sakhe: Zonke izixhobo zonxibelelwano zenza ungayiva indlela avakalelwa ngayo lowo unxibelelana naye. Ukuze uzisebenzise ngolungelelwano izixhobo zobugcisa, hlola le migaqo yeBhayibhile ilandelayo.
◼ “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Xa siphila ngokuvumelana namazwi kaYesu Kristu kwindlela esizisebenzisa ngayo iiselfowuni neekhompyutha, siyakwazi ukubahlonela abanye size sibonise imbeko. Ibhinqa elinguAnne lithi: “Mna nomyeni wam sasikwivenkile yokutyela. Kwitafile eyayisecaleni kweyethu kwakukho amadoda amabini awayesitya. Enye yayithetha efowunini ngoxa isitya. Sayisizela leyo yayihamba nayo kuba yayisitya ‘yodwa.’” Ubunokuvakalelwa njani ukuba ubuyile ndoda itya yodwa? Ubuza kuba buhlungu okanye ukhathazeke? Isibakala sokuba iselfowuni sinokuyisebenzisa phantse kwiindawo zonke nanini na sifuna, asithethi ukuba simele senjenjalo. Simele salathiswe ngamazwi kaYesu.
◼ “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha.” (Efese 5:15, 16) Ixesha sisipho esixabisekileyo esivela kuThixo nesingamele sisetyenziswe nakanjani na. Kuyavunywa kona ukuba ezobugcisa zonga ixesha. Ngokomzekelo, i-Internet iyakhawuleza xa uphanda, xa usenza izinto zakho zebhanki naxa uthenga. Kodwa uya kube udlala ngexesha xa ulichitha ukhangela into ongayaziyo kwi-Internet.
Enye into enokuchitha ixesha kukwenza izinto ezininzi ngexesha elinye—njengokusebenza ekhompyutheni, ubukele umabonwakude, ube uthetha efowunini okanye ujonge iie-mail nezinye iinkqubo zekhompyutha. Kutheni ungenakuvuna nto ngokwenza izinto ngexesha elinye?
UGqr. Jordan Grafman, isazinzulu ngemithambo-luvo uthi: “Akukho nenye into onokuyazi kakuhle xa usenza izinto ezininzi ngexesha elinye.” Asinakuze sikwazi ukwenza izinto ezininzi ngexesha elinye, enye yazo asizi kuyenza kakuhle. Ukwenza izinto ezininzi ngexesha elinye kunokubangela ukuba wenze izinto ngokungakhathali. Ingxelo yephephancwadi iTime ithi: “Ukukhawuleza utshintshe ukunikela ingqalelo kwinto obuyenza kunokwenza ukuba abantu benze iimpazamo ezininzi yaye kunokuthatha ixesha elide—eliphindwe kabini nangaphezulu—ukuzigqiba kunaxa bezenziwe ngokokulandelelana kwazo.” Ngoko ke, cinga kabini ngaphambi kokwenza izinto ezininzi ngexesha elinye kuba lungaphela usuku lwakho ungekazigqibi izinto obuzimisele ukuzenza.
◼ “Nizilinde kulo lonke uhlobo lwenkanuko, kuba kwanaxa umntu enentabalala ubomi bakhe abuphumi kwizinto anazo.” (Luka 12:15) Izinto eziphathekayo, enoba zibiza imali eninzi okanye zintle kangakanani na, azinakusinika ubomi okanye ulonwabo lokwenene. NguThixo kuphela onokwenjenjalo. UYesu wathi: “Banoyolo abo bayiphapheleyo intswelo yabo yokomoya.” (Mateyu 5:3) Kwelinye icala, abezorhwebo bathi ukuze wonwabe ufanele ube nezinto eziphathekayo. Bathi: ‘Thenga, thenga, thenga. Ufanele ube nezinto zakutshanje.’ Ungalahlekiswa. Kunoko, yiba sisilumko. Hlola iinjongo zakho nezinto eziyimfuneko ngaphambi kokuba uthenge ngemali oyisebenzele nzima. Kwakhona khumbula ukuba izinto zobugcisa zikhawuleza ziphelelwe lixabiso. Ngoko ke, xa kukho into ethile yobugcisa oyifunayo, zibuze, ‘Ngaba ndifanele ndithenge eyona intsha? Ngaba kuyimfuneko ukuthenga isixhobo esinezinye izinto ezongezelekileyo endingenakuze ndizisebenzise?’
Ziluncedo Okanye Ziyingozi—Ukhetho Lolwakho
UKatherine ekuthethwe ngaye ngaphambili, wakhathazeka kakhulu xa konakala ikhompyutha yakhe. Uthi: “Ekuqaleni ndothuka kodwa ndagqiba ekubeni ndingakhawulezi ndiyitshintshe. Emva kwenyanga ndingasenakhompyutha, ingqondo yam yayipholile yaye ndafumana ithuba lokufunda. Ikhompyutha ndiyisebenzisa emsebenzini kodwa ndisanxibelelana nabahlobo bam emva kwexesha lomsebenzi. Ndiyakwazi ukuphila ngaphandle kwayo. Izinto zobugcisa azisabulawuli ubomi bam.”
Ewe kona izinto ezininzi zenzululwazi nezobugcisa ziluncedo yaye zinokusongela ixesha namandla ethu. Ngoko ke, zisebenzise xa kuyimfuneko kodwa zisebenzise kakuhle nangokulinganiselweyo. Unokukwenza njani oko? Abantu mabeze kuqala kunezinto zobugcisa. Kuphephe ukudlala ngexesha elibalulekileyo nemali yakho kwizinto zobugcisa ezingeyomfuneko. Musa ukusebenzisa i-Internet nezinye izinto zobugcisa ubukele imifanekiso engamanyala nogonyamelo. Yaye musa ukuba “likhoboka” lezinto zobugcisa. Ngamafutshane, yiba sisilumko—sebenzisa imigaqo ephefumlelweyo nengaphelelwa lixesha ekwiLizwi likaThixo elibhaliweyo, iBhayibhile Engcwele. Ewe, “uYehova unika ubulumko; emlonyeni wakhe kuphuma ukwazi nokuqonda.”—IMizekeliso 2:6.
[Ibhokisi ekwiphepha 9]
IISELFOWUNI, IIKHOMPYUTHA NOKUBA NEMBEKO
Ungayisebenzisa njani iselfowuni nekhompyutha ngendlela efanelekileyo? Makhe sihlole la macebiso alandelayo.
◼ Kuphephe ukuphendula okanye ukufowuna ngexesha nakwindawo onokubaphazamisa kuyo abanye abantu. Yicime ifowuni yakho xa kuyimfuneko.
◼ Musa ukuvumela ukukhala kwefowuni kukuphazamise xa uncokola nomnye umntu ngento ebalulekileyo ngaphandle kokuba kunyanzelekile ukuba uyiphendule loo fowuni.
◼ Xa uthetha efowunini nomnye umntu, mphulaphule.
◼ Musa ukufota omnye umntu ngefowuni xa ukwenjenjalo kunokubonisa ukungamhloneli okanye kumenzela iintloni.
◼ Kuphephe ukuthumelela abanye abantu zonke iie-mail “ezibangel’ umdla” kuwe. Abo bantu ubathumelelayo basenokungayithandi loo nto.