Ukuhambela Phambili Kwezobugcisa
KWELASEALBANIA kuyinto eqhelekileyo ukubona umntu omdala ekhwele idonki ngoxa ethetha kwiselfowuni. Kanti eIndiya umntu uyakwazi ukuthi engqiba akhe eme kancinane afowune okanye aphendule iselfowuni yakhe. Eneneni, izinto zobugcisa ezinjengeeselfowuni, iikhompyutha noomabonwakude, zigcwele ehlabathini—ayisezozityebi kuphela ezinazo kodwa namahlwempu—yaye abantu abaninzi sele bephila ngazo.
Ukuhambela phambili kwezobugcisa kubonakala kakhulu kubuninzi beeselfowuni, yaye uninzi lwezi fowuni alusasetyenziselwa ukufowuna nje kuphela. Abantu abaneefowuni eziphucukileyo bayakwazi ukungena kwi-Internet, bathumele baze bafumane iiemail nemiyalezo ebhalwayo, babukele umabonwakude, baphulaphule umculo, bafote, ibalathise indawo abafuna ukuya kuyo, babe ke sele befowuna nokufowuna.
Ngokutsho kwengxelo yephephancwadi iWashington Post, ifowuni enobuxhakaxhaka obuninzi “sele inobuchule obubodlula lee obo bekhompyutha eyafakwa yiNorth American Air Defense Command ngowe-1965.” IPost le ithi: “Ngokomlinganiselo, mntu ngamnye eMhlabeni uneeselfowuni ezimbini,” yaye ubuncinane kumazwe angama-30 iiselfowuni zininzi kunabantu. Eli phephandaba lithi, enyanisweni “ezobugcisa zihambela phambili ehlabathini ngomkhamo ongazange ubonwe ngaphambili ezimbalini.”
Ehlabathini lonke, malunga nama-60 ekhulwini abantu abasebenzisa iiselfowuni bahlala kumazwe asakhasayo, nto leyo eyenza ukuba ezi fowuni zibe zezona zixhobo zobugcisa zisetyenziswa gqitha kwezonxibelelwano kuloo mazwe. Ngokomzekelo, eAfghanistan abantu abali-140- 000 baye bathenga iiselfowuni nyanga nganye ngowama-2008, ngoxa kutshanje eAfrika ukusetyenziswa kweeselfowuni kuye kwanda malunga nama-50 ekhulwini ngonyaka.
Kodwa oku kuhambela phambili kwezonxibelelwano kunazo iingxaki zako. Iiselfowuni, iipager neekhompyutha eziziilaptop zenza abantu bafumaneke ngalo lonke ixesha, naphi na, nto leyo ebangela ukuba abantu bahlale bebambiseke kuzo. Kanti abanye abayibaxayo, ngabo “bangamakhoboka” ezobugcisa abahleli nje baxakeke zezonxibelelwano, befuna ukwazi oko kuqhubekayo ehlabathini.
“Ukuba likhoboka” nokuphazamiseka—mhlawumbi zezona ngxaki zaziwayo ezinxulumene nezonxibelelwano namaziko eendaba.a Kodwa kwaezi zixhobo ziluncedo kakhulu. Ngoko unokuzisebenzisa njani ngolungelelwano, ngobulumko, nangolwazelelelo? Kula manqaku alandelayo uza kuphendulwa lo mbuzo.
[Umbhalo osemazantsi]
a Olu ngcelele lwamanqaku luza kunikela ingqalelo kwizixhobo ezinjengeeselfowuni, iikhompyutha, oomabonwakude kwakunye neInternet. Ngaphandle kokuba kuchazwe ngenye indlela, igama elithi “ezobugcisa” libhekisela kwezi zinto zingasentla.