Ibhokisi Yemibuzo

◼ Yiyiphi imigaqo yeBhayibhile ephathelele ukusetyenziswa kweeselfowuni ngoxa sikwintlanganiso zamaKristu naxa sisentsimini?

“Yonke Into Inexesha Layo Elimisiweyo.” (INt. 3:1): Iiselfowuni zenza abantu bakwazi ukubhala okanye ukuthetha nabanye abantu nangaliphi na ixesha. Noko ke, kubakho amaxesha xa amaKristu engafuni ukuphazanyiswa zifowuni zawo. Ngokomzekelo, ebudeni beentlanganiso lixesha lokunqula uYehova, lokwamkela imiyalelo kaThixo nokukhuthazana. (Dut. 31:12; INdu. 22:22; Roma 1:11, 12) Ngaba asinakuzicima iifowuni zethu xa sifika size sifunde imiyalezo emva kweentlanganiso? Ukuba kukho imeko yongxamiseko efuna sihlale sizivulile, sifanele sizenze zingabaphazamisi abanye.

‘Yenza Zonke Izinto Ngenxa Yeendaba Ezilungileyo.’ (1 Kor. 9:23): Maxa wambi, kubakho izizathu ezivakalayo zokusebenzisa iselfowuni entsimini. Ngokomzekelo, umzalwana okhokelayo usenokuyisebenzisa ukuze azi ngabanye abavakalisi abasebenza komnye umhlaba. Ngamanye amaxesha abavakalisi basebenzisa iiselfowuni zabo ukuze bafowunele umntu onomdla okanye isifundo seBhayibhile ngaphambi kokuba baye ekhayeni laso, ingakumbi ukuba sihlala kude. Ukuba siphethe iselfowuni sifanele silumkele ukuba ingasiphazamisi xa sithetha nomninimzi. (2 Kor. 6:3) Xa silinde abanye abavakalisi, kunokuba sifowunele okanye sibhalele abahlobo bethu, bekuya kuba kuhle ukunikela ingqalelo kubulungiseleli okanye sincokole nabo sisebenza nabo.

Yiba Noxabiso Ngabanye. (1 Kor. 10:24; Fil. 2:4): Sifanele sizame ukufika kwangethuba engxubushweni yasentsimini ukuze siphephe ukufowuna okanye sibhalele omnye ukuze sazi ukuba kushunyayelwa phi. Xa sifika emva kwexesha kufuneka labiwe ngokutsha iqela. Kakade ke, zikho iimeko esingakwazi ukuziphepha ezinokusenza sifike emva kwexesha. Sekunjalo, xa sikwenza umkhwa ukufika kwangethuba, sibonisa ukuba siyalixabisa ilungiselelo likaYehova, umzalwana okhokelayo kunye nabazalwana bethu.