Oko Sikufunda Kwindalo
“Hayi indlela emininzi ngayo imisebenzi yakho, Yehova! Yonke uyenze ngobulumko.”—INdumiso 104:24.
ABANTU abaninzi basebenzisa igama elithi “indalo” xa bethetha ngomthombo wokuyilwa kwezinto eziphilayo. Ngokomzekelo iScientific American kaMatshi 2003, yathi: “Kuzo zonke izinto ezigquma umzimba ezikhoyo kwindalo, iintsiba zezona ziziindidi ezahlukeneyo nezimangalisa kakhulu.” Nangona lo mbhali ecinga ukuba indalo ngamandla nje akhoyo, uthi yindalo leyo “eyile” iintsiba. Ngaba amandla anokuyila izinto?
“Ukuyila” kuthetha “ukuceba (into ethile) unenjongo ekhethekileyo.” (itsho njalo iThe New Oxford Dictionary of English) Ngumntu kuphela onokuyila aze enze into ethile. Kanye njengokuba abantu abenza izinto benamagama, noMdali unalo igama. UMyili wendalo nguYehova. Nguye yedwa “Oyena Uphakamileyo phezu komhlaba wonke,” ‘nowadala zonke izinto.’—INdumiso 83:18; ISityhilelo 4:11.
Yintoni ke esiyifundayo kwindalo? Eyona nto siyifundayo kuyo, nguYehova neempawu zakhe ezimangalisayo kwakunye nobulumko bakhe. “Iimpawu zakhe ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe.” (Roma 1:20) Indalo isifundisa ukuba ubulumko bukaThixo bungaphezu kobethu. Ukuba uyakwazi ukuyila izinto ezibhetele kunezo ziyilwe ngabantu, ngaba akukho ngqiqweni ukucinga ukuba angasicebisa bhetele kunabantu?
Icebiso likaThixo alifumaneki “kwincwadi yendalo,” kodwa libhalwe kwiLizwi lakhe, iBhayibhile. Uthini wena? Ngaba uMyili wamalungu ethu okunxibelelana angathanda ukunxibelelana nathi? Kusengqiqweni ukuba afune ukwenjenjalo. IBhayibhile ithi: “Sonke iSibhalo siphefumlelwe nguThixo.”—2 Timoti 3:16.
Ukuba uyathanda ukufunda ngabantu abayile izinto, unokuba nomdla ngakumbi wokufunda ngoMdali. Ngokomzekelo, kusenokwenzeka ukuba ufuna ukuphenduleka kwimibuzo efana nale: Kutheni sibandezeleka size sife? Ngaba ngokwenene leyo yayiyinjongo kaThixo ngabantu? Ukuba akunjalo, kutheni uThixo evumele ukubandezeleka?
Enoba ziyathanda okanye azithandi, izazinzulu zikufunde kuYehova ukuyila izinto. Nawe ungafunda lukhulu kuMdali wethu. Ngokomzekelo, unokufunda indlela yokonwaba emtshatweni wakho, indlela yokubakhulisa kakuhle abantwana, injongo kaThixo ngomhlaba nezinye izinto ezininzi ezinokukwenza uphile kamnandi. Incwadi ethi Yintoni Ngokwenene Efundiswa YiBhayibhile? epapashwe ngamaNgqina kaYehova, inokukunceda ufunde lukhulu kwiLizwi likaThixo.