Abantu Abaselula Bayabuza
Ndingenza Njani Ukuze Ndizihlonele?
EWE HAYI
Ngaba uyazithanda xa uzijonge esipilini? ◯ ◯
Ngaba ucinga ukuba uneempawu ezintle? ◯ ◯
Ngaba uyakwazi ukumelana nengcinezelo yoontanga? ◯ ◯
Ngaba uyakwazi ukumelana nokugxijwa? ◯ ◯
Ngaba uyakwazi ukumelana nokugculelwa? ◯ ◯
Ngaba uziva uthandwa? ◯ ◯
Ngaba uyayinyamekela impilo yakho? ◯ ◯
Ngaba uyavuyisana nabanye abantu xa bephumelela? ◯ ◯
Ngaba xa uzijonga wena ubona umntu ophumeleleyo? ◯ ◯
Ukuba uphendula ngokuthi hayi kwimibuzo emininzi kule ingasentla, kusenokwenzeka ukuba ukungazihloneli kwakho kukwenza ungaziboni iimpawu zakho ezintle. Eli nqaku liza kukunceda uzibone ezi mpawu!
ULUTSHA oluninzi lunengxaki yokungaqiniseki ngenkangeleko yalo, izinto olunokuzenza yaye luzithelekisa nolunye ulutsha. Ngaba nawe unaloo ngxaki? Ukuba kunjalo, akuwedwa!
● “Ziyandikhathaza iziphako endinazo. Ndiyathanda ukuzihlab’ amadlala”—ULeticia.a
● “Enoba umhle okanye uyinzwana kangakanani na, basoloko bekho abantu abahle ngaphezu kwakho.”—UHaley.
● “Ndizoyikisela kakhulu xa ndiphakathi kwabanye abantu. Ndoyika ukuba abanye bacinga ukuba ndingungantweni.”—URachel.
Ukuba uvakalelwa ngendlela efanayo neyolu lutsha lucatshulwe ngasentla, ungalahl’ ithemba. Unokuncedakala. Makhe sihlole izinto ezintathu ezinokukunceda uzihlonele ngakumbi.
1. Yiba Nabahlobo
Isibhalo onokusisebenzisa. “Iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.”—IMizekeliso 17:17.
Intsingiselo yaso. Umhlobo wokwenene unokukuxhasa ngokukodwa ngamaxesha anzima. (1 Samuweli 18:1; 19:2) Ukucinga nje ukuba kukho umntu okukhathaleleyo kunokukuhlaziya. (1 Korinte 16:17, 18) Ngoko ke, yiba nabahlobo abanempembelelo entle kuwe.
“Abahlobo bokwenene baya kukukhuthaza.”—UDonnell.
“Maxa wambi eyona nto ibalulekileyo kukwazi ukuba ukho umntu okukhathaleleyo. Ukwazi oko kunokukwenza uzive uxatyiswa.”—UHeather.
Isilumkiso: Qiniseka ukuba abahlobo bakho baphucula obona buntu bakho—kungafuneki uzenze omnye umntu ukuze wamkeleke kubo. (IMizekeliso 13:20; 18:24; 1 Korinte 15:33) Ukwenza izinto zobudenge kuba nje ufuna ukwamkelwa ngabahlobo bakho kuya kukwenza uzive uthotyiwe yaye kudlalwe ngawe.—Roma 6:21.
Lithuba lakho lokuba ubhale izinto ezinokukunceda. Bhala apha ngezantsi igama lomhlobo wakho onokukwenza uzihlonele.
․․․․․
Unokwenza amalungiselelo okuchitha ixesha elingakumbi nalo mhlobo umbhale ngasentla. (Phawula: Akunyanzelekanga ukuba abe yintanga yakho lo mntu)
2. Yenzela Abanye Abantu Izinto
Isibhalo onokusisebenzisa. “Kunoyolo ngakumbi ukupha kunokwamkela.”—IZenzo 20:35.
Intsingiselo yaso. Xa unceda abanye abantu, unceda kwawena. Yenzeka njani loo nto? Umzekeliso weBhayibhile uthi: “Umphefumlo onesisa uya kutyetyiswa, yaye oseza abanye ngesisa naye uya kusezwa ngesisa.” (IMizekeliso 11:25) Liyinyaniso elokuba uyonwaba xa unceda abanye abantu.b
“Ndiye ndicinge ngeendlela endinokubanceda ngazo abanye ebandleni ndize ndenjenjalo. Ukubonisa uthando nokuchitha ixesha nabanye abantu kundenza ndonwabe.”—UBreanna.
“Umsebenzi wamaKristu wokushumayela uyanceda kuba ukwenza uyeke ukusoloko ucinga ngawe kodwa ucinge nangabanye abantu.”—UJavon.
Isilumkiso: Musa ukunceda abantu unyeke ukuba nabo bakuncede. (Mateyu 6:2-4) Akunakukunceda nganto ukupha abantu izinto kuba nawe ufuna bakuphe. Abantu badla ngokumbona umntu opha ngeenjongo ezimbi!—1 Tesalonika 2:5, 6.
Lithuba lakho lokuba ubhale izinto ezinokukunceda. Cinga ngomntu okhe wamnceda. Yayingubani lowo yaye wawumenzele ntoni?
․․․․․
Wavakalelwa njani emva koko?
․․․․․
Cinga ngomnye umntu onokumnceda uze uyibhale phantsi indlela onokukwenza ngayo oko.
․․․․․
3. Musa Ukulahl’ Ithemba Xa Wenze Impazamo
Isibhalo onokusisebenzisa. “Bonke bonile baza basilela kuzuko lukaThixo.”—Roma 3:23.
Intsingiselo yaso. Inyaniso esingenakuyiphika yile yokuba asifezekanga. Loo nto ithetha ukuba kuza kubakho amaxesha okukhe sithethe okanye senze into ephosakeleyo. (Roma 7:21-23; Yakobi 3:2) Nangona ungenakukuphepha ukwenza iimpazamo, unako ukuyilawula indlela ozijonga ngayo. IBhayibhile ithi: “Ilungisa lisenokuwa kasixhenxe, yaye ngokuqinisekileyo liya kuvuka.”—IMizekeliso 24:16.
“Maxa wambi ukungazithembi kubangelwa kukuthelekisa ubuthathaka bethu nezinto ezintle ezenziwa ngabanye abantu.”—UKevin.
“Bonke abantu baneempawu ezintle nezimbi. Sifanele sivuye kuba sineempawu ezintle size siphucule ezo zimbi sinazo.”—ULauren.
Isilumkiso: Ukungafezeki kwakho makungabi sisingxengxezo sokwenza isono. (Galati 5:13) Ukuqhubeka usenza izinto eziphosakeleyo kuya kwenza uYehova uThixo angakholiswa nguwe!—Roma 1:24, 28.
Lithuba lakho lokuba ubhale izinto ezinokukunceda. Bhala apha ngezantsi uphawu ofuna ukuluphucula.
․․․․․
Bhala usuku lwanamhlanje ecaleni kophawu ofuna ukuluphucula. Phanda ngendlela onokuluphucula ngayo uze umana ujonga inkqubela oyenzayo kuloo nyanga.
Indlela Oxabiseke Ngayo
IBhayibhile ithi, “uThixo mkhulu kuneentliziyo zethu.” (1 Yohane 3:20) Loo nto ithetha ukuba uyakuxabisa nto leyo osenokungayiboni wena. Kodwa ngaba isiphako esithile onaso siyayitshintsha loo nto? Masithi unemali engangee-R200 ekrazuke kancinane. Ngaba uza kuyilahla okanye uyijonge njengengenaxabiso kuba nje ikrazukile? Akunjalo tu kwaphela! Isezii-R200—enoba ikrazukile okanye ayikrazukanga.
Oku kufana twatse nendlela uThixo akuxabisa ngayo. Uyayibona kwaye uyayixabisa imigudu oyenzayo yokufuna ukumkholisa enoba ibonakala imincinane kangakanani na kuwe! Eneneni, iBhayibhile iyasiqinisekisa ukuba, “uThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.”—Hebhere 6:10.
Amanye amanqaku athi “Abantu Abaselula Bayabuza” afumaneka kwiWeb site ethi www.watchtower.org/ype
[Imibhalo esemazantsi]
a Amanye amagama akweli nqaku atshintshiwe.
b Ukuba uliNgqina likaYehova, uvuya gqitha emva kokuba ushumayele kwabanye abantu ngesigidimi soBukumkani.—Isaya 52:7.
OKO UMELE UCINGE NGAKO
Yintoni oza kuyenza ukuba uziva udimazekile ngenxa yokuba
● Abahlobo bakho bayakugxibha?
● Uvakalelwa kukuba awuzenzi kakuhle izinto njengabanye abantu?
● Ekuphela kwento oyibonayo bubuthathaka bakho?
[Amagama acatshulweyo akwiphepha 27]
“Umntu usenokuba yinzwana okanye inzwakazi kodwa abe yena ezibona ububi. Okanye umntu usenokungabi mhle ngokwenkangeleko abe phofu yena ecinga ukuba akakho umntu ohamba naye ngobuhle. Into nje ixhomekeke kwindlela esicinga ngayo.”—UAlyssa
[Ibhokisi/Imifanekiso ekwiphepha 27]
OKO KUTHETHWA LOLUNYE ULUTSHA
“Kwanesona sakhiwo someleleyo siyakufuna ukuxhaswa yaye maxa wambi siyakufuna ukulungiswa. Amaxesha amaninzi ayandinceda amazwi othando asuka kumhlobo wam okanye uncumo nje lwakhe okanye ukuwolwa nguye.”
“Kunokuba sikhathazeke ngenxa yokuba abanye abantu beneempawu ezintle, sinokufunda okuthile kwiimpawu zabo ezintle—njengokuba nabo benokufunda kwezethu.”
[Imifanekiso]
UAubrey
ULauren
[Umfanekiso okwiphepha 28]
Ixabiso lemali alihli kuba nje ikrazukile. Ngendlela efanayo, uxabisekile emehlweni kaThixo enoba uneziphako