UThixo Uye Wandixhasa Kuzo Zonke Iingxaki Zam

Kubalisa uVictoria Colloy

Omnye ugqirha wathi kumama: “Akukho nto ingako esinokuyenzela intombi yakho. Kuza kufuneka isebenzise iintonga, ifake neentsimbi ezinyaweni ubomi bayo bonke.” Ndaba buhlungu gqitha! Ndandiza kuphila ubomi obunjani xa ndingakwazi ukuhamba?

NDAZALWA ngoNovemba 17, 1949, kwidolophu yaseTapachula ekwiphondo laseChiapas, eMexico. Ndandingumntwana owonwabileyo nosempilweni, izibulo kubantwana abane. Kodwa ke, xa ndandineenyanga ezintandathu ndizelwe ndayeka ukukhasa. Kwiinyanga ezimbini kamva ndandingakwazi nokushukuma. Le nto yababhida oogqirha baseTapachula kuba nabanye abantwana balapho babegula yinto efanayo. Ngenxa yoko, kwafika ugqirha wamathambo waseMexico City eze kusixilonga. Kwafunyaniswa ukuba sigula yipoliyo.

Xa ndandineminyaka emithathu ubudala, ndatyandwa esinqeni, emadolweni nasemaqatheni. Kamva esi sifo sachaphazela igxalaba lam lasekunene. Xa ndandineminyaka emithandathu ubudala, ndasiwa eMexico City ukuze ndiye kunyangwa kwisibhedlele sabantwana. Umama wayesebenza efama eChiapas, ngoko ndasala eMexico City nomakhulu wam. Kodwa ke ixesha elininzi ndandilichitha esibhedlele.

Xa ndandineminyaka esibhozo ubudala, kwabonakala ngathi ndiyachacha. Kodwa emva kwexesha imeko yam yabambi nangakumbi, yaye ekugqibeleni ndaye andakwazi nokushukuma. Oogqirha bathi kuza kufuneka ndihambe ngeentonga ubomi bam bonke.

Xa ndandineminyaka eli-15 ubudala ndandisele ndityandwe izihlandlo ezingama-25, kwithambo lomnqonqo, emilenzeni, emadolweni, emaqatheni nasezinzwaneni. Emva kotyando ngalunye kwakufuneka ndincedwe ukuze ndichache. Emva kolunye utyando ndafakwa isamente emilenzeni. Emva kokuba ikhutshiwe kwafuneka ndenze umthambo obuhlungu.

Ukufumana Intuthuzelo Yokwenene

Xa ndandineminyaka eli-11 ubudala ndatyelelwa ngumama emva kokuba ndenziwe utyando. Wayefunde ukuba uYesu waphilisa abagulayo waza wenza nesiqhwala sakwazi ukuhamba. Wandinika iMboniselo, iphephancwadi elipapashwa ngamaNgqina kaYehova nawayefunde kulo ngale mimangaliso kaYesu. Ndayifihla phantsi komqamelo kodwa ke ngenye imini yanyamalala. Kwathi kanti yayibhaqwe ngabongikazi baza bayithatha. Bandingxolisa besithi ndandingafanele ndiyifunde.

Malunga nonyaka kamva, uMama weza kundityelela eChiapas. Ngelo xesha wayefunda iBhayibhile namaNgqina kaYehova. Wayendiphathele incwadi ethi Ukusuka KwiParadisi Ilahlekile Kuye kwiParadisi Ibe Yazuzeka.a Umama wathi: “Ukuba ufuna ukuphila kwihlabathi elitsha apho uYesu aya kukwenza uphile, kufuneka ufunde iBhayibhile.” Nangona umakhulu wayechasa, xa ndandineminyaka eli-14 ubudala ndaqalisa ukufunda iBhayibhile namaNgqina. Kunyaka olandelayo kwafuneka ndiphume kweso sibhedlele kuba sasenzelwe abantwana kuphela.

Ukumelana Neengxaki

Ndaxinezeleka kakhulu. Ngenxa yokuba umakhulu wam wayechasa kwafuneka ndiye kuhlala nabazali bam eChiapas. Noko ke, ekhaya kwakukho iingxaki kuba utata wayelinxila. Kwakha kwadlula ixesha elithile ndingasiboni isizathu sokuphila. Ndandicinga ukuzityisa ityhefu ndize ndife. Kodwa ke loo nto yatshintsha njengoko ndandiqhubeka ndifunda iBhayibhile. Isithembiso seBhayibhile sehlabathi eliyiparadesi sandonwabisa.

Ndaqalisa ukuthetha nabanye ngethemba elihle eliseBhayibhileni. (Isaya 2:4; 9:6, 7; ISityhilelo 21:3, 4) Ekugqibeleni, ngoMeyi 8, 1968 xa ndandineminyaka eli-18 ubudala ndabhaptizwa ukuze ndibe liNgqina likaYehova. Ukususela ngowe-1974 bendichitha iiyure ezingaphezu kwama-70 ngenyanga ukuze ndifundise abanye ngethemba elindenze ndafuna ukuqhubeka ndiphila.

Ubomi Obanelisayo

Ethubeni, mna nomama saya kuhlala kwisixeko saseTijuana ngakumda weMexico neUnited States. Sihlala kwindawo eyilungele kakuhle imeko yethu. Iintonga zam ziyandinceda ndikwazi ukuhambahamba endlwini yaye ndinesitulo esinamavili endisisebenzisa xa ndipheka, ndihlamba impahla okanye ndiayina. Xa ndisiya kushumayela ndisebenzisa inqwelo yombane eyenzelwe mna ngokukhethekileyo.

Ngaphandle kokuchazela abanye esitratweni nasemakhayeni abo ngeemfundiso zeBhayibhile, ndiye ndityelele isibhedlele esikufutshane ukuze ndincokole nabantu ngeBhayibhile. Ukusuka apho ndiya emarikeni ukuze ndithenge izinto esizifunayo ndize ndincedise umama xa epheka okanye esenza eminye imisebenzi.

Siphila ngemali endiyifumana ngokuthengisa impahla. Umama uneminyaka engama-78 ubudala kwaye akasakwazi ukwenza izinto ezininzi kuba uye wahlaselwa yintliziyo izihlandlo ezithathu. Ngoko kufuneka ndimthengele amayeza nokutya. Nangona sinempilo enkenenkene siye sizame ukubakho rhoqo kwiintlanganiso zebandla. Abantu abangaphezu kwama-30 endiye ndabafundisa iBhayibhile, ndithethanje bangamaNgqina.

Ndiqinisekile ngokuzaliseka kwesithembiso seBhayibhile esithi: “[kwihlabathi elitsha likaThixo] Isiqhwala siya kutsiba njengexhama.” Okwangoku la mazwi kaThixo ayandithuthuzela: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene sobulungisa.”—Isaya 35:6; 41:10.b

[Imibhalo esemazantsi]

[Umfanekiso okwiphepha 12]

Ndinxibe izihlangu zabantu abaqhwalelayo, xa ndandineminyaka esixhenxe

[Umfanekiso okwiphepha 13]

Xa ndisiya kushumayela ndisebenzisa inqwelo yombane eyenzelwe mna ngokukhethekileyo