Indlela Emangalisayo Azalwa Ngayo Umntwana

EMVA kokulinda iinyanga ezisithoba, imini ebikade ilindelwe ide yafika yaye lixesha lokuba umntwana azalwe.a Isibeleko sikanina besisoloko sivalekile ukuze umntwana akhuseleke. Kodwa ngoku siyavuleka. Iqala ngolo hlobo indlela emangalisayo yokuzalwa komntwana.

Uzalwa njani umntwana? Nakuba kukho izinto ezininzi ezibandakanyekileyo, kukho ezimbini ezimangalisayo. Okokuqala, ingqondo kanina iye ikhuphe idlala ekuthiwa yioxytocin. Amabhinqa namadoda analo eli dlala kodwa liba lininzi kumabhinqa akhulelweyo xa sele eza kuzala, nto leyo eyenza umlomo wesibeleko uvuleke ngoxa sona isibeleko sincipha.

Akwaziwa ukuba ingqondo yebhinqa elikhulelweyo yazi njani ukuba ifanele ikhuphe eli dlala. Incwadi ethi Incredible Voyage—Exploring the Human Body ithi: “Ngandlel’ ithile ingqondo iye yazi ukuba ixesha lokubeleka lifikile nokuthi lixesha lokuba izihlunu zesibeleko . . . zenze lo msebenzi ubalulekileyo.”

Enye into ebandakanyekileyo yindima edlalwa ngumkhaya, oyekayo ukuvelisa idlala ekuthiwa yiprogesterone. Xa ibhinqa likhulelwe eli dlala linqanda ukuncipha kwesibeleko. Kodwa ngoku ngenxa yokungabikho kweli dlala isibeleko siqalisa ukuncipha. Ngokuqhelekileyo umntwana udla ngokuphuma esibelekweni phakathi kweeyure ezisibhozo ukuya kwezili-13 iqalile inimba. Emva koko kuphuma umkhaya.

Ngoku usana lufanele lukhawuleze luqhelane nobomi obutsha obahluke kakhulu kwisibeleko sikanina. Ngokomzekelo, ngoxa lusesesibelekweni, imiphunga yalo iba noxakaxa oluye luphume xa luzalwa. Ngoku imiphunga ifanele izale ngumoya ukuze lukwazi ukuqalisa ukuphefumla, nto leyo edla ngokubonakala ngokukhala kwalo. Kubakho notshintsho olukhulu kwindlela intliziyo yalo esebenza ngayo nangendlela elihamba ngayo igazi. Umngxuma odibanisa imithambo emibini yentliziyo kunye nomthambo wegazi osemiphungeni uyavaleka ize eminye ivuleke ukuze igazi likwazi ukungena emiphungeni, nto leyo elenza likwazi ukufumana umoya. Iyamangalisa indlela usana olukhawuleza luqhele ngayo ukuphila ngaphandle kwesibeleko.

Yonke into eyenzekayo xa ibhinqa liza kuzala isikhumbuza amazwi eBhayibhile athi: “Yonke into inexesha layo elimisiweyo, nomcimbi wonke unexesha lawo phantsi kwamazulu.” Oko kuquka “ixesha lokuzalwa.” (INtshumayeli 3:1, 2) Ngokuqinisekileyo uyavuma ukuba zonke ezi zinto zenzeka kumzimba womntwana kwiiyure nje ezimbalwa ezelwe zibubungqina bokuba zenziwe nguMdali ethi iBhayibhile ‘ngumthombo wobomi.’—INdumiso 36:9; INtshumayeli 11:5.

[Umbhalo osemazantsi]

[Umzobo/Imifanekiso ekwiphepha 16, 17]

Indlela Azalwa Ngayo Umntwana

1 Indlela ahlala ngayo umntwana ngaphambi kokuba azalwe

2 Umntwana usondela ngakumlomo wesibeleko

3 Ukuvuleka komlomo wesibeleko

4 Umntwana uyaphuma

[Umzobo]

(Ukuba ufuna inkcazelo ehlahlelwe kakuhle, yiya kwimpapasho)

1

umkhaya

umlomo wesizalo

umlomo wesibeleko

2

3

4