Ubomi—Isipho Esivela KuThixo

IIYURE ezingamashumi amabini anesine ngosuku, intliziyo yethu impompa igazi elixabisekileyo ukutyhutyha umzimba wethu. Siyalala, ibe imiphunga yethu iyaqhubeka ivuleka ize irhwaqele. Siyatya, yaye ukutya kuyetyiswa ngokuzenzekelayo. Konke oku kwenzeka mihla le, singenzanga mgudu okanye ngomgudu nje ongephi. Ezi nkqubo zingummangaliso, esingazithabatheli ngqalelo, ziyinxalenye yesipho sobomi. Ngamanye amazwi busisipho ekunokuthiwa singummangaliso.

Khawucinge ngenkqubo yokukhawulwa neyokuzalwa kwabantu. Nangona umzimba ngokuqhelekileyo uzikhaba izicwili ezingezozawo, isibeleko asenzi njalo ngeqanda elihlangene nedlozi. Kunokuba siyikhabe imveku esakhulayo njengesicwili esingesosaso, siyayondla size siyikhusele ide ibe ikulungele ukuzalwa njengosana. Ukuba isibeleko besingenzi ngolu hlobo kumgaqo wokukhatywa kwezicwili ezingezizo ezomzimba, abantu bebengenakuzalwa.

Sekunjalo, ubomi bosana olusandul’ ukuzalwa bebuya kuba bufutshane ukuba inkqubo eyenzeka esibelekweni xa imveku ineenyanga ezine kuphela ubudala ibingenzeki. Ngelo xesha iqalisa ukuncanca ubhontsi wayo, iqhelise izihlunu kamva eziza kusetyenziselwa ukuncanca emabeleni kanina. Le yenye yezinto ezininzi ubomi obuxhomekeke kuzo ezilungiselelwa ngaphambi kokuba usana luzalwe.

Ngoxa imveku engekazalwa isesibelekweni, kubakho umngxuma entliziyweni yayo. Phofu ke, lo mngxuma uyazivalekela xa izalwa. Ukongezelela, umthambo wegazi omkhulu ongangeniyo emiphungeni ngoxa imveku engekazalwa isesesibelekweni ngokuzenzekelayo uyarhwaqela xa izalwa; ngoku igazi liya emiphungeni, apho linokufakwa ioksijini njengoko usana luqalisa ukuphefumla.

Konke oku sisiqalo nje. Kubo bonke ubomi, iinkqubo eziliqela eziyilwe kakuhle (njengenkqubo yokuphefumla, eyojikelezo-gazi, eyemithambo-luvo neyokusebenza kwamadlala) ziya kusebenza ngolungelelwano olungaphaya kwamandla omntu okuqonda—konke oku kwenzelwa ukugcina ubomi buqhubeka. Akumangalisi ukuba umbhali wamandulo wathi ngokubhekisele kuThxo: “Ndiyabulela kuwe ngenxa enokuba ndenziwe ngokoyikekayo, ngokubalulekileyo; zibalulekile izenzo zakho, umphefumlo wam uyazi kakuhle.”—INdumiso 139:14.

Ngokucacileyo, umbhali waloo mazwi ahlab’ umxhelo wayengakholelwa ukuba ubomi buvele ngamabonandenzile okanye ngengozi yendaleko. Ukuba bekunjalo, ngesingenambopheleleko okanye uxanduva ngendlela esimele sibusebenzise ngayo ubomi bethu. Noko ke, iinkqubo zomzimba zokusigcina siphila zibonisa ukuba ziyiliwe, yaye into eyiliweyo ifuna umyili. IBhayibhile inikela lo mgaqo: “Kuba yonke into eyindlu inoyakhayo; ke lowo wazakhayo zonke izinto nguThixo.” (Hebhere 3:4) Ngoko ke kubalulekile ‘ukwazi ukuba uYehova nguThixo; wasenza yena, asisithi.’ (INdumiso 100:3) Ewe, ubomi abuyonto nje eyabakho ngengozi; busisipho esivela kuThixo.—INdumiso 36:9.

Ukuba kunjalo, ziziphi iimbopheleleko esinazo kuMniki-bomi? Ulindele ukuba sibusebenzise njani ubomi bethu? Le mibuzo neminye iza kuqwalaselwa kwinqaku elilandelayo.