“Ndandiye Kufuna Nje Iileta Zam”
UANDRE indoda yomlungu yaseMzantsi Afrika ehlala eNamibhiya yathi: “Andisokuze ndiyilibale intsasa yangoMvulo xa ndandiseposini. Indlu yeposi yayizele imi ngeembambo ngabantu. Ndabona ibhegi ekrokrelekayo neyayingenamnikazi. Ndacela iileta zam ndaza ndangena emotweni, ndemka. Emva kwemizuzu emalunga nemithathu ndeva isithonga esikhulu. Kamva ndeva ukuba eso sithonga sasisesebhombu eyaqhushumba kumgama weemitha ezimbalwa ukusuka kwindawo endandimi kuyo ngaphakathi eposini.”
UAndre uthi: “Ndandiye kufuna nje iileta zam. Ndothuka kakhulu ndakufumanisa ukuba abantu abaninzi endibaziyo babulewe yile bhombu. Ndisangcangcazela nangoku xa ndicinga ngesi sihelegu nangona senzeka kangangeminyaka engaphezu kwama-25 eyadlulayo. Ngamanye amaxesha kukhe kube ngathi ndiyayibona yonke into eyenzekayo ndize ndiqonde ukuba ndasinda cebetshu.”
Ingxaki Yomhlaba Wonke
Nangona usenokungabi kwimeko efanayo, mhlawumbi ukhe weva ukuba izidubedube ezinjengezi zixhaphakile kulo lonke ihlabathi. Liyanda inani labantu ababhenela kwizigalo xa befuna ukufeza iinjongo ezithile, senzo eso esidla ngokubizwa kukuba bubugrogrisi.—Sicela ufunde ibhokisi enomxholo othi “Ngoobani Abagrogrisi?” kwiphepha elilandelayo.
Emva kokuphanda ngokucokisekileyo, enye intatheli yafumanisa ukuba ngowe-1997 “ayemane kuphela amazwe ekwakuxhaphake kuwo ukuba abantu bazibophelele ngeebhombu ukuze baziqhushumbise.” Kodwa ke ngowama-2008 kwale ntatheli yathi “kumazwe angaphezu kwamashumi amathathu nakuwo onke amazwekazi ngaphandle nje kweOstreliya neAntarctica abantu abazibophelela ngeebhombu baye benza umonakalo omkhulu.” Waqukumbela ngelithi “maninzi amaqela ahlasela abantu ngolo hlobo yaye nyaka ngamnye kubulawa abantu abangakumbi.”—The Globalization of Martyrdom.
Kuhlaselo ekuthethwe ngalo ngasentla, iqela elavumayo ukuba lilo elatyala ibhombu lalisithi lilwela inkululeko. Lalikumzabalazo wokulwela inkululeko kurhulumente owayelawula ilizwe lalo ngelo xesha. Kodwa yintoni eyenza abantu babhenele kwizenzo ezinjalo xa befuna ukufeza iinjongo zabo? Makhe sithethe ngomzekelo kaHafeni.
UHafeni wazalelwa eZambia waza wakhulela kwiinkampu zeembacu kumazwe aselumelwaneni. Uthi: “Ndandiyithiy’ egazini inkohlakalo nokuphathwa kakubi kwentsapho yasekhaya nabanye abantu.” Ngenxa yoko waba lilungu leqela lenkululeko ababengamalungu alo abazali bakhe.
Xa ecinga ngoko kwenzekayo, uHafeni uthi: “Eyona nto ibuhlungu kuyo yonke le nto kukuba yimbacu. Abantwana babesahlukaniswa noonina, ooyise kunye nabantakwabo noodadewabo. Abaninzi abazange baphinde babuye. Utata andizange ndambona nkqu nasefotweni. Endikwaziyo nje kukuba wafel’ edabini. Le nto isandikhathaza nanamhl’ oku.”
Licacile elokuba akulula ukuqonda izizathu zokuba abantu babhenele kwizigalo. Ukuziqonda kakuhle ezo zizathu kuya kukunceda ubone ukuba yintoni ekufuneka yenziwe ukuze abantu bohlukane nogonyamelo.
[Ibhokisi/Umfanekiso okwiphepha 4]
NGOOBANI ABAGROGRISI?
Umphengululi uMark Juergensmeyer uthi: “Ukuthi isenzo esithile sogonyamelo bubugrogrisi kuxhomekeke ukuba wena usijonga njani eso senzo. Ubukhulu becala indlela esilijonga ngayo eli gama ixhomekeke kwindlela esilijonga ngayo ihlabathi: ngokomzekelo, ukuba sicinga ukuba ihlabathi liseluxolweni, siya kuthi bubugrogrisi izenzo zogonyamelo. Ukuba sicinga ukuba ihlabathi lisemfazweni, siya kuthi kukho isizathu esivakalayo sezenzo zogonyamelo.”
Ngoko igama elithi ubugrogrisi lixhomekeke kwicala okulo kwezopolitiko. Amaqela amaninzi akazigqali njengabagrogrisi kodwa athi alwela inkululeko. Ngokutsho komnye umbhali, ubugrogrisi buquka (1) ukuhlasela abantu abangaxhobanga (2) ukusebenzisa ugonyamelo ukuze woyikise iintshaba zakho. Ngoko ke, abahlaseli—kungakhathaliseki ukuba ngamaqela abavukeli mbuso okanye ngurhulumente—basenokusebenzisa iindlela zobugrogrisi.