Isizathu Sokuba Abanye Babhenele Kugonyamelo
UJOSEBA waseSpeyin wabuzwa ngesizathu sokuba abe lilungu leqela lamavukela mbuso. Uthi: “Yayinganyamezeleki ingcinezelo nokuphathwa kakubi esasijamelene nako ngaloo minyaka. Kwisixeko endandihlala kuso eBilbao, amapolisa ayedla ngokufika abethe abantu aze abavalele entolongweni.”
UJoseba wongezelela esithi: “Ngenye intsasa ndabanjwa ngenxa yokugxeka izinto ezazisenziwa ngamapolisa. Ndaba nomsindo kangangokuba ndandifuna ukuyilungisa le meko—nangezigalo ukuba kwakuza kufuneka ndenjenjalo.”
Ukuziphindezelela Kwingcinezelo
IBhayibhile ayiluthetheleli ugonyamelo kodwa ke iyavuma ukuba, “ingcinezelo nje isengasiphambanisa isilumko,” okanye isenze senze izinto ezingafanelekanga. (INtshumayeli 7:7) Kuyabacaphukisa abantu abaninzi ukuphathwa kakubi ngenxa yohlanga, unqulo okanye ilizwe abavela kulo.
Ngokomzekelo, uHafeni ekuthethwe ngaye kwinqaku elandulela eli wathi: “Ilizwe lethu lahluthwa kuthi. Izilwanyana ziyayilwela imida yazo ngoko kwakubonakala kufanelekile ukuba nathi silwele ilizwe namalungelo ethu.” Kumazwi akhe awapapashwa emva kokuba efile, omnye umntu owaziqhushumbisa ngebhombu wathi: “Asizi kuyeka ukulwa de nani niyeke ukubulala abantu bethu ngeebhombu, ukubarhaxisa ngeegesi, ukubavalela ezintolongweni nokubangcungcuthekisa.”
Ukuqhutywa Lunqulo
Nangona amaxesha amaninzi, abantu bedla ngokulwa ngenxa yokuqhutywa zezinye izizathu, namhlanje nonqulo ludla ngokufak’ isandla. Enye inkokeli yehlabathi yafumana le leta kwisithethi sabagrogrisi: “Asiphambananga yaye asinamsebenzi nagunya. Sikhonza uThixo yaye yiloo nto esenza singagungqi kwizinto esizilwelayo.”
Kwincwadi yabo ethi The Age of Sacred Terror, uDaniel Benjamin noSteven Simon bathi ngokuphathelele izinto ezenziwa ngabantu beqhutywa lunqulo: “Kwihlabathi abandayo kulo abantu abakhonzayo, amarhamente angakumbi eecawa ezinkulu nezintsha nawamahlelo anwenwa okomlilo wedobo, akholelwa ukuba ugonyamelo lufanele lube yinxalenye yenkonzo abayenzela uThixo.” Emva kokuba ebhale ngoko akubiza ngokuba “bubugrogrisi behlabathi obugqith’ emgceni,” omnye umphengululi wathi: “Bonke abagrogrisi bayavumelana ukuba zonke izinto abazenzayo kukuthanda kukaThixo.”
Noko ke, abagrogrisi abaninzi baneembono ezibaxiweyo nezingavumelaniyo neemfundiso zeecawa zabo.
Iimfundiso Ezendeleyo
UJoseba ekuthethwe ngaye ekuqaleni kweli nqaku waphathwa kakubi xa wayevalelwe entolongweni. Wathi: “Le nkohlakalo yandenza ndaqiniseka ukuba ndandinezizathu ezivakalayo zokuba nenzondo. Nokuba ndandinokufa ukuze ndiyitshintshe le meko, ndandizakube ndifanele ukwenjenjalo.”
Amaxesha amaninzi, izizathu ezinjalo zokuphakamisa izigalo zibaselw’ umlilo koko afundiswa kona la maqela. UHafeni wathi: “Xa sasikwiinkampu zeembacu, sasifundiswa ukuba abelungu babesoloko bequlunqa amacebo okucinezela abantu abantsundu.” Waba yintoni umphumo?
UHafeni wathi: “Ndandisiya ndibacaphukela abelungu. Ndandingathembi namnye kubo. Ekugqibeleni zange ndikwazi ukuyinyamezela le nto yaye ndandisithi isizukulwana sethu kumele kubekho into esiyenzayo.”
Okumangalisayo kukuba nangona babecinga ngale ndlela, uJoseba noHafeni batshintsha. Yintoni eyatshintsha ingqondo neentliziyo zabo? Inqaku elilandelayo liza kunaba.
[Amagama acatshulweyo akwiphepha 6]
“Le nkohlakalo yandenza ndaqiniseka ukuba ndandinezizathu ezivakalayo zokuba nenzondo. Nokuba ndandinokufa ukuze ndiyitshintshe le meko, ndandiza kube ndifanele ukwenjenjalo.”—UJoseba