Ngaba Ubugrogrisi Buya Kuze Buphele Emhlabeni?
“KUFUNEKA sitshintshe . . . iintliziyo kunye nengqondo yabo.” Eso sisigqibo ekwafikelelwa kuso emva kokuba kwenziwe uphando olwathabatha iminyaka engama-20, lobuntu babo babizwa ngokuba ngabagrogrisi.
Kodwa yintoni enokutshintsha iintliziyo nengqondo yabantu abangene zwabha kugonyamelo nenzondo?
Incwadi Ekwaziyo Ukutshintsha Iintliziyo
Ngeminyaka yee-1990 uHafeni waqalisa ukuhlola iinkolelo zakhe waza wagqiba kwelokuba abe neBhayibhile. Uthi: “Ndaqala ngokufunda iincwadi zeVangeli [incwadi yeBhayibhile kaMateyu, uMarko, uLuka noYohane] ezithetha ngobomi bukaYesu. Njengoko ndandizifunda, ndakhawuleza ndabuthanda ubuntu bukaYesu kuba wayenobubele yaye engenamkhethe. Kwandivuyisa gqitha oku.”
UHafeni uthi, ‘kwiZenzo 10:34-35 iBhayibhile yamnceda wayiqonda kakuhle imbono kaThixo,’ njengoko wayeqhubeka efunda. Ezi ndinyana zithi: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”
Uthi: “Ndagqiba ekubeni ingxaki isebantwini, ngabo abanobuhlanga, ubuzwe nocalucalulo. Ndatsho ndabona ukuba iimfundiso zeBhayibhile zinako ukuyitshintsha indlela abacinga ngayo abantu nokuthi eyona nto ibalulekileyo ebomini kukuthandwa nguThixo. Oku kubaluleke ngaphezu kokulwela abantu bohlanga okanye ibala elithile.”
UJoseba ekuthethwe ngaye kwinqaku elandulela eli wayeyinkokeli yeqela labavukeli ababefuna ukuqhushumbisa ngebhombu isikhululo samapolisa. UJoseba uthi: “Kodwa ndabanjwa ngaphambi nje kokuba siqhushumbise eso sikhululo ndaza ndavalelwa iminyaka emibini entolongweni.” Kamva, inkosikazi yakhe uLuci yaqalisa ukufunda iBhayibhile namaNgqina kaYehova. Ekugqibeleni noJoseba waphulaphula njengoko kwakufundiswa inkosikazi yakhe.
UJoseba uthi: “Njengoko ndandifunda okungakumbi ngoYesu ndafuna ukuba njengaye. Ndawathanda amazwi akhe athi: ‘Bonke abathabatha ikrele baya kutshabalala ngekrele.’ Ndandisazi ukuba unyanisile.” (Mateyu 26:52) Wavuma ukuba, “Ukubulala umntu kwenza amalungu entsapho yakhe akuthiye aze afune ukuliphindezela igazi lakhe. Ubundlobongela bubangela intlungu kungekhona ihlabathi elibhetele.” NoJoseba waqalisa ukutshintsha.
UHafeni noJoseba bazibonela ngokwabo ukuba iimfundiso zeBhayibhile zinamandla okumtshintsha umntu. IBhayibhile ithi, “ilizwi likaThixo liphilile, linamandla” yaye liyakwazi ukuqonda “iingcamango notyekelo lwentliziyo.” (Hebhere 4:12) Amandla eLizwi likaThixo ancede abantu abaninzi batshintsha iingcinga nezenzo zabo. Ngaba bukho ubungqina bokuba abantu abayithobela ngokunyanisekileyo iBhayibhile bamanyene kuwo wonke umhlaba?
Abazalwana Abathandanayo
Xa uHafeni waqalisa ukuya enkonzweni yamaNgqina kaYehova, waluthanda umanyano lweentlanga ezahlukahlukeneyo. Wathi: “Ukuhlala ecaleni komlungu kwakundivuyisa gqitha. Ebomini andizange ndikhe ndiyicinge into yokubiza umlungu ngokuba ngumzalwana wam. Oku kwandiqinisekisa ukuba amaNgqina afanele ukuba alunqulo lokwenyaniso, kuba ayenomanyano endandilufuna yaye ayethandana nangona eziintlanga ezahlukahlukeneyo.”
UYesu wathi abalandeli bakhe bokwenene baya kubonwa ngokuba ‘nothando phakathi kwabo.’ (Yohane 13:34, 35) Yaye akazange avume ukungena kwiingxwabangxwaba zezopolitiko ibe wathi kubafundi bakhe: ‘Aniyonxalenye yehlabathi.’ (Yohane 6:15; 15:19; Mateyu 22:15-22) AmaKristu okwenene elo xesha ayesaziwa ngothando nangokungathathi cala kwezopolitiko yaye asenjalo nanamhlanje.
Ukwenza Izinto Ezafundiswa NguYesu
Abantu banokuba nalo njani uthando kwihlabathi elineyantlukwano ebangela ubugrogrisi? Xa iipolitiki zibangela ingxwabangxwaba, abantu baye baxabane ngenxa yokunyaniseka kuhlanga okanye isizwe sakowabo.
Ngokomzekelo, ngowe-1914 yayibubuhlanga obabangela ukuba uGavrilo Princip agebenge inkosana yaseAustro-Hungarian, uArchduke Francis Ferdinand. UPrincip wayelilungu lombutho iBlack Hand owawusithi ukhetha “ubugrogrisi kunenkcubeko” ukuze ufeze iinjongo zawo. Ukugetyengwa kwale nkosana kwakhokelela kwimfazwe phakathi kwamazwe athi angawobuKristu, eyaba yiMfazwe Yehlabathi I nekwafa kuyo izigidi zamajoni awayesithi alandela uYesu, “iNkosana yoXolo.”—Isaya 9:6.
Ekupheleni kwemfazwe, umfundisi odumileyo uHarry Emerson Fosdick wabagxeka abafundisi beecawa zamaKristu ngenxa yokungafundisi kwabo amarhamente abo ukulandela umzekelo kaYesu. Wathi: “Sikhulise amadoda ukuze alwe emfazweni. Awona maqhawe ethu ngamajoni yaye kwiicawa zethu siye saxhoma iiflegi zemfazwe.” Lo kaFosdick waqukumbela wathi: “Ngapha sidumisa iNkosana yoXolo kodwa kwelinye icala sikwaxhasa nemfazwe.”
Ngokwahlukileyo, incwadi yezentlalo eyapapashwa ngowe-1975 yathi: “AmaNgqina kaYehova ebesoloko engalwi yaye ‘engamaKristu angathath’ icala kuzo zombini iimfazwe zehlabathi neengxwabangxwaba zomkhosi eziye zakho ngexesha leMfazwe Yomlomo.” AmaNgqina “akazange alwe” nangona aye aphathwa kakubi aze avalelwa ezintolongweni. Le ncwadi yaqukumbela ngelithi: “Iimfundiso zamaNgqina kaYehova zisekelwe kwinkolelo yawo yokuba iBhayibhile lilizwi likaThixo eliphefumlelweyo.”
Ukubaluleka Kokuphila Ngeemfundiso ZeBhayibhile
Xa owayesakuba yinkulumbuso yaseBelgium wafumana incwadi ethetha ngobomi bukaYesu enomxholo othi Oyena Mntu Ubalaseleyo Wakha Waphila kummelwane wakhe, wakuthanda gqitha oko wakufundayo. Wabhalela ummelwane wakhe esithi: “Kuyacaca ukuba ihlabathi beliya kwahluka ngokupheleleyo kule nto liyiyo ngoku ukuba abantu bebenokuba nomdla koko kufundiswa ziincwadi zeVangeli baze bathobele iimfundiso zikaYesu Kristu.”
Walek’ umsundulu esithi: “Bekungayi kufuneka sibe neSecurity Council, bezingayi kubakho iintlaselo zabagrogrisi yaye ugonyamelo beluya kuphela.” Sekunjalo, wathi: “Yonke le nto yintsom’ emini.” Kodwa ngaba ngokwenene iyintsomi? Sithethanje nangona ihlabathi lizaliswe lugonyamelo, iBhayibhile iye yanceda abantu abaninzi abaneemvelaphi ezahlukahlukeneyo ukuba bahlukane nogonyamelo kunye nenzondo ebakho xa abantu bechith’ iminyaka emininzi bebona uphalazo gazi olumanyumnyezi.
UAndre ekuthethwe ngaye kwinqaku lokuqala waphantse wabulawa yibhombu eyabulala abahlobo bakhe abaliqela. Le bhombu yayityalwe liqela labagrogrisi. Kamva wafunda iBhayibhile waza wathobela icebiso layo elithi sifanele ‘sixolele ngesisa.’ (Kolose 3:13) Kanti noHafeni, owayelilungu lelo qela waqalisa ukuphila ngemithetho yeBhayibhile waza wahlukana nogonyamelo. (INdumiso 11:5) Sithethanje, sele kudlule iminyaka emva kokuqhushumba kwaloo bhombu yaye la madoda mabini angamaNgqina kaYehova ibe asebenza kunye kwiofisi yabaguquleli bamaNgqina kwelo lizwe laseAfrika.
Ithemba Lokukhuseleka Kwikamva
Izigidi zabantu abasehlabathini lonke bazibonela ngawabo ukuba ukufunda iBhayibhile kubenza babe nethemba lokukhuseleka kwikamva. Ngokomzekelo, ngeny’ imini uAndre wabonisa ummelwane wakhe isithembiso seBhayibhile sehlabathi elitsha elinobulungisa. (Isaya 2:4; 11:6-9; 65:17, 21-25; 2 Petros 3:13) Kuthe kusenjalo, indlu awayekuyo yarhangqwa ngamajoni awayephethe oombayimbayi aza ayalela uAndre ukuba aphume ukuze aphendule imibuzo ethile. La majoni amshiya esakuva ukuba uAndre wayefundisa abantu iBhayibhile nokuba wayethandwa kakhulu ngabamelwane bakhe.
UAndre wayesandula ukucacisa ukuba uThixo uza kuyilungisa ingxaki abakuyo abantu njengoko wenzayo ngemihla kaNowa xa “umhlaba wawuzaliswe lugonyamelo.” (Genesis 6:11) UThixo walitshabalalisa ngonogumbe elo hlabathi waza wasindisa uNowa indoda eyayithanda uxolo kunye nentsapho yakhe. UYesu wathi: “Kuba kanye njengokuba yayinjalo imihla kaNowa, buya kuba njalo ubukho boNyana womntu.”—Mateyu 24:37-39.
Kungekudala uYesu, “uNyana womntu” okhethwe ukuba abe nguMlawuli worhulumente wasezulwini obizwa ngokuba buBukumkani bukaThixo uza kukhokela imikhosi yasezulwini ukuze isuse ugonyamelo ehlabathini. (Luka 4:43) UKumkani wasezulwini uYesu uza ‘kubaphatha kakuhle bonke abantu yaye kuza kubakho uxolo.’ Uza kubakhusela abalawulwa bakhe “ekufeni ngogonyamelo nangenkohlakalo.”—INdumiso 72:7, 14, iContemporary English Version.
Emva koko, bonke abangamalungisa nabavumayo ukulawulwa ngulo Kumkani wasezulwini baza kubona umhlaba ulungiswa usiba yiparadesi enoxolo. (Luka 23:42, 43) IBhayibhile ithembisa ukuba: “Uxolo nobulungisa buya kulawula kuzo zonke iintaba neenduli.”—INdumiso 72:1-3, iCEV.
Ngaba akunakuba mnandi emhlabeni xa kulawula ukumkani onjalo? Eneneni elo iya kuba lihlabathi elingenabo ubugrogrisi.
[Amagama acatshulweyo akwiphepha 7]
UHafeni noJoseba bazibonela ngokwabo ukuba iimfundiso zeBhayibhile zinamandla okumtshintsha umntu
[Amagama acatshulweyo akwiphepha 9]
‘Ukuba abantu bebenokuthobela iimfundiso zikaYesu Kristu, ihlabathi lanamhlanje belingayi kuba yile nto liyiyo namhlanje. Bekungayi kufuneka sibe neSecurity Council, bezingayi kubakho iintlaselo zabagrogrisi yaye ugonyamelo beluya kuphela.’—Owayesakuba yinkulumbuso yaseBelgium
[Umfanekiso okwiphepha 8]
Ukuthobela imithetho yeBhayibhile kwanceda uHafeni noAndre bathandana ngokusuk’ entliziyweni