Izimvo Zabafundi BakaVukani!
Izidalwa Ezahlukahlukeneyo Ezikummandla Ongentla WeAmazon (Aprili 2010) Inqaku lenu lithi ama-Aguaruna anqula izithixo ezintlanu. Ekubeni ndingum-Aguaruna womthonyama andivumelani noko. Ndicinga ukuba nenze impazamo kuba inkoliso yama-Aguaruna izibanga ingamaKristu yaye ayinquli oothixo abahlanu njengokuba iphephancwadi lenu lisitsho. Ekubeni ama-Aguaruna elifunda iphephancwadi lenu, ndicela niyilungise le mpazamo.
UT.P.T., wasePeru
“UVukani!” uyaphendula: Umbhali uye wayifumana inkcazelo yakhe kwimithombo eyahlukahlukeneyo, wadlan’ indlebe nabantu abahlala kwiilali zama-Aguaruna waza enye inkcazelo wayifumana nakwezinye iincwadi. Enye yazo “yiAtlas Regional del Perú” Uhlelo lowama-2004 lunamagama aba thixo bahlanu yaye luyathetha ngabo. Noko ke, njengokuba utshilo abanye abantu belali zama-Aguaruna baye baguquka baba ngamaKristu. Sicela uxolo ngengcamango engachananga ekusenokuba siyidlulisele.
Indlela Yokuhlangabezana Nokuthintitha (Meyi 2010) Ndibamba ngazo zozibini ngeli nqaku. Nam ndiyathintitha yaye amaxesha amaninzi ndiziva ndililolo. Kodwa emva kokufunda eli nqaku ndiye ndaqonda ukuba ayindim ndodwa onale ngxaki. Ngoku ndizimisele ukuba ndingatyhafi yaye njengoRafael, xa ndiye ndabambeka egameni, ndiye ndiyihleke loo nto.
UY. S., waseJapan
Abantu Abaselula Bayabuza . . . Ndingenza Njani Ukuze Ndizihlonele? (Meyi 2010) Ndineminyaka eli-12 ubudala, ndihlala nomama wam ogula kakhulu yaye ukhulisa mna eyedwa. Xa ndafunda umbuzo othi, “Ngaba uziva uthandwa?” Ndaphendula ndathi “Hayi.” Oko kwandikhathaza kakhulu. Ngoko ndathetha namanye amaKristu aqolileyo kunye nomama. Eli nqaku landinceda ndabona ukuba andifanele ndizigxeke kangaka. Baninzi abantu abandithandayo. Ndiyabulela ngokundinceda ndibone indlela uYehova asikhathalele ngayo thina lutsha.
UC. H., waseFransi
Eli nqaku landinceda ndakwazi ukumelana nezinto ezibuhlungu ezandehlelayo nokuziva ndingento yanto okusandikhathazayo nangoku. Andisoze ndizilibale iindlela ezintathu ezinokundinceda ndizihlonele ekuthethwe ngazo kweli nqaku, ingakumbi umzekeliso wemali ekrazuke kancinane! Ndibamba ngazo zozibini ngeli nqaku!
US. W., waseSouth Korea