Ukunganyaniseki Kuxhaphake Kakhulu!

UDannya usebenzela inkampani enkulu yaseHong Kong. Xa wayetyelele umzi-mveliso wenkampani awayeza kusebenzisana nayo, wabaxelela ukuba, uxhalabele into yokuba loo mzi-mveliso awuyikukwazi ukuvelisa impahla ekumgangatho wenkampani yakhe. Kamva, ngexesha lesidlo umphathi walo mzi-mveliso wanyengezela uDanny imvulophu. Akuyivula wafumana isityhwentywe semali—esilingana nomvuzo awufumana ngonyaka.

● Kuxhaphake kakhulu oku kuye kwehlela uDanny. Ehlabathini lonke, indlela ukunganyaniseki okuxhaphake ngayo ixhomis’ amehlo. Ngokomzekelo, iimpepha zasenkundleni zibonisa ukuba phakathi kowama-2001 nowama-2007 inkampani enkulu yaseJamani yachitha imali emalunga nee-R9,940,000,000 inyobela imisebenzi.

Nakubeni oku kubhenceka kwezi nkampani zinkulu mva nje kuye kwakhokelela kutshintsho oluthile, kodwa kona ukunganyaniseki kuya kukhula ngakumbi. Ngokutsho kohlolisiso olwenziwe yiTransparency International emhlabeni wonke, “ubuqhophololo buye bathath’ unyawo kule minyaka mithathu idluleyo.”

Kutheni kukho ukunganyaniseki okungaka? Ngaba abantu banako ukunyaniseka? Ukuba kunjalo, kunokwenzeka njani? Ngaba iBhayibhile inokusinceda?

[Umbhalo osemazantsi]